Titus 1:1-4
Nqe cim:
“Thaum txog lub sijhawm uas Vajtswv teem cia lawm, Vajtswv qhia zaj no rau peb. Vajtswv tus uas yog peb tus Cawmseej, nws muab zaj no tso rau kuv, thiab kom kuv coj mus qhia rau sawvdaws.” (Titus 1:3)
Lug nug rau sawvdaws xav:
– Tus muab haujlwm cob rau Timthawj Paulus yog leejtwg?
– Nws muab tes haujlwm txais tau ntawm tus Tswv cob rau Titus los ntawm kev cia siab dabtsi?
– Peb tau txhawb zog licas rau tes haujlwm tus Tswv muab cob?
Qhib thawj tsab ntawv xa mus rau Titus, uas yog Timthawj Paulus ib tug tub sab ntsujplig, Nws tau hais meej txog lub homphiaj ntawm nws lubneej yog mus pab cov neeg uas Vajtswv tau xaiv cia lawm los rau hauv kev ntseeg, thiab thaum paub qhov tseeb, lawv yuav tau txojsia ntev dhawv mus ibtxhis (nqe 1-2). Timthawj Paulus txais tau tes haujlwm no ntawm Tswv Yexus Khetos, yog tus uas thaum txog sijhawm Vajtswv teem cia lawm tau “muab nws txojsia los theej sawvdaws lub txhoj; nws ua li ntawd yog nws qhia rau sawvdaws paub hais tias twb txog lub sijhawm uas Vajtswv teem cia lawm hais tias Vajtswv yuav pab kom neeg dim neeg lub txim” (I Timautes 2:6). Nws kuj yuav rov qab los raws li sijhawm Vajtswv teem cia: “Tus Tswv Yexus yuav los raws li lub sijhawm uas Vajtswv teem cia lawm. Vajtswv yog tus foom koob hmoov, yog tus kav ib puas tsav yam, thiab yog tus Vajntxwv ntawm txhua tus vajntxwv thiab yog tus Tswv ntawm txhua tus tswv huv tibsi” (I Timautes 6:15). Timthawj Paulus sau ntxiv hauv nqe 3 thiab nqe 4 hais tias Vajtswv thiab Tswv Yexus puavleej yog “peb tus Cawmseej”, qhov ntawd ua tabpov hais tias Tswv Yexus yog Vajtswv thiab yog Timthawj Paulus, Titus thiab peb txhua tus “tus Cawmseej”.
Timthawj Paulus tau txoj koob hmoov txais tes haujlwm ncaj nraim ntawm Tswv Yexus (Tes Haujlwm 26:15-16), nws hais tias: “Vajtswv qhia zaj no rau peb. Vajtswv tus uas yog peb tus Cawmseej, nws muab zaj no tso rau kuv, thiab kom kuv coj mus qhia rau sawvdaws” (nqe 3). Txij Xaulus tus uas pheej nrhiav tsimtxom cov ntseeg tau dhau los ua Timthawj Paulus uas txaus siab hlo siv nws lubneej los qhia Txojmoo Zoo. Timthawj Paulus txais tau tes haujlwm coj lwm tus los tau txojsia ibtxhis, yog txojsia uas nws txais tau ntawm “peb tus Cawmseej”. Yog li ntawd, tej uas nws qhia yog tej uas nws ntsib hauv nws lubneej, vim ib tug uas tsis tau paub txojsia ibtxhis yuav qhia tsis tau txojsia ntawd pub rau lwm tus. Vim li ntawd, Timthawj Paulus muab tes haujlwm cob rau Titus los ntawm ib leej txiv sab ntsujplig nploojsiab xa mus rau nws “tus tub”, nrog rau txojkev cia siab hais tias Titus yuav nyob ruaj khov hauv Tswv Yexus txojkev cawmdim thiab muaj kev kaj siab ntawm Vajtswv, uas yog Leej Txiv, kom txawm yog yuav nyob lub tsamthawj twg los nws kuj ua tiav tes haujlwm tus Tswv tau muab cob rau nws.
Nyob rau tiam uas tibneeg “tsis nyiam mloog Vajtswv Txojlus lawm. Lawv tsuas nyiam mloog tej dabneeg xwb” (II Timautes 4:4) mas kev ua timkhawv txog tus Tswv nyuaj kawg li. Tiamsis, Vajtswv Txojlus txhawb peb cia li ua siab tawv vim ntawm no yog tes haujlwm uas Tswv Yexus muab cob rau peb ua. Nws yog tus uas thaum txog sijhawm teem tseg tau los yug, tuag txhiv tibneeg saum tus ntoo khaublig, thiab yuav rov qab los raws li lub sijhawm Vaj Leej Txiv teem tseg, muab nqi zog rau peb cov uas tas siab tas ntsws ua tes haujlwm uas Nws muab cob.
Thov Vajtswv,
Tus Tswv, thov cia Vaj Ntsujplig qhuab ntuas kom nyuam yaus nco ntsoov hais tias nyuam yaus twb tau txojkev cawmdim thiab txais tau tes haujlwm ntawm Koj lawm. Thov pab nyuam yaus txaus siab hlo fij lubneej rau tes haujlwm coj coob leej los txais txojsia ibtxhis. Nyuam yaus tuav Yexus Khetos lub npe thov, Amees.
Ib tsoom cov mloog uas hmov thiab tshua,
Peb yuav siv dabtsi los ua tes haujlwm coj lwm tus los cuag tus Tswv?
Nyeem Vajluskub hauv peb lub xyoos: Loos 11
Kênh Youtube BHKTHN:
