Klei Aê Diê Blŭ: Klei Čŏk Hia 3:23-30
Êlan kliăng: “Jih klei anăn jing mrâo grăp aguah; klei sĭt suôr Ih jing prŏng snăk.” (Klei Čŏk Hia 3:23)
Klei êmuh ksiêm mĭn: Khua pô hưn êlâo Y-Yêrêmi lŏ duah phŭn klei đăo knang hlăm Aê Diê tơdah bi mĭn kơ ya klei? Ya tur kơ djăp mta klei ñu leh anăn djuê ana ñu đăo knang? Si klei sĭt suôr Aê Diê prŏng prĭn đru kơ drei hlăm klei hdĭp?
Sa knhuang bi mlih pral snăk, êdu êun mơ̆ng sa čô mâo ai tiê ênguôt hnĭng êdimima, kƀah phŭn đăo knang, jing bŏ hŏng čang hmăng, mơak mñai tơdah ƀuh phŭn đăo knang kjăp snăk jing hlăm Yêhôwa. Klei ênguôt hnĭng luč jih, hrô kơ anăn jing klei hơ̆k mơak leh anăn bi mni kơ Aê Diê mơ̆ng Khua pô hưn êlâo Y-Yêrêmi. Mngăt ñu mmuñ hlăm klei hơ̆k mơak, “Jih klei anăn jing mrâo grăp aguah; klei sĭt suôr Ih jing prŏng snăk.” (êlan 23). Pô čih amâo hdĭp nanao hŏng klei amâo tŭ dưn ôh, êgah êmăn, ênguôt phĭ ƀiădah hlăk êjai dôk hlăm boh klei kjham hĭn hlăm klei hdĭp, lăn čar, ñu ƀuh leh anăn lŏ hdơr klei jăk leh anăn klei pap Yêhôwa kjăp lă lar kơ hlei pô đăo knang leh anăn duah Ñu (êlan 25). Mơ̆ng anăn, ñu dưi duah ƀuh phŭn đăo knang čiăng ai mĭn lŏ dơ̆ng mơak mñai, čang hmăng kơ hruê mgi jăk mơak kơ djuê ana pô.
Khua pô hưn êlâo Y-Yêrêmi bi mni kơ klei sĭt suôr yuôm bhăn, amâo mâo pô mđơr mơ̆ng Aê Diê, anei jing klei ñu tuôm hriăm leh leh anăn mâo Aê Diê bi mklă hlăm dŭm hruê tal êlâo hlăk Aê Diê iêô ñu mă bruă “…Djŏ leh klei ih ƀuh, kyuadah kâo dôk răng kriê klei kâo blŭ čiăng bi sĭt gơ̆” (Y-Yêrêmi 1:12). Ñu bi êdah ai tiê đaŏ knang kjăp hlăm klei sĭt suôr Aê Diê, Ñu hưn leh êlâo klei bi kmhal kơ klei pô bi kdơ̆ng, amâo gưt asăp Ñu, klei anăn mâo leh hŏng djuê ana ñu, snăn klă sĭt djăp klei ƀuăn kơ klei bi mrâo Aê Diê brei kơ phung ƀuôn sang Ñu klă sĭt srăng dưi ngă tơdah diñu kmhal lŏ wĭt hŏng Aê Diê. Anei jing klei čang hmăng prŏng prĭn ñu dưi mâo, kyua anăn grăp aguah ñu amâo lŏ tŭ klei knap mñai ôh ƀiădah hơ̆k mơak ƀuh klei pap Aê Diê mrâo nanao, klei khăp Aê Diê êbeh dlai nanao, mbĭt anăn klei sĭt suôr Aê Diê prŏng prĭn snăk. Anăn jing tur kơ djăp klei ñu leh anăn djuê ana ñu đăo knang. Ñu blŭ hŏng klei ktang, “…Yêhôwa jing ngăn dưn kơ kâo, snăn kâo srăng čang hmăng kơ Ñu”(êlan 24).
Wăt tơdah drei dôk tlă anăp hŏng djăp boh klei dleh dlan hlăm klei hdĭp anei, amâodah ƀuh djăp mta klei riêng gah mâo wăt klei bi mguôp jing jhat sơăi ngă kơ drei luč jih klei čang hmăng, akâo kơ Khua Yang đru drei đăm dlăng hlăm klei truh ôh ƀiădah lŏ hdơr kơ klei khăp amâo bi mlih Aê Diê khăp leh kơ drei hŏng klei sĭt suôr Ñu prŏng snăk, čiăng klei čang hmăng drei dưm hlăm Aê Diê, leh anăn grăp aguah srăng mrâo mrang nanao. Aê Diê sĭt suôr mâo nanao hdră jăk hĭn kơ ƀuôn sang Ñu.
Tơdah tuôm hŏng klei dleh dlan hlăm klei hdĭp, si drei khăng ngă čiăng dưi găn?
Wah lač: Ơ Aê Diê sĭt suôr, kâo bi mni kơ Ih kơ klei khăp Ih khăp leh kơ kâo, klei sĭt suôr Ih jing prŏng prĭn. Akâo kơ Ih đru kâo dưm nanao klei đăo knang kâo hlăm Khua Yang čiăng dưi mâo klei bi juh leh anăn đru hlăm boh klei hlăm klei hdĭp. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Mtô Mñă Klei Bhiăn 27
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
