Klei Aê Diê Blŭ: Hêbrơ 6:17‑20
Êlan kliăng: “Drei mâo leh klei čang hmăng anăn jing msĕ si msei ktrŏ sĭt leh anăn kjăp kơ̆ng mngăt drei, klei čang hmăng anăn găn leh čhiăm păng mŭt leh nah dih hlăm adŭ doh jăk hlăm sang yang.” (Hêbrơ 6:19)
Klei êmuh ksiêm mĭn: Ya klei čang kơ phung đăo jing? Ya ngă klei čang hmăng anăn bi msĕ si “msei ktrŏ kơ̆ng mngăt”? Si srăng ngă čiăng djă pioh kjăp nanao klei čang hmăng anei êjai hdĭp ti lăn ala?
Êjai mtă brei răng kơ boh jhat mơ̆ng klei hngah kơ klei đăo, pô čih hdruôm hră Hêbrơ đăo sĭt kơ phung dlăng ară anei jing phung mâo leh klei bi mtlaih leh anăn bi mđĭ ai digơ̆ ăt bi êdah nanao klei čang hmăng anăn tơl truh knhal truh (Hêbrơ 6:9‑12). Snăn yơh, klei phung đăo čang hmăng prŏng hĭn jing klei bi mtlaih Aê Diê ƀuăn brei kơ hlei pô đăo kơ Yêsu Krist. Aê Diê jing Pô sĭt suôr, Pô tuôm ƀuăn leh anăn kat asei leh hŏng Y‑Abraham mphŭn dô ăt srăng bi sĭt mơh klei ƀuăn hŏng drei hruê anei hlei pô êran nao đuĕ đăp hlăm Ñu srăng mâo klei bi mđĭ ai ktang leh anăn djă pioh kjăp klei čang hmăng (êlan 18).
Klei čang hmăng kơ klei bi mtlaih anăn bi msĕ hŏng “msei ktrŏ sĭt leh anăn kjăp kơ̆ng mngăt” (êlan 19). Msei kơ̆ng jing mnơ̆ng arăng dlăm hlăm tur êa krông amâodah êa ksĭ, kơ̆ng čhŏng mơ̆ng êa puh mđung. Msei kơ̆ng yuôm snăk hlăm yan adiê jhat, êa poh yă, angĭn ktang. Čiăng kơ̆ng čhŏng bi kjăp brei dua mta klei čoh čuăn: sa jing msei kơ̆ng djăp boh ktrŏ, djăp hnơ̆ng gam ti tur êa ksĭ; dua jing msei săng đai mduê hŏng msei kơ̆ng rơ̆ng, amâo tloh ôh.
Jing phung đăo kơ Aê Diê, drei dưi dôk hơĭt kyua msei kơ̆ng mngăt drei “ktrŏ sĭt leh anăn kjăp” kyuadah ñu “găn leh čhiăm păng mŭt leh nah dih hlăm adŭ doh jăk hlăm sang yang. Tinăn Yêsu mŭt leh êlâo bi ala kơ drei, leh anăn jing leh khua ngă yang prŏng hlŏng lar tui si êpul Y‑Mêlkisađek” (êlan 19b-20). Ênuk Klei Bi Mguôp Hđăp, hlăm hruê Knăm Bi Tui Klei Soh, Khua ngă yang prŏng srăng mŭt hlăm adŭ doh jăk hĭn hlăm Sang kkuh mpŭ ti tluôn čhiăm păng, myơr êrah mnơ̆ng myơr hdĭp čiăng akâo kơ Aê Diê pap brei klei soh ñu leh anăn klei soh phung ƀuôn sang. Khua Yang Yêsu myơr leh Ñu pô jing mnơ̆ng ngă yang hdĭp leh anăn êrah Ñu rao jih klei soh drei.
Klei drei tui hlue Khua Yang krah klei hdĭp anei msĕ si čhŏng găn êa poh yă hung nao kơ Ƀuôn Aê Diê. Sĭt nik drei srăng tuôm hŏng êa poh yă, angĭn êbŭ thut ktang. Msei kơ̆ng drei kjăp nanao. Klei ăt dôk jing brei drei ksiêm dlăng kơ msei săng đai mduê čhŏng klei hdĭp drei hŏng msei kơ̆ng, anăn jing klei bi mguôp plah wah drei hŏng Yang Yêsu. Pioh bĕ mông, ai tiê čiăng bi kjăp klei bi mguôp anăn ƀrư̆ hruê ƀrư̆ kjăp hĭn, hŏng klei ngă jih jang klei kpĭ mjuăt myang si tô hmô dlăng Klei Aê Diê Blŭ, wah lač, kkuh mpŭ kơ Aê Diê, bi mguôp hŏng phung ayŏng amai adei sa klei đăo.
Ya klei drei ngă leh, dôk ngă, leh anăn srăng ngă čiăng kơ klei săng đai mduê čhŏng klei hdĭp drei hŏng msei kơ̆ng mngăt jing Khua Yang Yêsu, ƀrư̆ hruê ƀrư̆ kjăp hĭn?
Wah lač: Ơ Aê Diê, kâo bi mni kơ Ih kyua klei đăo kơ Yêsu Krist kâo dưi mâo klei čang hmăng kjăp kơ klei bi mtlaih, đru kâo dôk kjăp phĭt găn jih klei rŭng răng hlăm klei hdĭp anei. Đru kâo djă pioh nanao klei bi mguôp hŏng Ih leh anăn bi êdah klei čang hmăng anăn kơ jih jang phung riêng gah kâo.
Dlăng Klei Aê Diê Blŭ hlăm tlâo thŭn: Y‑Ôsê 4:12‑5:15
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
