Klei Aê Diê Blŭ: Klei Čŏk Hia 1:9-14
Êlan kliăng: “Arăng mă klei soh kâo mjing knông kơ kâo; kngan Ñu kă klei soh anăn mđrăm mbĭt, Ñu mđua ti kkuê kâo; Ñu brei kâo luč klei ktang, Yêhôwa jao kâo leh kơ kngan phung kâo amâo dưi bi kdơ̆ng ôh!” (Klei Čŏk Hia 1:14)
Klei êmuh ksiêm mĭn: Ya klei ênguôt hnĭng Khua pô hưn êlâo Y-Yêrêmi tuôm? Si dŭm klei anei hmăi kơ klei hdĭp ñu? Si drei ƀuh boh jhat mơ̆ng klei soh leh anăn ya klei drei čuăn ngă?
Khua pô hưn êlâo Y-Yêrêmi lŏ dơ̆ng čih klei ñu ênguôt hnĭng, ñu brei thâo amâo mâo ôh klei ênguôt hnĭng dưi mkă hŏng klei ênguôt ñu dôk găn (êlan 12), phung ƀuôn sang Aê Diê tŭ klei arăng mưč mač, toh hroh, ư̆ êpa… ƀiădah amâo mâo klei bi juh ôh. Klei ênguôt hnĭng prŏng hĭn ñu leh anăn phung ƀuôn sang Aê Diê dôk klam jing phung roh bi čhŏ Sang Yang. Hŏng phung ƀuôn sang Aê Diê, Sang Yang jing klei ktưn hưn, jing klei đăo knang djiê hdĭp diñu, leh anăn klei bhiăn kčah phung ƀuôn sang tue amâo dưi mŭt ôh hlăm Sang Yang, ƀiădah ară anei “phung roh dưi leh!” (êlan 9), amâo djŏ knŏng jhŏng mŭt bi čhŏ Sang Yang ôh, lŏ tlĕ mă jih mnơ̆ng jăk hĭn hlăm Sang Yang (êlan 10). Tơdah phung ƀuôn sang Aê Diê amâo thâo mpŭ ôh kơ klei jăk Aê Diê brei snăn Ñu srăng mă jih čiăng mtô bi hriăm phung ƀuôn sang Ñu.
Khua pô hưn êlâo Y-Yêrêmi thâo klă amâo djŏ kyua phung ƀuôn sang êgar Dưr jhŏng ktang ôh, ƀiădah anei jing bruă Yêhôwa “…Klei knap anăn Yêhôwa bi truh kơ kâo êjai hruê Ñu ngêñ hlơr” (êlan 12), kyua anăn “Mơ̆ng dlông Ñu mơĭt pui…, Ñu dăng ñuăl kơ jơ̆ng kâo…, Ñu lui kâo djiê hwăt jih hruê…” (êlan 13), jing bruă Khua Yang tuh bi kmhal kyua klei soh phung ƀuôn sang Ñu ngă leh. Leh anăn Khua pô hưn êlâo Y-Yêrêmi ăt luă gŭ thâo anăn jing klei soh ñu pô, ñu msĕ si knông mkhư̆ ñu dleh bi êwa, ktư̆ ti kkuê ñu tơl ñu luč jih ai ktang, leh anăn kyua Aê Diê jao ñu hŏng djuê ana ñu hlăm kngan phung roh anăn ñu amâo dưi bi kdơ̆ng ôh (êlan 14).
Yua rup knông čiăng lač kơ klei soh, Khua pô hưn êlâo Y-Yêrêmi brei ƀuh klei mguôp mbĭt leh anăn klei huĭ hyưt mơ̆ng klei soh si jing. Mơ̆ng ênuk tal êlâo truh kơ ară anei, klei soh mphŭn mơ̆ng klei amâo gưt asăp. Tơdah drei amâo gưt asăp Aê Diê ƀiădah ngă hlue si klei pô čiăng snăn brei hdơr drei lĕ leh hlăm klei Satan mplư. Tơdah lĕ hlăm klei soh snăn knông klei soh kă drei hlăm anăn amâo dưi tlaih ôh. Mơ̆ng anăn klei soh lŏ mâo klei soh, ƀrư̆ hruê ƀrư̆ đĭ leh anăn ƀrư̆ kjham hĭn. Drei amâo dưi čŏng bi mtlaih ôh pô mơ̆ng klei soh êngao kơ klei drei thâo pô soh, kmhal lŏ wĭt ti gŭ kyâo bi kal Krist, Ñu srăng pap brei leh anăn bi mtlaih drei mơ̆ng klei soh čiăng hdĭp kơ Ñu.
Tơdah ƀuh boh klei ênguôt hnĭng mơ̆ng klei soh hlăm Sang Aê Diê mtam, si drei bi mĭn?
Wah lač: Ơ Aê Diê! Kâo hriăm klei doh jăk Ih tơdah Ih amâo yap ôh phung mâo klei soh jing amâo mâo klei soh. Akâo kơ Ih đru kâo ƀuh boh jhat kjham mơ̆ng klei soh čiăng kâo mâo klei huĭ mpŭ amâo mâo ngă soh ôh, čiăng kơ kâo amâo tŭ ôh klei ngêñ kpă ênô mơ̆ng Ih. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Yap 13
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
