Klei Aê Diê Blŭ: Y‑Luk 16:1-9
Êlan kliăng: “Ƀiădah brei diih mkăm pioh ngăn drăp yuôm hlăm adiê. Tinăn amâo mâo muôr, kăn mâo bring bi rai rei, kăn mâo pô knĕ dưi ƀoh mtih tlĕ rei.” (Y‑Mathiơ 6:20)
Klei êmuh ksiêm mĭn: Ya klei soh pô kiă ngăn ngă leh anăn ya klei ñu ngă čiăng mprăp êlâo kơ ñu hlăm hruê êdei anăp? Ya klei khua ñu bi mni kơ ñu? Ya klei hriăm Khua Yang Yêsu čiăng bi hriăm drei mơ̆ng klei bi hriêng anei?
Khua Yang Yêsu yăl dliê kơ phung ƀĭng kna sa klei bi hriêng kơ pô kiă ngăn mâo khua mdrŏng jao kơ ñu kiă kriê bruă knuă hlăm sang ñu. Hlăm ênuk anăn, phung khua mâo ngăn dŏ khăng jao bruă kơ sa čô kăp kiă kriê ngăn drăp ñu, gơ̆ jing dĭng buăl kơ ñu. Pô kiă ngăn anei arăng kčŭt bi luč ngăn khua ñu leh anăn khua ñu amra suôt. Thâo klă ñu amâo srăng lŏ mâo bruă mă ôh, snăn pô kiă ngăn anei jêč ruăt mkra hdră iêô grăp čô đuôm nư kơ khua ñu hriê ñu lŏ mkra hră nư bi hrŏ mtrŭn ênoh đuôm nư hŏng klei kmah snăk. Tơdah thâo klei ñu ngă anei, khua ñu amâo ƀuah ăl kơ ñu ôh ƀiădah lŏ bi mni hĭn kơ pô kiă ngăn amâo sĭt suôr anei ngă leh hŏng klei thâo mĭn, thâo yua ngăn dŏ khua ñu ngă klei čiăng kơ phung đuôm nư khua ñu thâo hdơr knga kơ ñu, leh anăn digơ̆ srăng đru pô kiă ngăn tơdah ñu amâo lŏ mâo bruă mă ôh. Yăl dliê klei bi hriêng anei, Khua Yang Yêsu amâo mni ôh kơ mnêč pô kiă ngăn anei ngă, Khua Yang pia kơ ñu jing “pô kiă amâo sĭt suôr” (êlan 8), ƀiădah mni kơ klei ñu ngă snăn thâo mĭn, thâo yua ngăn dŏ khua ñu kăp ngă mah jiăng čiăng kơ arăng srăng đru ñu tơdah ñu amâo lŏ mâo bruă mă ôh. Pô kiă ngăn anei thâo ƀuh kbưi, thâo bi mĭn kơ klei hdĭp ñu hlăm hruê êdei anăp leh anăn mâo klei ngă pioh duh kơ hruê êdei.
Drei jing phung anak klei mngač (êlan 8), sĭt nik Khua Yang amâo mtô drei yua mnêč amâo kpă ênô hlăm klei dôk dơ̆ng ƀơ̆ng huă hŏng arăng ôh. Ƀiădah Khua Yang čiăng kơ drei sĭt suôr hlăm klei yua prăk kăk, ngăn drăp ti lăn ala anei pioh duh kơ bruă klei hdĭp mngăt, duh kơ Ƀuôn Ala Mtao Adiê, jing anôk sa hruê êdei sĭt nik drei srăng mŭt dôk nanao hlŏng lar hŏng Khua Yang.
Klei Aê Diê Blŭ hưn klă, “Kyuadah lăn ala jing dŏ Kâo, wăt jih jang mnơ̆ng hlăm ñu” (Klei Mmuñ Hđăp 50:12b), phung đăo kơ Krist jing phung Khua Yang bi tui leh hŏng êrah Ñu Pô pioh jing dĭng buăl kơ Ñu, pioh mă tŭ bruă klam Ñu jao leh anăn yua ngăn dŏ Ñu, msĕ si Y‑Ađam leh anăn H’Êwơ, Aê Diê jao bruă “mkra leh anăn kiă kriê war djam” (Klei Mphŭn Dơ̆ng 2:15). Hruê mmông adôk hdĭp ti rŏng lăn ala jing mmông găl kơ phung anak Aê Diê, yua ngăn dŏ Aê Diê jao pioh duh kơ Ƀuôn Ala Mtao Adiê, msĕ si ngă bruă đru dŏng phung ƀun ƀin knap mñai (Y‑Luk 12:33), atăt arăng thâo kral Khua Yang Yêsu leh anăn mă tŭ klei bi mtlaih (Y‑Mathiơ 28:19-20) … Klei Aê Diê Blŭ lač klă drei mâo klei bi mtlaih kyua hŏng klei đăo amâo djŏ kyua bruă ngă ôh (Êphêsô 2:8-9). Ƀiădah klei mưn kơ phung anak Aê Diê srăng mă tŭ ti hruê dôk ti anăp jhưng mtao klei phat kđi mơ̆ng Yang Krist grăp čô srăng mă tŭ mdê mdê tui si bruă jăk amâodah bruă jhat drei ngă leh êjai hdĭp ti lăn ala anei (II Kôrantô 5:10). Kyuanăn brei drei hŏng jih ai tiê “mkăm pioh ngăn drăp hlăm adiê”.
Si klei drei dôk duh kơ bruă hlăm mngăt?
Wah lač: Ơ Khua Yang Yêsu jing Pô Bi Mtlaih leh anăn jing Khua kâo, akâo kơ Khua Yang brei kâo mâo klei thâo mĭn thâo yua ngăn drăp Khua Yang jao kơ kâo êjai hdĭp ti lăn ala anei pioh duh bi mđĭ bruă Ƀuôn Ala Mtao Adiê, jing anôk ênuk êdei kâo srăng hdĭp nanao hlŏng lar hŏng Khua Yang.
Dlăng Klei Aê Diê Blŭ hlăm tlâo thŭn: Y‑Yôhan 15:1-16:4
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
