Khiavdim 32:1-9
Nqe cim:
“Nej twb pom kuv uas yog tus Tswv hais saum ntuj tuaj rau nej lawm. Yog li ntawd, nej tsis txhob nchuav mlom nyiaj mlom kub los rau nej pe” (Khiavdim 20:22b-23).
Lus nug rau sawvdaws xav:
- Aloos ua li cas thaum sawvdaws tuaj kom nws nchuav mlom? Qhov ntawd muaj xwm tshwm tuaj zoo li cas?
- Tus thawjcoj Vajtswv haiv neeg yuav tau tuav ruaj yam dab tsi los coj sawvdaws mus rau kev pe hawm haum Vajtswv siab?
- Peb yuav ua tau yam dab tsi pab peb tus thawjcoj?
Thaum Vajtswv haiv neeg tos Mauxes pheej tsis tau nqis saum roob los, lawv tuaj cuag Aloos kom nws nchuav mlom rau lawv pe, rau qhov lawv tsis paub Mauxes ua li cas lawm. Aloos yuam lawv hle lawv tej qhwntsej kub thiab kauj kub nqa tuaj rau nws. Lawv txhua tus ua raws li Aloos hais, thiab Aloos muab tej kub ntawd mus nchuav ua ib tus mlom nyuj (nqe 1-4).
Cov neeg Yixalayees tau tuaj qhuab yuam lawv tus thawjcoj uas yog Aloos. Tiamsis yog Aloos paub txog lawv lub siab txhawj ntshai, nws txawj txhawb sawvdaws lub zog kom nyob tos tus Tswv rau qhov tus Tswv yeej hlub Mauxes thiab nws haiv neeg yuav ua rau lawv ruaj siab rau tus Tswv. Aloos muaj peevxwm yuav piav tej txujci uas tus Tswv tau ua pab lawv dhau los lawm thiab kev zoo siab ua tus Tswv pab (Khiavdim 24:9-11) rau sawvdaws mloog.
Puas yog Aloos muaj lub siab txhawj ntshai thiab lub siab ntshaw ib yam li tej pejxeem sawvdaws? Lossis Aloos tsuas kom sawvdaws muab lawv tej kauj kub, tej qhwsntsej kub nqa tuaj rau nws kom ncua sijhawm ntev nyob tos Mauxes los? Qhov uas tsis paub hais daws Aloos zaj yog nws yib li sawvdaws xav thiab nws nchuav mlom nyuj, uas yog ib tug mlom nto moo hauv tebchaws Iziv tiam ntawd. Dhau ntawd, nws teeb thaj thiab tshaj tawm rau sawvdaws tuaj pe tus mlom nyuj hnub tom qab ntawd (nqe 5). Aloos muab tus mlom nyuj los hloov Vajtswv tus uas loj kawg nkaus qhov chaw. Hnub tom qab ntawd, tej pejxeem sawvdaws sawv ntxov tuaj hlawv khoom fij ua kev sib raug zoo, dhia seev cev zoo siab ntawm tus mlom nyuj, ua ib yam li tej neeg Iziv ua. Aloos ua rau Vajtswv haiv neeg mus pe hawm ntau tus tswv ib yam li haiv neeg Iziv pheej ua.
Tswv Yexus hais tias: “Ib tug digmuag yeej coj tsis tau ib tug digmuag kev li; yog nws ua li ntawd, nkawd yeej yuav mus poob kwjdeg xwb” (Lukas 6:39). Tus ua thawjcoj rau Vajtswv pab yaj, yuav tsum paub kev ua haum Vajtswv siab, paub zoo Vajtswv txoj cai, paub yus pab yaj zoo li cas thiab nrhiav kev cob qhia, kev tav pab yaj los pe hawm Vajtswv rau qhov tseeb. Tus coj yuav tsum muaj lub siab tawv, kam txiav txim siab yam ua tau, yam ua tsis tau, mus raws li Vajtswv Txojlus hauv Vajluskub qhia tseg. Ib tug thawjcoj yib sawvdaws li Aloos ces yuav ua rau pawg ntseeg ntsib ntau yam xwm txheej. Cov ntseeg txhua tus yuav tsum thov Vajtswv ntau pab rau cov ua thawjcoj, vim lawv cheemtsum peb kev thov Vajtswv pab lawv.
Thov Vajtswv,
Tus Tswv! Thov Koj pab peb cov thawjcoj muaj lub siab tawv, paub xav dav txog yav tom ntej thiab muaj Koj lub fwjchim coj Koj pab yaj mus rau kev pe hawm hauv qhov tseeb, ua rau Koj tau ntsejmuag. Amees.
Peb puas pheej thov Vajtswv pab rau peb cov thawjcoj lawm tau?
Nyeem Vajluskub hauv peb lub xyoo: Tej Lus Qhia 4
Kênh Youtube BHKTHN:
