Nkauj Quaj Ntsuag 1:9-14
Nqe cim:
“Nws sau tagnrho kuv tej kev txhaum los ua ke thiab muab pav ua ib qhoo; Nws muab tej kev txhaum ntawd los rig rau kuv cajdab, Thiab ua rau kuv lub zog ntaug nphaws vim hnyav heev. Tus Tswv muab kuv cob rau cov yeebncuab tes thiab kuv tsis muaj zog tawmtsam lawv.” (Nkauj Quaj Ntsuag 1:14).
Lus nug rau sawvdaws xav:
– Tus cevlus Yelemis ntsib txojkev nyuaj siab twg?
– Tej no ua li cas rau Yelemis lub neej?
– Peb zeem pom qhov uas kev ua txhaum hiam zoo li cas thiab muaj kev txiav txim siab dabtsi?
Tus cevlus Yelemis rov hais txog nws zaj lus quaj ntsuag, Yelemis qhia hais tias tsis muaj leejtwg raug txomnyem npaum nws raug (nqe 12), tus Tswv haivneeg raug thuam, qaug zog, tshaib nqhis… tsis muaj kev txhawb zog. Qhov kev mob siab tshaj ntawm Yelemis thiab tus Tswv haivneeg yog lawv cov yeebncuab ua rau lub Tuamtsev tsis huv. Hais txog tus Tswv haivneeg, lub Tuamtsev yog lawv qhov chaw kaj siab, lawv txojkev ntseeg, thiab raws li txoj Kevcai ces lwm haivneeg tsis tau cai mus rau hauv lub Tuamtsev, tiamsis nimno cov yeebncuab “twb yeej lawm” (nqe 9), tsis yog mus ua qias rau lub Taumtsev xwb, yeebncuab tseem huab tej khoom zoo hauv lub Tuamtsev mus lawm thiab (nqe 10). Thaum tus Tswv haivneeg tsis paub ceev tej uas tus Tswv pub ces Nws yuav thau rov qab, Nws haivneeg yuav tsum paub.
Tus cevlus Yelemis zeem paub meej tias tsis yog vim cov tubrog nyob sab Qaumteb muaj zog, tiamsis yog tes haujlwm tus Tswv ua “yog txojkev txomnyem uas tus Tswv tso los rau kuv thaum lub sijhawm uas nws chim.” (nqe 12), yog li “tus Tswv tso hluavtaws saum ntuj los…, Nws cuab hlua mag kuv kotaw… Nws tso kuv tseg thiab cia kuv nyiaj mob.” (nqe 13), yog tes haujlwm uas tus Tswv nchuav los vim tej kev txhaum uas Nws haivneeg ua. Thiab tus cevlus Yelemis kuj txo hwjchim zeem paub qhov ntawd yog tej kev txhaum nws tus kheej ua thiab, zoo li lub nra yuam qees ua rau nws tso tsis taus pa, rig cajdab ua rau nws lub zog ntaug nphaws, thiab yog tus Tswv muab nws thiab nws haivneeg tso rau cov yeebncuab txhais tes, yog li Yelemis tawmtsam tsis yeej (nqe 14).
Siv tus duab lub nra los hais txog kev txhaum, tus cevlus Yelemis qhia paub txojkev khi thiab qhov uas txojkev txhaum ua hiam. Txij thaum chivkeeb los txog nimno, kev txhaum pib ntawm qhov tsis mloog lus. Thaum peb tsis mloog tus Tswv lus, peb ua raws li peb lub siab nyiam ces nco ntsoov tias peb twb raug Xatas ntxias tau lawm. Thaum twb ua txhaum lawm ces lub nra kev txhaum khi peb ruaj heev dim tsis taus. Lub sijhawm ntawd kev txhaum huam, yim hnub yim loj thiab mus txog qib uas loj heev. Peb tsis muaj leejtwg rov cawm tau peb dim lub nra kev txhaum, tsuas yog thaum peb zeem paub yus ua txhaum, lees txim tig rov los nyob ntawm Tswv Yexus Khetos tus khaublig, tau tus Tswv zam txim thiab cawm peb dim lub nra kev txhaum ces peb thiaj dim xwb.
Thov Vajtswv,
Vajtswv! Nyuam yaus kawm paub Koj txojkev dawbhuv thaum Koj suav tias tus neeg txhaum nws tsis txhaum lawm. Thov Koj pub rau nyuam yaus paub txog lub nra hnyav uas kev txhaum yuam, kom nyuam yaus muaj lub siab tsis ua txhaum, nyuam yaus thiaj tsis raug txim. Nyuam yaus tuav Tswv Yexus lub npe thov, Amees.
Ib tsoom mloog uas hmov thiab tshua,
Thaum ntsia pom tej kev txomnyem uas kev txhaum ua nyob hauv tus Tswv lub tsev, peb muaj kev xav dabtsi?
Nyeem Vajluskub hauv peb lub xyoo: Teev Npe 13
Kênh Youtube BHKTHN:
