Nkauj Quaj Ntsuag 2:1-7
Nqe cim:
“…Yog lawm! Kuv tabtom saib ntsoov kom muaj raws li kuv tej lus” (Yelemis 1:12b)
Lus nug rau sawvdaws xav:
– Tebchaws Yixalayees thiab Vajtswv Lub Tuamtsev tab tom zoo licas?
– Tus Tswv haivneeg xav licas rau tus Tswv?
– Yuav ua licas peb thiaj nkag siab tus Tswv kev hlub thaum raug qhuab ntuas?
Thaum lub nroog dawbhuv raug puastsuaj nphob xuav cia, tus Tswv haivneeg zeem paub hais tias ntawd yog Vajtswv kev chim rau lawv. Tus Cev lus Yelemis hais mus hais los ntau zaug hais tias nyob hauv tus Tswv txojkev chim, tus Tswv tau “muab Xi-oos lub koob meej uas nto moo lug rhuav puastsuaj tas”, “rhuav txhua lub zos hauv tebchaws Yudas”, “muab tej chaw fajxwm uas tiv thaiv lub tebchaws rhuav povtseg… ua rau lub tebchaws thiab tej thawjcoj kom raug kev txajmuag”, “tsis pab thaum cov yeebncuab tuaj tua”, thiab “muab txhua tus… tua povtseg huv tibsi”, … Nyob hauv lub tsamthawj ntxhov siab zoo li ntawd, ntau zaug Tus Cevlus Yelemis thiab tus Tswv haivneeg yuav xav hais tias, tus Tswv tawmtsam Nws haivneeg thiab cuag li Nws tsis hlub lawv, tsis nco txog Nws tej lus cogtseg rau lawv cov yawgkoob lawm. Tus Cevlus Yelemis hais tias: “Nws taw nws cov xub hneevnti rau peb ib yam li taw rau tej yeebncuab” (nqe 4), “Tus Tswv rhuav cov Yixalayees ib yam li nws rhuav tej yeebncuab ntag” (nqe 5). Cov Yixalayees raug poob rau txojkev swb txajmuag, zoo li tej huab “khwb nkaus lub roob Xi-oos tsaus nti… Nws muab Xi-oos lub koob meej uas nto moo lug rhuav puastsuaj tas” (nqe 1), “Nws thiaj ua rau cov Yixalayees lub zog ntaug; Nws tsis pab thaum cov yeebncuab tuaj tua” (nqe 3).
Thaum muab peb tus kheej tso rau hauv tus Tswv haivneeg lub tsamthawj, peb thiaj yuav nkag siab Tus Cevlus Yelemis thiab tus Tswv haivneeg tej kev xav. Thaum ub lawv yog ib haivneeg muaj zog thiab muaj tebchaws nto moo lug, tiamsis nimno lawv “tus kub” raug tus Tswv lov ntho lawm, lawv lub zog ntaug, tsis muaj hwjchim tabmeeg lwm haivneeg. Tsis tas li ntawd xwb, tus Tswv sab tes xis, piv txog tus Tswv lub hwjchim thiab lub zog tiv thaiv Nws haivneeg, tiamsis nimno nkaum rov qab lawm, vim li ntawd, “Tus Tswv ua kom Xi-oos tsis txhob nco qab txog hnub dawbhuv thiab Hnub Xanpataus” (nqe 6), lub thaj, lub Tuamtsev, tej ntsayeej puavleej raug tus Tswv muab cob rau yeebncuab tes huv tibsi.
Puas yog tus Tswv twb hnov qab Nws tej lus cogtseg thiab tsis hlub Nws haivneeg lawm? Peb rov nco txog lub sijhawm tus Tswv nqua hu Yelemis los ua tus Tswv haujlwm. Tus Tswv pub rau Yelemis pom ib zaj yogtoog yog tsob txiv duaj, tus Tswv hais tias: “Kuv tabtom saib ntsoov kom muaj raws li kuv tej lus” (Yelemis 1:11-12). Tus Tswv yeej tsis hnov qab, tiamsis vim Vajtswv haiv neeg tej kev txhaum, lawv lub siab tawv thiab kev tawmtsam Vajtswv, Nws thiaj siv tus nplawm kev hlub los qhuab ntuas lawv, Vajtswv tso lub Tuamtsev uas yog “Nws lub rooj tiag taw” povtseg.
Thaum lub neej ntsib teebmeem thiab ntsib kev txomnyem, yoojyim ua rau peb xav hais tias tus Tswv twb hnov qab Nws tej lus cogtseg lawm. Tiamsis thaum qhib lub qhov muag kev ntseeg ntsia mus rau qhov deb, peb yuav pom hais tias tus Tswv txojkev hlub peb yeej tsis pauv hloov li. “Rau qhov tus Tswv qhuab ntuas tus uas nws hlub, thiab nws nplawm txhua tus tub uas nws txais yuav” (Henplais 12:6). Thaum ntsib teebmeem thiab kev txomnyem, yam peb yuav tau ua tsis yog cem yws Vajtswv, tiamsis yuav tsum tig saib tus kheej saib puas tau ua txhaum rau tus Tswv thiab lwm tus lawm, kom paub lees txim.
Thov Vajtswv:
Vajtswv tus uas ncajncees! Thov ua Koj tsaug vim Koj txojkev hlub nyuam yaus tsis hloov. Thov pab nyuam yaus paub tig saib Koj, nyuam yaus thiaj yuav muaj kev cia siab, thiab paub lees kev txhaum kom tau zamtxim. Nyuam yaus tuav Cawmseej Tswv Yexus lub npe thov, Amees.
Ib tsoom cov mloog uas hmov thiab tshua,
Peb pheej ua licas thaum lubneej ntsib teebmeem thiab kev txomnyem?
Nyeem Vajluskub hauv peb lub xyoos: Henplais 8
Kênh Youtube BHKTHN:
