Yelemis 46:25-28
Nqe cim:
“Kuv yuav los cuag nej thiab cawm nej. Kuv yuav rhuav txhua haivneeg uas kuv ntiab nej mus nrog nyob kom puastsuaj, tiamsis kuv yuav tsis cia kom nej puastsuaj. Kuv yuav rau txim rau nej, tiamsis thaum kuv rau txim rau nej, kuv yuav ua ncaj. Kuv yog tus Tswv uas hais li ntawd” (Yelemis 46:28).
Lus nug rau sawvdaws xav:
– Tus Tswv hais li cas rau cov Yudais?
– Vim licas cov Yudais txais tau tej lus cogtseg zoo li ntawd?
– Peb kawm tau dabtsi txog tus Tswv lub siab zoo?
Nqe 27 thiab 28 rov hais ib yam nkaus li nyob hauv Yelemis 30:10-11, hais txog ib qhov tseeb uas loj, yog ib lo lus tabpov ntawm Tus Uas Muaj Kev Hlub, Ua Zoo thiab Ncajncees rau Nws haivneeg. Tomqab uas cevlus txog kev txiav txim rau vajntxwv thiab cov Iziv, tus Tswv hais rau cov Yudais hais tias “nej tsis txhob ntshai”, “nej tsis txhob txhawj” (nqe 27), nrog rau tej lus cogtseg hais tias lawv yuav tau cawmdim hauv lub tebchaws uas deb heev los, tagnrho cov Yudas nyob qabteb thiab cov Yixalayees qaumteb yuav tau dim kev ua cev qhev, tau rov los tsev thiab nyob kaj siab lug, yuav tsis muaj leejtwg ua rau lawv txhawj ntshai lawm. Tus Tswv haivneeg txais tau tej lus cogtseg zoo no tsis yog vim lawv zoo dua cov Iziv, tiamsis vim tib qhov xwb uas yog lawv muaj tus Tswv “nrog nraim” (nqe 28 – PTT).
Qhov no kuj yog yam uas tus sau phau Ntawv Nkauj tau ntsib, thaum muaj tus Tswv nyob nrog nraim, nws hais tias: “…Txawm yog muaj neeg ib txhiab leej tuag nyob ntawm koj ib sab, thiab muaj ib vam leej tuag ibncig koj los yuav tsis muaj xwm dabtsi raug koj li” (Ntawv Nkauj 91:7). Txawm li ntawd los tsis tau txhais hais tias txhua yam kev txhaum uas lawv ua rau tus Tswv puavleej tau zam txim, tsis nco txog ntxiv lawm, tiamsis tus Tswv hais rau lawv hais tias: “Kuv yuav rhuav txhua haivneeg uas kuv ntiab nej mus nrog nyob kom puastsuaj, tiamsis kuv yuav tsis cia kom nej puastsuaj. Kuv yuav rau txim rau nej, tiamsis thaum kuv rau txim rau nej, kuv yuav ua ncaj.” Tus Tswv haivneeg yuav tsis raug puastsuaj tiamsis lawv yuav tsum raug txim vim tej kev txhaum uas lawv ua, dua li ntawd tej haivneeg uas tau ntes tus Tswv haivneeg mus ua cev qhev hauv lawv lub tebchaws ces tus Tswv kuj rau txim rau lawv kom tsimnyog. Dhau qhov ntawd, peb kawm paub txog Tus Tswv txojkev hlub loj kawg nkaus uas muab pub dawb rau Nws haivneeg. Tus Uas Ncaj Ncees, Dawbhuv, yuav tsis saib ib tug neeg muaj txim ua neeg tsis muaj txim (Khiavdim 34:7, Teev Npe 14:18), tiamsis Nws txojkev hlub, kev zoo qhia tshwm txojkoob hmoov thiab nplooj siab hlub rau Nws haivneeg.
Nimno muaj coob leej saib tsis taus Vajtswv nplooj siab ua zoo, vim lawv ua txhaum ntau zaug tiamsis tsis pom tus Tswv rau txim. Tiamsis, tus Tswv cov menyuam yuav tsum ceevfaj vim Vajtswv Txojlus qhia meej hais tias lub homphiaj tus Tswv tseem hlub, tseem ua siab ntev tsis tau rau txim vim Nws xav coj peb los lees kev txhaum, yog tsis ua li ntawd ces muaj ib hnub tsis deb, thaum tus Tswv kev txiav txim ncajncees tshwmsim, ces peb yuav raug nyob hauv Nws txojkev chim thiab raug txiav txim xwb (Loos 2:4-5).
Thov Vajtswv
Vajtswv tus uas muaj Kev Hlub, Ua Zoo, Ncaj Ncees! Thov ua Koj tsaug vim txhua hnub ua neej nyob hauv ntiajteb nyuam yaus tau txais Koj txojkev hlub. Thov pab nyuam yaus nco ntsoov hais tias Koj tabtom nrog nraim nyuam yaus kom txhua hnub nyuam yaus ua haum Koj siab. Amees.
Peb puas tau zeem paub hais tias tus Tswv txojkev hlub muaj loj kawg nkaus pub rau peb lub neej lawm tau?
Nyeem Vajluskub hauv peb lub xyoos: Lukas 22:39-65
Kênh Youtube BHKTHN:
