Klei Aê Diê Blŭ: II Klei Yăl Dliê 18: 15-22.
Êlan kliăng: “…Ơ dam, đăm ngă klei amâo uêñ ôh kơ klei Khua Yang mkra mjuăt ih, leh anăn đăm êdu ai ôh tơdah Ñu bi kmhal ih” (Hêbrơ 12:5b).
Klei êmuh ksiêm mĭn: Ya klei Khua pô hưn êlâo Y-Mika ƀuh? Ya klei yuôm bhăn mơ̆ng klei bi ƀuh anei? Ti krah klei hdĭp leh anăn klei djiê, ya klei Mtao Ahap ruah? Ya knuih brei drei mâo sĭt thâo Aê Diê mkra mjuăt pô?
Wăt tơdah arăng arưp brei blŭ djŏ si klei Mtao Ahap čiăng ƀiădah khua pô hưn êlâo Y-Mika bi mklă knŏng blŭ ya klei Aê Diê mtă (êlan 13). Ñu hưn dua klei Aê Diê bi êdah kơ ñu. Klei bi êdah tal sa, ñu ƀuh jih Israel bra đuĕ mdê mdê ti dlông čư̆ msĕ si phung biăp amâo mâo mgăt ôh, leh anăn klei anei Yêhôwa mblang, “Phung anei amâo mâo khua ôh; brei grăp čô wĭt kơ sang ñu hŏng klei êđăp ênang” (êlan 16). Klei yuôm bhăn mơ̆ng klei bi êdah jing tơdah Mtao Ahap nao bi blah gưl anei klă sĭt srăng djiê, Israel srăng msĕ si biăp amâo mâo pô mgăt leh anăn grăp čô mnuih dưi mâo klei êđăp ênang wĭt kơ sang pô kyua sa čô mtao ƀai amâo lŏ mâo ôh.
Klei bi êdah tal dua, Khua pô hưn êlâo Y-Mika ƀuh Yêhôwa dôk ti jhưng mtao Ñu, mâo sa êpul kahan dôk đru bruă. Anei jing rup sa mmông phat kđi čiăng bi mklă klei hdĭp Mtao Ahap. Sa čô khua blŭ luar dưi tiŏ nao čiăng dưm hlăm ƀăng êgei phung khua pô hưn êlâo Mtao Ahap klei blŭ luar mplư mtao. Tinei ăt mâo Klei Aê Diê Blŭ srăng phat kđi kơ Mtao Ahap tơdah ñu hmư̆ klei hưn êlâo anăn. Klei bi êdah anei brei ƀuh wăt tơdah Mtao Ahap dôk ti jhưng mtao ƀiădah Yêhôwa yơh klă sĭt jing Mtao kiă kriê djăp klei dưi. Aê Diê brei klei mplư luar truh kơ Mtao Ahap leh mtao bi mklă nao blah ƀuôn Ramôt ti krĭng Galaat hrô kơ hlue ngă klei Aê Diê mtă. Aê Diê brei klei mplư luar truh amâo djŏ ôh Ñu mplư Mtao Ahap kyua Ñu klă sĭt ƀuah mkra ñu hŏng klei brei thâo ya klei srăng truh tơdah amâo đăo kơ Klei Aê Diê Blŭ. Mtao Ahap brei ruah klei hdĭp leh anăn klei djiê leh anăn ñu ruah leh klei djiê hŏng klei hngah đăo kơ Klei Aê Diê Blŭ. Hruê anei, lu mnuih hngah kơ klei hdĭp lă lar hlăk êjai ruah amâo đăo kơ klei sĭt nik mơ̆ng Klei Aê Diê Blŭ kyua anăn Aê Diê ngă kơ diñu lĕ hlăm klei soh čhuai, ngă kơ diñu đăo kơ klei luar (II Têsalônik 2:9-11) leh anăn jao diñu hlue si ai tiê jhat čiăng lĕ hlăm klei amâo năng (Rôma 1:28).
Hlăk êjai drei ngă klei amâo năng, Aê Diê ăt srăng ƀuah mkra ngă kơ drei ƀuh luč êđăp ênang hlăm ai tiê leh anăn hlăm klei hdĭp. Anăn jing bruă ngă klei pap Aê Diê čiăng drei kmhal, lui klei soh leh anăn lŏ wĭt kơ Ñu. Tơdah Aê Diê amâo ƀuah mkra ôh ƀiădah lui drei hdĭp hlăm klei soh pô, jao drei hlue si ai tiê jhat mơ̆ng kđeh asăr snăn amâo jăk ôh kơ drei, ƀiădah Ñu amâo ngă snăn ôh. Tơdah thâo klei Aê Diê ƀuah mkra, thâo klei sĭt nik hlăm Klei Aê Diê Blŭ ƀiădah drei amâo đăo ôh leh anăn amâo hlue ngă ôh jing drei dôk mă klei amâo jăk msĕ si Mtao Ahap (êlan 34).
Tơdah drei thâo Aê Diê ƀuah mkra kơ ya klei, drei đăo leh anăn hlue ngă klei Aê Diê mtă hlăm Klei Aê Diê Blŭ mơ̆?
Ơ Aê Diê, akâo kơ Ih pap brei kơ kâo kyua lu blư̆ kâo mâo ai tiê khăng amâo gưt asăp Aê Diê. Akâo kơ Ih đru kâo thâo klei Ih ƀuah mkra hlăm klei hdĭp kâo čiăng kâo gưt asăp lăm lui klei amâo mơak ai tiê Ih.
Dlăng Klei Aê Diê Blŭ hlăm tlâo thŭn: Y-Êsêkiêl 47
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
