II Xwmtxheej 18:15-22
Nqe cim:
“…Metub, thaum tus Tswv qhuab ntuas koj, koj yuav tsum khaws Nws tej lus cia…” (Henplais 12:5b).
Lus nug rau sawvdaws xav:
- Tus cevlus Mikayas pom zaj yogtoog licas?
- Lub ntsiab ntawm zaj yogtoog no yog dabtsi?
- Nyob nruab nrab ntawm txojsia thiab txojkev tuag, Vajntxwv Ahaj xaiv txoj twg?
- Peb muaj tus cwjpwm zoo licas thaum tus Tswv qhuab ntuas peb?
Txawm raug hem yuam kom hais tej lus haum Vajntxwv Ahaj siab, los Tus cevlus Mikayas tsuas hais raws li tej uas tus Tswv qhia rau nws xwb (nqe 13). Nws piav ob zaj yogtoog uas tus Tswv ua rau nws pom. Zaj yogtoog xubthawj, nws pom cov tubrog Yixalayees tawg khiav ri sua saum tej ncov roob ib yam li pab yaj uas tsis muaj tus tswv yug lawm, thiab tus Tswv hais tias, “cov neeg no tsis muaj thawjcoj lawm; cia li tso lawv rov mus tsev ywj siab” (nqe 16). Zaj yogtoog no muaj lub ntsiab hais tias yog Vajntxwv Ahaj mus tua rog zaum no, nws yeej yuav tuag xwb xwb li, cov tubrog Yixalayees yuav zoo li pab yaj uas tsis muaj tus tswv yug thiab lawv yuav tau rov los tsev ywj siab vim tus vajntxwv siab phem twb tuag lawm.
Zaj yog toog thib ob, Tus cevlus Mikayas pom tus Tswv tabtom zaum saum Nws lub zwmtxwv, thiab Nws cov timtswv sawv ntawm Nws ob sab. Ntawd yog lub rooj sablaj ntsigtxog Vajntxwv Ahaj txojsia. Ib tug ntsujplig dag tau txib los tshoov Vajntxwv Ahaj cov cevlus kom lawv hais dag rau vajntxwv. Nyob ntawm no kuj muaj Vajtswv tej lus qhia hais tias Nws yuav ua rau Vajntxwv Ahaj raug puastsuaj yog hais tias vajntxwv mloog tej lus cev ntawd. Zaj yogtoog no qhia pom hais tias, txawm yog Vajntxwv Ahaj zaum saum nws lub zwmtxwv, los tsuas yog tus Tswv xwb thiaj yog tus tswjkav txhua yam. Nws tso cai kom muaj kev dag ntxias los raug Vajntxwv Ahaj tomqab uas vajntxwv tsis mloog tus Tswv lus thiab txiavtxim siab mus txeeb lub nroog Lamaus hauv cheebtsam Nkile-as rov los. Tus Tswv pub cai rau kev dagntxias xwb, Nws yeej tsis dag Vajntxwv Ahaj ib zaug li, vim Nws twb qhuab ntuas ncaj nraim rau vajntxwv los ntawm tej lus ceebtoom txog tej teebmeem uas vajntxwv yuav raug yog tsis mloog Nws lus. Vajntxwv Ahaj yuav tsum xaiv txojsia lossis txojkev tuag thiab nws xaiv txojkev tuag los ntawm qhov uas tsis ntseeg Vajtswv tej lus. Niaj hnub nimno, coob tug tsis txais yuav txojsia ntev dhawv mus ibtxhis thaum lawv tsis ntseeg Vajtswv Txojlus qhov tseeb, yog li ntawd Vajtswv ua rau lawv ua yuamkev, ua rau lawv ntseeg tej lus dag (II Thexalaunikes 2:9-11) thiab cia lawv mus ua phem ua qias ywj siab, lawv thiaj mus ua tej yam tsis tsimnyog ua (Loos 1:28).
Thaum peb ua tej yam tsis tsimnyog, tus Tswv kuj yuav qhuab ntuas, ua rau peb tsis qab siab hauv lubneej. Ntawd yog tus Tswv tes haujlwm hlub tshua kom peb lees txim, tso kev txhaum tseg rov los cuag Nws. Yog tus Tswv tsis qhuab ntuas tiamsis cia peb ua txhaum ywj siab raws nqaij tawv kev ntshaw ces peb yuav raug teebmeem, tiamsis Nws tsis ua li ntawd. Thaum zeem paub tus Tswv kev qhuab ntuas, paub qhov tseeb ntawm Nws Txojlus lawm, tiamsis yog peb tseem tsis ntseeg thiab tsis ua raws ces yog peb tabtom xaiv ntsib teebmeem zoo li Vajntxwv Ahaj (nqe 34).
Thov Vajtswv,
Tus Tswv, thov Koj zamtxim rau nyuam yaus vim muaj ntau zaus tawv ncauj tsis mloog Koj lus. Thov qhia nyuam yaus zeem paub thaum Koj qhuab ntuas kom nyuam yaus paub mloog lus thiab tso tej yam tsis haum Koj siab povtseg. Amees.
Thaum paub tus Tswv tej lus qhuab ntuas lawm, peb puas ntseeg thiab ua raws li Nws Txojlus lawm tau?
Nyeem Vajluskub hauv peb lub xyoo: Exekees 47
Kênh Youtube BHKTHN:
