Klei Aê Diê Blŭ: Y-Tit 1:1-4
Êlan kliăng: “Leh anăn hlăm ênuk djŏ Aê Diê bi êdah leh klei Ñu blŭ hŏng klei mtô Ñu jao leh kơ kâo tui si Aê Diê, Pô Bi Mtlaih drei, mtă leh” (Y-Tit 1:3)
Klei êmuh ksiêm mĭn: Hlei Pô jao bruă klam kơ Khua ƀĭng kna Y-Pôl? Ñu jao leh bruă klam mơ̆ng Khua Yang kơ Y-Tit hŏng ya klei čang hmăng? Si klei mđĭ ai drei hŏng bruă klam Khua Yang jao?
Akŏ hră mơĭt kơ Y-Tit, sa čô anak ñu hlăm klei đăo, Khua ƀĭng kna Y-Pôl lač klei ñu kñăm čiăng jing ba phung mâo ruah leh hŏng klei đăo leh anăn klei thâo kơ klei sĭt nik čiăng kơ diñu thâo klei hdĭp hlŏng lar (êlan 1-2). Ñu mă leh bruă klam anei mơ̆ng Khua Yang Yêsu Krist, Pô hriê leh djŏ wưng kčah čiăng “jao leh Ñu pô jing ênoh bi tui kơ jih jang mnuih. Snăn jing klei hưn bi sĭt kơ hdră Aê Diê čiăng ngă hlăm ênuk djŏ” (I Y-Timôthê 2:6). Ñu ăt srăng lŏ hriê djŏ ênuk kčah leh “Ñu srăng bi êdah djŏ ênuk Ñu tui si Aê Diê, knŏng hjăn Ñu jing Pô Kiă Kriê mâo klei jăk jĭn, Mtao kơ phung mtao, leh anăn Khua Yang kơ phung khua yang” (I Y-Timôthê 6:15). Khua ƀĭng kna Y-Pôl čih hlăm êlan 3 leh anăn 4 Aê Diê leh anăn Khua Yang Yêsu jing “Pô Bi Mtlaih drei”, klei anăn klă sĭt bi êdah Khua Yang Yêsu jing Aê Diê leh anăn “jing Pô Bi Mtlaih” kơ Khua ƀĭng kna Y-Pôl, kơ Y-Tit leh anăn kơ grăp čô drei.
Khua ƀĭng kna Y-Pôl mâo klei pap tŭ mă bruă klam mơ̆ng Khua Yang Yêsu Krist jao (Bruă Phung Khua Ƀĭng Kna 26:15-16), jing “Aê Diê bi êdah leh klei Ñu blŭ hŏng klei mtô Ñu jao leh kơ kâo tui si Aê Diê, Pô Bi Mtlaih drei, mtă leh” (êlan 3). Čiăng mơ̆ng sa Y-Sôl khăng ngă jhat kơ Phung Sang Aê Diê jing sa Khua ƀĭng kna Y-Pôl srăng săn jih klei hdĭp kyua Klei Mrâo Mrang Jăk, Khua ƀĭng kna Y- Pôl tŭ mă leh bruă klam atăt phung mkăn kơ klei hdĭp hlŏng lar, jing klei hdĭp ñu mâo leh mơ̆ng “Aê Diê Pô Bi Mtlaih drei”. Kyua anăn, ya klei ñu lŏ mtô mtă jing klei thâo hlăm klei hdĭp ñu găn leh, kyua sa čô mnuih ka thâo ôh kơ klei đăo klei hdĭp srăng amâo dưi hiu hưn ôh kơ klei hdĭp anăn kơ pô mkăn. Kyua anăn, Khua ƀĭng kna Y-Pôl jao bruă klam kơ Y-Tit hŏng ai tiê sa čô ama klei đăo mơĭt kơ “anak kâo sĭt hlăm klei drei đăo msĕ”, hŏng klei čang hmăng Y-Tit ăt lŏ dơ̆ng dôk hlăm klei pap klei bi mtlaih mơ̆ng Khua Yang Yêsu Krist, leh anăn mâo klei êđăp ênang mơ̆ng Aê Diê, jing Ama, čiăng hlăm djăp boh klei ăt bi leh bruă klam Khua Yang jao leh kơ ñu.
Dleh snăk čiăng hưn kơ Khua Yang hlăm ênuk anak mnuih “hngah hmư̆ klei sĭt nik leh anăn wir tui hlue klei yăl dliê đưm amâo sĭt ôh” (II Y-Timôthê 4:4). Khădah snăn, Klei Aê Diê mđĭ ai drei thiăm klei jhŏng kyua anei jing bruă klam mơ̆ng Khua Yang Yêsu Krist Pô jao. Ñu jing Pô hriê leh ti lăn ala djŏ ênuk, săn leh asei ti kyâo bi kal djŏ ênuk, leh anăn srăng lŏ hriê hlue si hruê mmông Aê Diê Ama kčah čiăng brei klei mưn kơ drei jing phung jih ai tiê hlue ngă bruă klam Aê Diê jao.
Si drei srăng ngă čiăng hlue ngă bruă klam atăt phung mkăn truh kơ Khua Yang?
Wah lač: Ơ Khua Yang, akâo kơ Yang Mngăt Jăk mñă nanao kơ kâo čiăng hdơr pô mâo leh klei bi mtlaih leh anăn bruă klam mơ̆ng Khua Yang jao. Akâo kơ Ih đru kâo srăng myơr jih klei hdĭp hŏng bruă klam atăt lu phung mkăn kơ klei hdĭp hlŏng lar. Kâo wah lač hlăm anăn Khua Yang Yêsu Krist, Amen
Dlăng Klei Aê Diê Blŭ hlăm tlâo thŭn: Rôm 11
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
