Khiavdim 34:18-20
Nqe cim:
“Nco ntsoov ua kevcai noj ncuav tsis xyaw keeb. Ib yam li kuv tau samhwm rau nej, lub hli Anpis nej cia li ua kevcai noj ncuav tsis xyaw keeb xya hnub, rau qhov lub hli ntawd yog lub uas nej tawm nram tebchaws Iziv los” (Khiavdim 34:18).
Lus nug rau sawvdaws xav:
- Tus Tswv qhia cov Yixalayees yuav tsum ua ob yam twg?
- Vim licas tej tub hlob thiab tej tsiaj thawj tug menyuam uas yog tus txiv puavleej yog tus Tswv tug?
- Cov Yixalayees fij tej tub hlob thiab tej tsiaj thawj tug menyuam uas yog tus txiv licas?
- Zaj kawm no qhuab ntuas peb txog yam dabtsi?
Tus Tswv qhia cov Yixalayees yuav tsum ua ob yam. Thib ib, yuav tsum ua kevcai noj ncuav tsis xyaw keeb (nqe 18). Ntawm no yog ib rooj kevcai tseemceeb vim tau tus Tswv hais kom Mauxes qhia lawv yuav tsum ua thaum yuav tawm hauv tebchaws Iziv los (Khiavdim 12:15-20), thiab Nws rov hais ntau zaug txog qhov no (Khiavdim 13:3-10; 23:15). Ncaj rau lub hli Anpis, lawv yuav tsum noj ncuav tsis xyaw keeb xya hnub ua kevcai nco txog zaj uas cov Yixalayees khiav tawm nram tebchaws Iziv uas yog qhov chaw ua cev qhev los. Hnub ntawd, tus Tswv haivneeg maj nroos sawv kev tawm mus, tsis muaj sijhawm muab keeb xyaw hmoov nplej thiab tos kom cov hmoov nplej ntawd sawv. Ntawm no kuj yog ib rooj pehawm tus Tswv, thiab yog sijhawm uas cov laus piav qhia rau tej menyuam txog zaj uas tus Tswv cawm cov Yixalayees dim ntawm lubneej ua cev qhev nram tebchaws Iziv los; qhia cov menyuam ua neej hwm tus Tswv, ua raws tus Tswv tej kevcai thiab pehawm tus Tswv kom tsimnyog (Khiavdim 13:6-10).
Thib ob, lawv yuav tsum fij tej tub hlob thiab tej tsiaj thawj tug menyuam uas yog tus txiv rau tus Tswv (nqe 19; Khiavdim 13:11-13). Qhov no kuj yog ua nco txog hmo uas tus Tswv haivneeg tawm nram tebchaws Iziv los. Thaum tus Tswv tso tej sub tawg sub ntsha tim kaum los, cov Iziv txhua tus tub hlob thiab tej tsiaj thawj tug menyuam uas yog tus txiv raug tuag tiamsis cov Yixalayees tej tub hlob thiab tej tsiaj thawj tug menyuam uas yog tus txiv tsis raug teebmeem dabtsi. Nyob hmo ntawd, Falaus yuam kom tus Tswv haivneeg maj nroos khiav tawm hauv tebchaws Iziv mus.
Tus Tswv haivneeg muab tej tsiaj thawj tug menyuam uas yog tus txiv tua hlawv fij rau tus Tswv. Tus Tswv pub cai txhiv qee yam tsiaj txojsia; ib tug menyuam yaj lossis tshis txhiv tau ib tug menyuam neesluav uas yog thawj tug. Hais txog tej menyuam tub hlob, tus Tswv haivneeg yuav tsum mus cuag tus povthawj, siv tsib daim nyiaj raws li nomtswv txojcai kom tseg los txhiv (nqe 20; Teev Npe 18:15-17). Dua li ntawd, yog paub nco tus Tswv txiajntsig thiab hwm tus Tswv, ces thaum mus cuag tus Tswv txhob mus tes dawb tes npliag (nqe 20c).
Ib lub tebchaws sawv taus thaum cov neeg hauv tebchaws muaj nomtswv kav thiab muaj ciam dej ciam av. Vajtswv yog tus Tswv ntawm keebkwm, Nws xav kom Nws haivneeg nco ntsoov lawv li keebkwm uas tshwjxeeb kawg nkaus. Cov Yixalayees tau tawm hauv tebchaws Iziv los yog ib hmo uas tshwjxeeb heev, lawv tau dhau los ua ib lub tebchaws uas muaj Vajtswv ua tus tswjkav, saibxyuas thiab pub txoj kevcai rau lawv. Dhau ntawm lawv, vim hlub tshua noob neej, Vajtswv Leej Tub tau nqis los ntiajteb, muab Nws txojsia los txhiv tibneeg tej kev txhaum. Thaum lees yuav Tswv Yexus ua tus Tswv kav yus lubneej, peb tau lub meejmom tshiab yog ua tus Tswv haivneeg, yog Nws tug. Txhua tus ntseeg puavleej muaj ib zaj keebkwm hais txog tus kheej kev ntsib tus Tswv. Ua Vajtswv tsaug.
Thov Vajtswv,
Tswv Yexus, nyuam yaus ua Koj tsaug vim Koj cov ntshav txhiv nyuam yaus tej kev txhaum! Nyuam yaus lubneej yog Koj tug. Thov pab nyuam yaus muab siab rau ntseeg, ua neej haum Koj siab, qhia rau lwm tus paub txog Koj. Amees.
Peb pauj tus Tswv txojkev hlub licas thiab peb lubneej ntsib tus Tswv zoo licas?
Nyeem Vajluskub hauv peb lub xyoo: Daniyees 1:1-2:16
Kênh Youtube BHKTHN:
