Klei Aê Diê Blŭ: Klei Kbiă 32:1-9.
Êlan kliăng: “Diih pô ƀuh Kâo blŭ leh kơ diih mơ̆ng adiê. Đăm ngă ôh kơ diih pô rup yang hŏng prăk amâodah hŏng mah, čiăng bi msĕ Kâo hŏng diñu” (Klei Kbiă 20:22b-23).
Klei êmuh ksiêm mĭn: Si Y‑Arôn msir mgaih bruă čiăng tuh rup êđai êmô mah mơ̆ng phung ƀuôn sang Aê Diê? Si klei jhat mâo? Ya klei phung khua gĭt gai phung ƀuôn sang Aê Diê brei mâo čiăng atăt gai êpul biăp hlăm klei kkuh mpŭ kơ Aê Diê djŏ? Ya klei drei dưi ngă čiăng đru kơ phung khua gĭt gai hlăm mngăt pô?
Hlăk phung ƀuôn sang Aê Diê ƀuh Y‑Môis sui trŭn mơ̆ng čư̆, diñu kƀĭn jum dar Y‑Arôn čiăng kơ gơ̆ ngă brei sa čô yang nao ti anăp diñu, kyua amâo thâo ôh ya klei truh kơ Y‑Môis. Y‑Arôn lač kơ diñu toh jih buê mah diñu, mô̆ anak diñu ba kơ ñu. Grăp čô hlue ngă si klei Y‑Arôn lač. Jih jang mah anăn Y‑Arôn pô tuh sa drei êđai êmô mah (êlan 1‑4).
Phung ƀuôn sang Israel ba leh klei kpĭ prŏng kơ khua gĭt gai jing Y‑Arôn. Khădah snăn, tơdah Y‑Arôn thâo săng klei diñu huĭ hyưt bi hơĭt ai tiê diñu, đru kơ diñu gĭr dôk guôn Aê Diê kyua Ñu khăp kơ Y‑Môis leh anăn phung ƀuôn sang Ñu. Y‑Arôn lŏ mñă wĭt klei myang leh anăn bruă Aê Diê ngă leh čiăng bi hrăp klei diñu čiăng. Ñu pô, dua čô anak êkei leh anăn kjuh pluh čô khua mduôn ăt ƀuh leh Aê Diê ti čư̆ ƀiădah amâo djiê ôh, diñu thâo leh klei hơ̆k mơak (Klei Kbiă 24:9‑11).
Djŏ mơ̆ Y‑Arôn bi mĭn msĕ si phung ƀuôn sang Aê Diê, huĭ hyưt leh anăn čang hmăng msĕ digơ̆? Amâodah Y‑Arôn lač kơ phung ƀuôn sang Aê Diê ba kơ ñu buê, kông mah čiăng bi kdung hruê mông, dôk guôn Y‑Môis wĭt? Ƀiădah klei amâo dưi mgang ôh kơ klei hlue gưt jing ñu tuh leh êđai êmô mah, bi knăl mơ̆ng dua yang Apis leh anăn Hathor mâo lu hŏng phung Êjip hlăk anăn. Leh anăn ñu lĕ hlăm klei soh leh mkŏ mjing knưl ti anăp rup êđai êmô mah, hưn aguah mgi srăng mâo klei kkuh mpŭ kơ Yêhôwa Aê Diê (êlan 5). Ñu ba rup êmô mah ngă rup bi hmô kơ Aê Diê doh jăk! Aguah hruê mgi, phung ƀuôn sang Aê Diê kgŭ ưm myơr mnơ̆ng myơr čuh leh anăn mnơ̆ng myơr kơ klei êđăp ênang, hlăp lêñ leh anăn kdŏ mmuñ ti anăp rup êđai êmô mah; klă sĭt jing klei kkuh kơ lu rup yang mơ̆ng phung Êjip. Y‑Arôn klă sĭt ba phung ƀuôn sang Aê Diê ruah lŏ wĭt ti Êjip hlăm klei kkuh mpŭ kơ lu rup yang!
Khua Yang Yêsu lač: “Dưi mơ̆ sa čô mnuih bum ală atăt sa čô bum ală mkăn? Amâo djŏ hĕ jih diñu dua srăng lĕ hlăm ƀăng?” (Y‑Luk 6:39). Phung mgăt biăp Aê Diê brei thâo bi mơak Aê Diê, thâo êlan Ñu, boh klei êpul biăp leh anăn knang kơ Aê Diê atăt gai, ktrâo lač leh anăn mđĭ ai êpul biăp hlăm knuih hdĭp kkuh mpŭ kơ Aê Diê hŏng hdră djŏ. Khua gĭt gai brei jhŏng lač “ơ̆” amâodah “ơ ơh” hlue si Klei Aê Diê Blŭ. Sa čô khua gĭt gai hlue klei soh msĕ si Y‑Arôn srăng ngă luč liê lu kơ Sang Aê Diê. Brei phung ƀuôn sang hdơr wah lač lu kơ digơ̆ kyua digơ̆ čiăng snăk klei drei wah lač brei.
Ya klei drei dôk wah lač kơ khua gĭt gai hlăm mngăt hlăm Sang Aê Diê?
Wah lač: Ơ Khua Yang! Kâo akâo kơ Ih brei kơ phung khua kiă kriê hlăm mngăt kâo mâo ai tiê, hnơ̆ng dlăng leh anăn klei myang mơ̆ng Ih čiăng bi hriăm êpul biăp hlăm knuih hdĭp leh anăn klei kkuh mpŭ djŏ klă, bi mơak kơ Ih.
Dlăng Klei Aê Diê Blŭ hlăm tlâo thŭn: Khua Pô Mtô 4:1‑16
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
