Titus 3:3-7
Nqe cim:
“Tiamsis thaum Vajtswv tus uas yog peb tus Cawmseej nws qhia nws txojkev hlub rau sawvdaws, thaum ntawd Vajtswv muab peb lub txim tshem mus povtseg lawm.” (Titus 3:4-5a)
Lus nug rau sawvdaws xav:
– Los ntawm yam dabtsi tibneeg txhaum thiaj tau cawmdim?
– Vajtswv Vaj Peb Leeg ua tiav txojkev cawmdim rau tibneeg licas?
– Thaum txais tau kev cawmdim vim Vajtswv txojkev hlub, peb yuav tsum ua lubneej zoo licas?
Nqe 3 thiab nqe 4 hais txog ob ntu neej sib txawv ntawm tibneeg. Lo lus “tiamsis” nyob qhibthawj ntawm nqe 4 qhia pom kev pauv hloov txij ntu neej txhaum thaum ub los ua ntu neej tau hlub thiab tau cawmdim hnub no (nqe 3-4) los ntawm Vajtswv txojkev hlub tibneeg, tsis yog vim ib teg haujlwm zoo twg.
Ntu Vajluskub no qhia pom Vajtswv Peb Lub Zwmtxwv tshwm sim nyob hauv txojkev cawmdim rau tibneeg. Vaj Leej Txiv Txojkev hlub tshua pub Vaj Ntsujplig ntxuav tibneeg tej kev txhaum, yug dua tshiab thiab hloov lub neej vim Tswv Yexus kev tuag txhiv saum tus ntoo khaublig. Yog li ntawd, vim Vajtswv txoj koob hmoov hlub peb thiaj tau suav hais tias ncaj ncees, tau los ua cov menyuam txais tej qub txeeg qub teg thiab muaj kev cia siab tau txojsia ntev dhawv mus ibtxhis (nqe 4-7). Tibneeg txhaum caiv tsis tau tus kheej lubcev, ua zoo qaij phem… kom tau kev cawmdim tiamsis tsuas tau los ntawm txojkev hlub dhau ntawm txojkev ntseeg xwb. Timthawj Paulus qhia hais tias: “Tiamsis Vajtswv hlub peb kawg nkaus li. Peb tsis mloog Vajtswv lus thiab peb zoo li cov neeg uas tuag lawm los Vajtswv tseem pub peb rov muaj txojsia ib yam li Vajtswv tau tsa Yexus Khetos sawv hauv qhov tuag rov qab los. Vajtswv hlub nej kawg li, Vajtswv thiaj li cawm kom nej dim. Vim peb nrog Yexus koom ib txojsia, Vajtswv thiaj tsa peb nrog Yexus Khetos sawv rov qab los. Vajtswv ua li ntawd kom peb tau nrog Yexus Khetos kav saum ntuj ceebtsheej” (Efexus 2:4-6).
Txij li ib tug “neeg ruam, neeg tawv ncauj, neeg ua txhaum, qaug rau kev phem kev qias thiab rau txhua yam kev lomzem, lub siab niaj hnub xav phem, ntshaw luag tug thiab ib leeg ntxub ib leeg” (nqe 3) peb tau los ua tus ntseeg Tswv Yexus, tau Vaj Ntsujplig pub muaj lubneej tshiab, thiab Nws niaj hnub pauv hloov peb dua tshiab txhua hnub kom peb yim hnub yim zoo thooj tus Tswv. Yog li ntawd, yam uas peb yuav tsum ua tomqab ntseeg Tswv Yexus yog qhib siab cia Vaj Ntsujplig los tswjkav lubneej. Thaum peb cia Vaj Ntsujplig tswjkav, Nws yuav pub rau peb muaj lub zog tshiab thiab pab kom peb hloov dua tshiab txhua hnub. Cia li qhia tshwm kev nco tus Tswv txiajntsig dhau ntawm kev saib taus lub meejmom ua Vajtswv cov meyuam, cia li muab siab npuab tus Tswv txawm lubneej tau zoo thiab txomnyem, cia siab ntsoov tos hnub Tswv Yexus rov los tos peb mus nrog Nws nyob saum Ntuj Ceeb Tsheej qhov chaw tau zoo. Yuav muaj tej lub sijhawm peb raug ntxeev ntxias, sim siab, lossis qaug zog thaum nrog tus Tswv mus, tiamsis cia li sawv, vamkhom Vaj Ntsujplig kev pab kom tau nrog tus Tswv mus txhua hnub.
Thov Vajtswv,
Thov qhuas Vajtswv tus pub kev cawmdim rau tibneeg thiab rau nyuam yaus. Thov Vaj Ntsujplig pub dag zog tshiab kom nyuam yaus rhais ruam hauv txojkev nrog tus Tswv mus kom txog qhov kawg. Nyuam yaus tuav tswv Yexus Khetos lub npe thov, Amees.
Peb txiav txim siab ua lubneej phim tus Tswv txojkev cawmdim zoo licas?
Nyeem Vajluskub hauv peb lub xyoos: II Vajntxwv 21
Kênh Youtube BHKTHN:
