Henplais 6:17-20
Nqe cim:
“Qhov uas peb cia siab no zoo ib yam li tus tswg uas muaj hlua khi peb lub siab kom nyob ruaj ruaj. Qhov uas peb cia siab ntawd yuav coj peb hla dhau daim ntaub uas thaiv hauv lub tuamtsev saum ntuj ceebtsheej mus rau sab hauv.” (Henplais 6:19)
Lus nug rau sawvdaws xav:
- Txojkev cia siab ntawm cov ntseeg Yexus yog dabtsi?
- Vim li cas txojkev cia siab ntawd tau muab piv zoo ib yam li “tus tswg rau tus ntsujplig”?
- Yuav ua li cas kom niaj hnub muaj kev cia siab thaum ua neej nyob hauv lub ntiajteb no?
Lub sijhawm uas ceebtoom hais txog nqi zog ntawm qhov uas tso kev ntseeg tseg, tus uas sau tsab ntawv Henplais ntseeg hais tias cov uas nyeem nws tsab ntawv yog cov uas twb tau txais kev cawm dim thiab txhawb kom lawv nco ntsoov ua lub neej qhia tawm txojkev cia siab ntawd mus txog hnub kawg (Henplais 6:9-12). Yog li ntawd, qhov kev cia siab loj tshaj ntawm tus ntseeg Yexus yog txojkev cawm dim uas Vajtswv pub rau cov neeg uas ntseeg Yexus. Vajtswv yog tus ncaj ncees, Nws coglus thiab ua tiav rau Anplahas thaum ub, Nws yeej yuav ua li ntawd rau peb hnub no, yog hais tias peb los nkaum hauv Nws ces peb yuav muaj kev txhawb zog thiab muaj kev cia siab ruaj khov (nqe 18).
Cia siab rau txojkev cawm dim zoo li “tus tswg khi peb ruaj ruaj” (nqe 19). Tus tswg yog cuabyeej muab pov mus rau hauv qab thu dej lossis hiavtxwv, tuav kom lub nkoj tsis raug dej tshoob mus. Tus tswg muaj nqis thaum huab cua tsis zoo, muaj cua daj cua dub ntsawj, hiavtxwv ntas. Cia kom lub nkoj nres tau ruaj khov muaj ob yam: ib, yog tus tswg yuav tsum hnyav txaus, tog mus ti qab thu hiavtxwv; ob, yog txoj hlua khi ntawm tus tswg mus rau lub nkoj yuav tsum ruaj, tsis puas li.
Yog ib tug neeg ntseeg tus Tswv, peb tso siab tau vim tus tswg ntawm peb sab ntsujplig “ruaj ruaj” vim nws “xub ua peb ntej mus hauv qhov chaw ntawd lawm. Nws mus li ntawd twb yog nws pab peb. Nws ua tus Povthawj Hlob mus ibtxhis ib yam li Mekhixedes.” (nqe 19b-20). Tiam Vajluskub Qub, hnub uas ua kevcai daws txim, tus povthawj hlob mus rau hauv Chav Dawbhuv Kawg Nkaus, nchos cov ntshav tsiaj thov Vajtswv zam txim rau nws thiab cov pejxeem. Tswv Yexus twb muab Nws cov ntshav los ua khoom fij thiab Nws cov ntshav ntxuav peb txhua tus dawbhuv.
Lub sijhawm nrog tus Tswv mus thaum tseem nyob hauv ntiajteb no, zoo ib yam li lub nkoj hla cua mus rau ntuj ceebtsheej. Peb yeej yuav ntsib tej kob cua loj heev, txhawj ntshai kawg li. Peb tus tswg txawb yuav tsum ruaj khov. Qhov txuas ntxiv yog tshuaj saib txoj hlua khi ntawm lub nkoj mus rau tus tswg, qhov no yog peb lub neej uas nrog tus Tswv sib raug zoo. Cia li siv sijhawm, siv dag zog ua kom ruaj khov txhua hnub, los ntawm tej kev tswj lub neej sab ntsujplig xws li nyeem Vajtswv Txojlus, thov Vajtswv, pehawm Vajtswv, nrog cov ntseeg sib raug zoo hauv txojkev ntseeg.
Thov Vajtswv,
Tus Tswv, nyuam yaus ua Koj tsaug vim ntseeg Yexus nyuam yaus muaj kev cia siab ruaj khov, Koj pab nyuam yaus ua taus siab ntev nyiaj tej cua txaus ntshai hauv lub neej. Thov cia nyuam yaus txuas tus Tswv thiab qhia txojkev cia siab rau lwm tus. Amees.
Peb twb, tabtom lossis yuav ua dabtsi kom txoj hlua khi lub nkoj uas yog peb lub neej mus rau tus tswg sab ntsujplig uas yog Tswv Yexus kom ruaj khov?
Nyeem Vajluskub hauv peb lub xyoo: Hauxeyas 4:12-5:15
Kênh Youtube BHKTHN:
