Lukas 16:1-9
Nqe cim:
“Tiamsis nej cia li khaws nyiaj txiag thiab qhov txhia chaw cia rau nej saum ntuj ceebtsheej, qhov ntawd tsis muaj ntsaum kabrwg thiab xeb noj, thiab tsis muaj tubsab nyiag” (Mathais 6:20).
Lus nug rau sawvdaws xav:
– Tus tubtxib saib xyuas hauv ntu Vajluskub ua yuam kev li cas thiab nws npaj dab tsi rau lub neej tom ntej?
– Tus tubtxib tau nws tus tswv qhuas yam dabtsi?
– Tswv Yexus xav qhia peb txog dabtsi hauv zaj lus piv txwv no?
Tswv Yexus hais ib zaj lus piv txwv txog tus tubtxib uas saib xyuas nws tus tswv tej qhov txhia chaw rau cov thwjtim mloog. Tus tubtxib no yog tus saib tes haujlwm khwv noj khwv haus hauv nws tus tswv lub vajtse. Nyob rau tiam thaud, txhua tus tswv puavleej ib txwm muab txhua tes haujlwm hauv vajtse tso rau lawv ib tus tubtxib ua tus saib xyuas txhua nrho. Tus tubtxib uas saib xyuas tej qhov txhia chaw no raug kom hais tias nws muab nws tus tswv tej nyiaj siv phuam lam ntsuav tas thiab yuav raug raws tawm mus. Zaus no nws paub tseeb hais tias yuav poob haujlwm, nws txawm nrhiav tswvyim thiab hu txhua tus uas tshuav nws tus tswv li nqi tuaj kom kho lawv tej ntawv tshuav nqi thiab txo nqi nqis rau cov ntawd. Thaum nws tus tswv paub li ntawd, tsis yog tsis rau txim xwb, tseem qhuas hais tias tus tubtxib tsi ncaj ntawd muaj tswvyim kawg li, nws paub siv nws tus tswv tej qhov txhia chaw ua kom lwm tus nco nws txiaj ntsig thiab lawv yuav pab thaum nws poob haujlwm lawm. Hauv zaj lus piv txwv no, Tswv Yexus tsis qhuas tus tubtxib no tes haujlwm ua tsis ncaj, Tswv Yexus ntaus nqis tes haujlwm ntawd yog ua “tsis ncaj” (nqe 8). Tiamsis Tswv Yexus qhuas lub tswvyim uas paub siv nws tus tswv tej qhov txhia chaw cog phoojywg nrog lwm tus kom tau kev pab thaum poob haujlwm lawm. tus tubtxib no yog tus saib pom deb, paub xav txog yav tom ntej thiab ua tes haujlwm uas yuav pab tau yus yav tom ntej.
Peb yog cov uas nyob qhov pom kev (nqe 8), Vajtswv yeej tsis pub peb siv lub tswvyim tsis ncaj no ua rau lwm tus. Tiamsis Vajtswv xav kom peb ncaj ncees siv peb tej nyiaj txiag thiab qhov txhia chaw hauv lub ntiajteb los nqis peev rau tes haujlwm sab ntsujlpig, nqis peev rau saum Ntuj Ceebtsheej, qhov chaws uas yav tom ntej peb yuav tau mus nrog Vajtswv nyob ibtxhis.
Vajtswv Txojlus qhia meej hais tias, “lub ntiajteb thiab txhua tsav yam puavleej yog kuv li” (Phau Ntawv Nkauj 50:12b), Cov Ntseeg yog cov uas Tswv Yexus muab Nws cov ntshav txhiv muas los ua Yexus tubtxib thiab muab ib lub luag haujlwm cob rau peb ua uas yog saib xyuas Nws tej cuabtam, zoo ib yam li thaum Adas thiab Evas tau Vajtswv muab tes haujlwm rau nkawd “zov thiab tu lub vaj” (Chivkeeb 2:15). Lub sijhawm uas peb tseem muaj txoj sia ua neej nyob, yog lub sijhawm zoo rau Vajtswv cov menyuam, uas yog tus Tswv cov tubtxib siv txhua yam uas tus Tswv muab cob rau lawm kom muaj nqis rau Vajtswv lub Tebchaws, xws li pab tej tibneeg pluag txomnyem (Lukas 12:33), qhia kom lwm tus paub Tswv Yexus los txais yuav kev cawmdim (Mathais 28:19-20)… Vajtswv Txojlus qhia meej hais tias, peb tau txais kev cawmdim yog los ntawm kev ntseeg, tsis yog los ntawd tes haujlwm thiab kev ua zoo (Efexus 2:8-9). Txawm li ntawd los, tej nqi zog uas Vajtswv cov menyuam yuav tau txais hauv Tswv Yexus Khetos lub rooj txiav txim yuav tsis sib thooj yog los ntawm peb ua haujlwm zoo lossis haujlwm phem thaum nyob hauv ntiajteb no (II Kauleethaus 5:10). Yog li ntawd, cia li siv zog ua haujlwm zoo uas “khaws tej qhov txhia chaw cia saum ntuj”.
Thov Vajtswv
Tswv Yexus uas yog nyuam yaus tus Tswv Cawmseej thiab yog nyuam yaus tus Tswv, thov pab nyuam yaus muaj tswvyim siv txhua yam uas Koj muab cob rau nyuam yaus kom muaj nqis rau Vajtswv koj lub Tebchaws kev nthuav dav, ntawd yog qhov chaw uas nyuam yaus yuav tau nrog Vajtswv nyob mus ibtxhis li. Amees!.
Peb tabtom nqis peev rau tes haujlwm sab ntsujplig li cas?
Nyeem Vajluskub hauv peb lub xyoos: Yauhas 15:1-16:4.
Kênh Youtube BHKTHN:
