Nkauj Quaj Ntsuag 3:23-25
Nqe cim:
“Txojkev hlub ntawd muaj txhua hnub, ib yam li lub hnub niaj tagkis tawm tuaj.” (Nkauj Quaj Ntsuag 3:23)
Peb nyeem ntxiv Phau Txhais Tshiab HMOWSV
“Niaj tagkis rov muaj dua tshiab, Koj txojkev ua ncaj uas tso siab tau yeej loj kawg.”
Lus nug rau sawvdaws xav:
– Tus Cevlus Yelemis nrhiav pom kev cia siab rau tus Tswv thaum xav txog yam dabtsi?
– Lub hauvpaus ntawm nws thiab nws haivneeg txojkev cia siab yog dabtsi?
– Tus Tswv txojkev ua ncaj tsis paub kawg pab yam dabtsi rau peb kev ua neej?
Yog ib txojkev hloov uas sai heev, txij ntawm ib tug neeg muaj kev lwj siab, tas kev cia siab, dhau los ua tus neeg muaj kev cia siab, kaj siab thaum nrhiav tau hauvpaus kev cia siab muaj zog sis ntawm tus Tswv. Tej lus ntsaj lus xyu ploj tas lawm, hloov pauv ces yog tus Cevlus Yelemis tej kev zoo siab thiab tej lus qhuas tus Tswv. Nws tus ntsujplig hu nkauj hauv kev zoo siab hais tias, “txojkev hlub ntawd muaj txhua hnub, ib yam li lub hnub niaj tagkis tawm tuaj” (nqe 23). Tus sau tsis niaj hnub ua neej hauv kev nyuaj siab, iab siab, qaug zog, tiamsis thaum tus kheej thiab lub tebchaws nyob hauv kev txomnyem kawg nkaus, nws ntsia pom thiab nco txog tus Tswv txojkev hlub ruaj khov mus ibtxhis pub rau tus uas vamkhom Nws (nqe 25). Los ntawm qhov ntawd, nws nrhiav pom hauvpaus kev cia siab ua rau muaj kev kaj siab, cia siab ntsoov tias yuav muaj ib hnub kaj nrig rau nws haivneeg.
Tus Cevlus Yelemis qhuas txog tus Tswv txojkev ua ncaj loj kawg nkaus uas tsis muaj nrim, ntawd yog yam uas nws kawm paub thiab tau tus Tswv ua tabpov thaum nqua hu nws los ua haujlwm: “Kuv tabtom saib ntsoov kom muaj raws li kuv tej lus” (Yelemis 1:12). Tus Cevlus Yelemis qhia tshwm txojkev ntseeg ruaj khov rau Vajtswv txojkev ua ncaj, tus Tswv twb ceebtoom txog tej teebmeem yuav los raug cov uas ntxeev siab, tsis mloog Nws lus, tej ntawd twb tshwm muaj rau tus Cevlus Yelemis haivneeg lawm; ces tej lus cogtseg txog kev rov txhim kho pub rau tus Tswv haivneeg kuj yuav muaj tiav thaum lawv tso kev txhaum tseg thiab tig rov los cuag Nws. Ntawd txojkev cia siab loj uas tus Cevlus Yelemis txais tau, vim li ntawd txhua tagkis nws tsis nyuaj siab ntxiv lawm, tiamsis nws zoo siab thaum pom tus Tswv txojkev hlub tseem muaj npluamias, thiab tus Tswv txojkev ua ncaj loj kawg nkaus. Ntawd yog lub plag kev cia siab rau tus Cevlus Yelemis thiab nws haivneeg. Nws hais tias: “Kuv tsuas muaj tus Tswv tib leeg xwb, yog li ntawd kuv thiaj cia siab rau nws” (nqe 24).
Txawm yog peb tabtom ntsib tej kev txomnyem twg hauv lubneej, lossis pom txhua yam tsaus ntuj nti ua rau peb tas kev cia siab, los thov tus Tswv pab peb txhob ntsia mus rau tej teebmeem ntawd tiamsis cia li nco txog tus Tswv txojkev hlub tsis pauv hloov thiab Nws txojkev ua ncaj uas loj kawg nkaus, kom peb muaj kev vamkhom tus Tswv thiab muaj kev kaj siab txhua tagkis. Tus Tswv uas ua ncaj yeej muaj homphiaj zoo tshajplaws rau Nws cov menyuam.
Thov Vajtswv,
Vajtswv tus uas ncaj ncees, nyuam yaus ua Koj tsaug vim Koj txojkev hlub nyuam yaus ruaj khov tsis kawg. Thov kom nyuam yaus niaj hnub cia siab ntsoov rau Koj kom tau kev nplig siab thiab kev pab nyob hauv txhua lub tsamthawj ntawm lubneej. Nyuam yaus tuav Yexus Khetos lub npe thov, Amees.
Thaum ntsib tej teebmeem hauv lubneej, peb pheej ua dabtsi kom hla dhau?
Nyeem Vajluskub hauv peb lub xyoos: II Kevcai 27
Kênh Youtube BHKTHN:
