Klei Aê Diê Blŭ: Klei Kbiă 34:18-20
Êlan kliăng: “Brei ih hdơr pioh Klei Knăm Kpŭng Amâo Mâo Kpei. Tui si kâo mtă leh kơ ih, brei ih ƀơ̆ng kpŭng amâo mâo kpei êjai kjuh hruê ti yan bi kčah leh hlăm mlan Abib; kyuadah hlăm mlan Abib ih kbiă mơ̆ng čar Êjip” (Klei Kbiă 34:18).
Klei êmuh ksiêm mĭn: Ya dua klei Aê Diê bi hriăm phung ƀuôn sang Israel brei ngă? Ya ngă phung anak êkei tal êlâo leh anăn hlô mnơ̆ng tal êlâo jing dŏ Aê Diê? Si mnuih Israel myơr hlô mnơ̆ng tal êlâo leh anăn bi tui anak êkei tal êlâo? Si klei hriăm anei mñă kơ drei?
Aê Diê bi hriăm phung ƀuôn sang Israel ngă dua klei. Tal sa, brei djă pioh knăm ƀơ̆ng kpŭng amâo kpei (êlan 18). Anei jing sa knăm yuôm bhăn kyua Aê Diê mtă kơ Y-Môis êlâo kơ kbiă mơ̆ng čar Êjip (Klei Kbiă 12:15-20), leh anăn Ñu mñă wĭt lu blư̆ (Klei Kbiă 13:3-10; 23:15). Knăm gưl mlan mdiê ƀlĕ, brei diñu ƀơ̆ng kpŭng amâo kpei čiăng hdơr kơ klei hƀuê ênuk phung ƀuôn sang Aê Diê ruah mâo Aê Diê đru kbiă mơ̆ng čar Êjip, sang hlŭn. Hlăm dŭm hruê anăn, phung ƀuôn sang Ñu ruăt đuĕ, amâo hmao dưm kpei hlăm kpŭng ôh leh anăn dôk guôn kpŭng blang. Anei ăt jing knăm kkuh mpŭ kơ Yêhôwa Aê Diê, jing gưl lŏ yăl dliê kơ anak čô hmư̆ klei Aê Diê bi mtlaih leh phung ƀuôn sang Israel tlaih mơ̆ng klei jing hlŭn ti Êjip; bi hriăm anak čô huĭ mpŭ, djă pioh klei bhiăn leh anăn kkuh mpŭ kơ Aê Diê năng djŏ (Klei Kbiă 13:6-10).
Tal dua, brei diñu myơr anak êkei tal êlâo hŏng djăp hlô mnơ̆ng tal êlâo kơ Yêhôwa Aê Diê (êlan 19, Klei Kbiă 13:11-13). Bruă anei ăt ênưih hdơr kơ mlam phung ƀuôn sang Aê Diê ruah kbiă mơ̆ng čar Êjip. Hlăk Aê Diê tuh klei truh tal pluh, grăp čô anak êkei leh anăn hlô mnơ̆ng tal êlâo mơ̆ng mnuih Êjip djiê sơăi ƀiădah anak êkei leh anăn hlô mnơ̆ng tal êlâo mơ̆ng phung ƀuôn sang ruah êđăp ênang. Hlăm mlam anăn, Pharaôn mtrŭt phung ƀuôn sang Ñu kbiă mơ̆ng Êjip.
Phung ƀuôn sang Aê Diê myơr hlô mnơ̆ng tal êlâo kơ Aê Diê msĕ si mnơ̆ng myơr čuh. Aê Diê brei bi tui klei hdĭp dŭm mta hlô mnơ̆ng, sa drei biăp amâodah bê bi tui klei hdĭp kơ sa drei aseh dliê mđai tal êlâo. Hŏng phung anak êkei tal êlâo snăn phung ƀuôn sang Aê Diê brei lŏ bi tui mơ̆ng khua ngă yang hŏng ênoh êma sêkel prăk tui si sêkel hlăm adŭ doh jăk (êlan 20; Klei Yap 18:15-17). Êngao anăn, čiăng bi êdah ai tiê hdơr knga leh anăn huĭ mpŭ kơ Aê Diê, amâo mâo ôh hlei pô nao ti anăp Aê Diê hŏng kngan mang (êlan 20c).
Sa ala čar dưi mkŏ mjing tơdah djuê ana mâo knŭk kna hjăn leh anăn krĭng lăn ala. Aê Diê jing Aê Diê mơ̆ng hƀuê ênuk, Ñu čiăng kơ phung ƀuôn sang Aê Diê ruah mpŭ kơ hƀuê ênuk yuôm bhăn mơ̆ng diñu. Phung ƀuôn sang Israel kbiă leh mơ̆ng čar Êjip hlăm sa mlam năng hdơr snăk, sa ala čar mâo klei myang kiă kriê dưi mkŏ mjing kyua Aê Diê gĭt gai leh anăn brei klei bhiăn kơ diñu. Leh anăn, kyua klei khăp kơ anak mnuih anăn Anak Aê Diê hriê leh ti lăn ala, săn asei čiăng bi tui anak mnuih mơ̆ng klei soh. Tơdah đăo kơ Khua Yang Yêsu jing Khua Yang kơ klei hdĭp pô, drei dưi jing phung ƀuôn sang Khua Yang leh anăn jing dŏ Ñu. Grăp čô phung đăo kơ Krist mâo sa klei yăl dliê hƀuê ênuk kơ klei bi tuôm yuôm bhăn pô hŏng Khua Yang. Bi mni kơ Aê Diê.
Si drei wĭt lač kơ klei khăp kơ Khua Yang leh anăn si klei yăl dliê kơ klei hdĭp pô?
Ơ Khua Yang, kâo bi mni kơ Khua Yang Yêsu tuh leh êrah čiăng bi tui kâo! Klei hdĭp kâo jing dŏ Ih. Akâo kơ Ih đru kâo sĭt suôr kkuh mpŭ kơ Ih, hdĭp bi mơak kơ Ih, jing dĭng ktang kơ Ih ti krah lăn ala čiăng kơ lu mnuih thâo krah Ih.
Dlăng Klei Aê Diê Blŭ hlăm tlâo thŭn: Y-Đaniel 1:1-2:16
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
