I Vajntxwv 18:36-37
Nqe cim:
“Thov teb kuv lauj tus TSWV, thov teb kuv kom cov neeg no thiaj paub hais tias koj yog tus TSWV, tus Vajtswv uas tabtom coj lawv rov los cuag koj.” (I Vajntxwv 18:37)
Lus nug rau sawvdaws xav:
– Tus Cevlus Eliyas kev thov Vajtswv ntsib tej kev sim siab twg thiab thaum kawg zoo licas?
– Nws tej lus thov Vajtswv hais txog yam dabtsi?
– Peb kawm Tus Cevlus Eliyas tus qauv thov Vajtswv licas?
Ib tsoom cov mloog txhua tus,
Tus Cevlus Eliyas lubneej sab kev ntseeg nrog rau nws kev thov Vajtswv niaj hnub raug sim thiab yim hnub yim muaj zog tuaj. Vajluskub sau txog ntau zaug nws tej lus thov tau tus Tswv teb. Txawm tias “Eliyas yog ib tug neeg zoo li peb xwb” tiamsis tej lus thov Vajtswv kom ntuj qhuav peb lub xyoos txhais (I Vajntxwv 17:1; Yakaunpaus 5:17) yog ib qhov pib tseemceeb nyob hauv nws tes haujlwm. Txuas ntxiv, tus Tswv coj nws mus ntsib tej kev sim siab loj dua qub, uas yog thov Vajtswv pab tus pojntsuam hauv Xalefas tus tub uas tuag lawm muaj txojsia rov los (I Vajntxwv 17:20-22). Tus Tswv teb nws tej lus thov kom siv nws ua tau tej haujlwm loj heev ntxiv. Ntawd yog, thaum Tus Cevlus Eliyas tawmtsam vajntxwv Ahaj lub hwjchim thiab plaub puas tsib caug leej uas cev tus mlom Npa-as lus nrog rau plaub puas leej uas cev tus mlom pojniam Aselas lus. Tabmeeg ntawm vajntxwv thiab cov pejxeem ua timkhawv, Tus Cevlus Eliyas taij thov Vajtswv thiab thaum kawg yog kev muaj yeej rau tus Tswv Lub Npe, tus Tswv haivneeg thiaj tig rov los pehawm Nws.
Nyob hauv tej lus thov tus Tswv tso hluav taws los hlawv tej khoom fij, peb pom muaj tej yam tshwjxeeb. Thib ib, Tus Cevlus Eliyas hu tus Tswv lub npe ua Yehauvas, lossis tus Tswv Muaj Sia Zees Nyob, yog lub npe uas Vajtswv qhia rau Mauxes kom nco txog tus Tswv tej lus cogtseg rau Anplahas, Ixaj, thiab Yakhauj uas yog lawv cov yawgkoob. Tus Tswv Muaj Sia Zees Nyob yeej nco ntsoov Nws tej lus cogtseg rau lawv. Tus Tswv yeej tseem yog “cov Yixalayees tus Vajtswv” txawm tias lawv twb hnov qab Nws, tso Nws tseg mus pe tej mlom. Thib ob, Tus Cevlus Eliyas hais rau tus Tswv tias: “kuv yog koj tus tubtxib”, nws xav qhia rau sawvdaws paub hais tias txawm tias nws yog Tus Cevlus ua tau ntau yam txujci, los nws tsuas yog Vajtswv ib tug tubtxib xwb, nws ua tej uas tus Tswv kom nws ua thiab nws xav kom sawvdaws totaub hais tias tus Tswv tabtom tswjkav txhua yam thiab tus Tswv niaj hnub tsomkwm Nws haivneeg. Thib peb, lub homphiaj ntawm Tus Cevlus Eliyas tej lus thov Vajtswv yog kom cov pejxeem paub hais tias Vajtswv yog “tus TSWV” tus uas “tabtom coj lawv rov los” cuag Nws, kom lawv tau kev dim, tau txais Nws tej koob hmoov. Tus Cevlus Eliyas tsis khav txog nws tes haujlwm tiamsis nws paub meej hais tias nws tsuas yog ib tug tub txib ua haujlwm rau tus Tswv, ua vim tus Tswv, thiab lub homphiaj kawg ntawm nws tej lus thov yog kom sawvdaws zeem paub tus Tswv, tsis yog kom sawvdaws zeem paub nws, thaum kawg tus Tswv thiaj teb nws tej lus thov.
Kawm raws Tus Cevlus Eliyas tus qauv thov Vajtswv, peb yuav tsum thov los ntawm nplooj siab txo hwjchim, vamkhom tus Tswv thiab nco ntsoov hais tias tus Tswv teb peb tej lus thov vim Nws Lub Npe, Nws Nplooj Siab, Nws Lub Tebchaws thiab vim Nws hlub tshua peb. Qhov kev zeem paub no yuav pab peb paub thov Vajtswv haum tus Tswv siab kom tau Nws teb peb tej lus thov.
Thov Vajtswv,
Peb Leej Txiv tus uas nyob saum Ntuj Ceeb Tsheej. Thov qhia nyuam yaus txhob taij thov raws tus kheej siabnyiam tiamsis taij thov los ntawm nplooj siab xav thov kom sawvdaws hwm Koj lub npe, cia Koj lub tebchaws los, cia muaj raws li Koj lub siabnyiam rau hauv ntiajteb ib yam li saum ntuj ceeb tsheej. Nyuam yaus tuav Yexus Khetos lub npe thov, Amees.
Peb puas thov Vajtswv vim Nws Lub Npe kom txhua tus zeem paub thiab hlub tus Tswv heev dua qub lawm tau?
Nyeem Vajluskub hauv peb lub xyoos: Ntawv Nkauj 35-36
Kênh Youtube BHKTHN:
