Tơdrong Pơđơ̆k 23:29-35
“Bơ̆n ‘nĕ kơ et sik suai hli kơ bơ̆n jing bơngai kư̆ kă; bơ̆n athei ăn kơ Yang Bơhngol ‘Lơ̆ng pơgơ̆r bơ̆n lăm tôm tơdrong.” (Êphêsô 5:18)
Nơ̆r jet tơchĕng pơwao:
– Tơdrong pơm kơ bơ̆n ‘maih et sik đei pơting păng roi tơ’bôh thoi yơ?
– Lĕch đơ̆ng suai kơ sik noh kiơ?
– Lu bơ̆n hăm đei tơchĕng păng jơhngơ̆m thoi yơ ‘bơ̆t kơplah tơdrong pơhlŭ et sik dah ‘bier?
Nơ̆r ‘Bok Kei-Dei năr ‘nâu đei nơ̆r jet wă pơma kơ tơdrong lĕch đơ̆ng dư, hơmŭi kơ tơdrô, ‘Noh bơih jing pơmat, ơh sơ’ngon, pơjah pơjăng dih băl tơhil băl, jĭ rơka tơdrong kơ đei, păng pơrăm lăm jơhngơ̆m ih. Nơ̆r “lăng pơnhen tơdrô” đei pơting hăm “lăng pơnhen tơ bơngai drŏkăn đi” (trong 31, 33). Kơplah ih lăng sư rŏ kơ et ‘lơ̆ng ‘ngam na pơm kơ hơlŏng ih ‘nhĕng, sư gô pơrăm lê̆ tơdrong hơgei ih, pơhlŭ pơm kơmăt ih lăng pơnhen, đơ̆ng noh na ih jing et hloi, jing hơmŭi, nhen thoi drŏkăn đi tơdrong pơhlŭ đơ̆ng tơdrô jơ̆ hơnăk hơđong ôn hlơp dêh. Weh ataih bĕ đơ̆ng tơdrong krê hơmơt, pơrăm lê̆ tơdrong pơhlŭ noh đơ̆ng blŭng a ‘nĕ kơ ngôi jê̆ tơdrô, ‘nĕ kơ et pơlong lăng, ‘nĕ kơ lăng pơnhen, yua kơ mưh bơ̆n lăng pơnhen gô pơm kơ bơ̆n ‘maih rai jê̆ tơdrô. ‘Bâu phu tơdrô phơ phơ̆r ‘ngam ‘lơ̆ng, mălei mưh bơ̆n et bơih ưh kơ đei phara kiơ thoi bih ‘bih wă pơrăm akâu jăn bơ̆n hli krê tơpă, pơm kơ akâu jăn bơ̆n hơmren, gô ba lơ tơdrong kơnê̆ lăm chăl arih bơ̆n.
Bơngai suai kơ sik ưh pă đei đon tơchĕng bơih, pă băt mơn kơ pơm kiơ kơlih kơ thoi noh na tơdrong arih lu sư huŏng lăm tơdrong krê hơmơt đei pơtih gia thoi bơngai ‘bĭch tep lăm đak dơsĭ, thoi ‘bĭch kơpal kơ̆l jrăng đe dăng che thŏng nan: Tơpă bơngai oei arih thoi bơngai lôch bơih. Pơtôch ‘bai bơtho ‘nâu đe yua nơ̆r pơjăm pơjuă bơngai suai kơ sik thoi sem brem ưh kơ gơh pơma, tơdrong kơnê̆ sư, lu sư pơang khan; đe teh mălei huay kơ jĭ, đei dong inh, mălei inh ưh kơ băt! Mă khan đe teh dong mălei ưh kơ đei bơwei akâu jăn kơdih, mă đe pơjăm mah pă băt, mưh lei pă ‘bôh kiơ tơdrong gĭt kon bơngai păng tơdrong mă pơm kơ bơ̆n sơ’ngon dêh, noh mưh layơ hơdơ̆r gô wă et dơ̆ng pơm kơ bơngai noh rai dư hơmŭi.
Dang ei, đei lơ bơngai kiơ̆ tơdrong glăi đei khan dah bơngai ưh kơ đei et sik lei bơngai noh ưh kơ bơngai drŏnglo ôh, kư̆m đei bơngai khan et sik na đei bôl buăl, đei mơ’nah dơ̆ng khan et sik ‘mơ̆i na gơh jang sa, na gơh đei tơchĕng tơdrong trŏ ‘lơ̆ng, dah mă arih hiôk ‘lơ̆ng hăm bôl buăl… na đei lơ bơngai puh pơ̆k huŏng lăm tơdrong et tơdrô, ‘bier pơhlŭ lu sư păng lĕch đơ̆ng et tơdrô noh jing suai kư̆ kă pơrăm kơdih akâu đĕch, nhen pă trŏ kơ kon bơngai. Nơ̆r Kră Yang khan: “Bơ̆n ‘nĕ kơ et sik suai hli kơ bơ̆n jing bơngai kư̆ kă; bơ̆n athei ăn kơ Yang Bơhngol ‘Lơ̆ng pơgơ̆r bơ̆n lăm tôm tơdrong.” (Êphêsô 5:18). Rim ‘nu bơngai lui athei arih tơ’bôh tơdrong ‘lơ̆ng Kră Yang, tơplih kơ suai kơ sik, ‘bier, na yua iŏk jơ năr pơhrăm, bơ̆jang păng arih ‘lơ̆ng. Apinh Yang Bơhngol ‘Lơ̆ng chông anhăk păng ră roi tơdrong ‘mêm Kră Yang păng tơdrong dŏng pơklaih kon bơngai. ‘Nĕ kơ et sik suai, athei arih trŏ kơ bơngai lui.
Kơkuh kơ Ih Kră Yang, Ih đei bơtho kơ inh băt lĕch đơ̆ng suai kơ sik păng arih tơ’bôh tơdrong ‘lơ̆ng Ih hăm nơ̆r pơma, tơdrong pơm tơ’bôh lăm rim năr. Krao khan yua anăn Kră Yang Yêsu Krist, Amen.
Lu bơ̆n hăm weh ataih đơ̆ng tơdrô, ‘bier păng gơnang kơ Yang Bơhngol ‘Lơ̆ng tơ’bôh tơdrong arih bơngai lui kơ bơngai nai ưh?
Đŏk Sơ̆p Hla bơar ‘Bok Kei-Dei lăm pêng sơnăm: II Lu Pơtao 20
Kênh Youtube BHKTHN:
