Klei Aê Diê Blŭ: Klei Čŏk Hia 2:1-7
Êlan kliăng: “… Djŏ leh klei ih ƀuh, kyuadah Kâo dôk răng kriê klei Kâo blŭ čiăng bi sĭt gơ̆.”(Y-Yêrêmi 1:12b)
Klei êmuh ksiêm mĭn: Si boh klei lăn čar Israel leh anăn Sang kkuh mpŭ kơ Aê Diê dôk găn? Si phung ƀuôn sang Aê Diê bi mĭn kơ Ñu? Si ngă čiăng drei thâo săng klei khăp Aê Diê hlăm klei ƀuah mkra?
Ti anăp klei ƀuôn prŏng dlưh rai, phung ƀuôn sang Aê Diê thâo anei jing klei Aê Diê ngêñ. Khua pô hưn êlâo Y-Yêrêmi lu blư̆ mñă hlăm klei ngêñ, Ñu “dlăm leh klei guh kơang Israel”, “bi rai leh amâo mâo klei pap ôh jih jang anôk dôk phung Yakôp”, “dlăm ti lăn leh anăn bi hêñ ƀuôn ala mtao mbĭt hŏng phung khua kiă kriê gơ̆”, “Ñu lŏ hrui leh mơ̆ng digơ̆ kngan hnuă Ñu”, “bi mdjiê leh”,… Hlăm boh klei pap mñai anăn, lu blư̆ Khua pô hưn êlâo Y-Yêrêmi leh anăn phung ƀuôn sang Aê Diê bi mĭn Yêhôwa Aê Diê ngă jhat kơ phung ƀuôn sang Ñu msĕ si Ñu amâo lŏ khăp kơ digơ̆ ôh, amâo lŏ hdơr ôh klei bi mguôp ngă leh hŏng phung aê diñu. Ñu lač “Ñu ƀêč leh hna Ñu msĕ si sa čô roh, hŏng kngan hnuă Ñu, Ñu ngă msĕ si roh” (êlan 4), “Yêhôwa jing leh msĕ si sa čô roh, Ñu bi rai leh Israel” (êlan 5). Phung ƀuôn sang lĕ hlăm klei hêñ luč klei dưi, “Yêhôwa guôm anak mniê ƀuôn Siôn hŏng biut knam klei ñu ngêñ!…Ñu dlăm leh klei guh kơang Israel mơ̆ng adiê truh ti lăn ala” (êlan 1), Ñu bi êbuh leh hŏng klei ngêñ hlơr jih jang klei ktang Israel; Ñu lŏ hrui leh mơ̆ng digơ̆ kngan hnuă Ñu ti anăp phung roh (êlan 3).
Dưm pô hlăm boh klei phung ƀuôn sang Aê Diê hlăk anăn, drei srăng pap kơ Khua pô hưn êlâo Y-Yêrêmi leh anăn phung ƀuôn sang Ñu. Mơ̆ng sa djuê ana ktang leh anăn mâo klei dưi, ară anei Yêhôwa koh leh “ki” diñu, luč jih ai ktang, klei dưi ti krah phung ƀuôn sang. Êngao anăn, kngan hnuă klei kpă ênô Yêhôwa, lač kơ klei myang leh anăn klei ktang Aê Diê čiăng răng mgang phung ƀuôn sang Ñu, ară anei hrui mă leh, kyua anăn “Yêhôwa brei leh ƀuôn Siôn wơr bĭt
klei huă mnăm leh anăn hruê sabat bi kčah leh” (êlan 6), knưl, Sang yang, mnư̆ mnang, sang mtao Yêhôwa jao jih hlăm kngan phung roh.
Djŏ mơ̆ Yêhôwa wơr leh klei bi mguôp Ñu leh anăn amâo lŏ khăp ôh kơ phung ƀuôn sang Ñu? Brei drei hdơr tơdah iêô Y-Yêrêmi mŭt ngă bruă, sa hlăm klei bi êdah Aê Diê brei kơ ñu ƀuh sa ƀĕ adhan ana boh knia, hŏng klei blŭ “…kâo dôk răng kriê klei kâo blŭ čiăng bi sĭt gơ̆”(Y-Yêrêmi 1:11-12). Aê Diê amâo wơr ôh, ƀiădah kyua klei soh, ai tiê khăng leh anăn klei phung ƀuôn sang bi kdơ̆ng hŏng Aê Diê anăn Ñu yua leh hnuăt giê klei khăp čiăng ƀuah mkra, Ñu lui Sang yang, “lui leh adŭ doh jăk Ñu”.
Hdĭp hlăm boh klei rŭng răng, dleh dlan ênưih ngă kơ drei bi mĭn Aê Diê wơr leh klei Ñu ƀuăn, ƀiădah tơdah mblang ală klei đăo dlăng kbưi hĭn, drei srăng ƀuh klei Aê Diê khăp kơ drei amâo mâo mlih ôh. “Kyuadah Khua Yang mkra mjuăt hlei pô Ñu khăp, leh anăn čăm hŏng giê grăp čô anak Ñu jum” (Hêbrơ 12:6). Grăp blư̆ tuôm hŏng klei truh, dleh dlan, klei brei ngă amâo djŏ jing ƀuah ăl, blŭ duñ duñ ôh ƀiădah brei lŏ ksiêm dlăng ya klei ngă soh hŏng Khua Yang, hŏng pô mkăn čiăng kmhal.
Si knuih drei khăng mâo tơdah tuôm hŏng klei rŭng răng, dleh dlan?
Wah lač: Ơ Aê Diê Sĭt Suôr! Bi mni kơ Ih kyua klei khăp Ih hŏng kâo amâo bi mlih ôh. Akâo kơ Ih đru kâo dlăng nanao kơ Ih čiăng hdĭp hlăm klei čang hmăng, leh anăn hmao kmhal klei soh čiăng mâo klei pap brei, bi mrâo. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Hêbrơ 8
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
