Klei Aê Diê Blŭ: I Bruă Mtao 18:36‑37
Êlan kliăng: “Lŏ wĭt lač kơ kâo bĕ, Ơ Yêhôwa, lŏ wĭt lač kơ kâo bĕ, čiăng kơ phung ƀuôn sang anei dưi thâo Ih yơh, Ơ Yêhôwa, jing Aê Diê, leh anăn Ih dơ̆ng lŏ bi wĭt ai tiê diñu” (I Bruă Mtao 18:37)
Klei êmuh ksiêm mĭn: Si klei lông dlăng hlăm klei khua pô hưn êlâo Y‑Êli wah lač leh anăn ya boh tŭ dưn mâo? Ya mta klei bi knăl hlăm klei ñu wah lač? Si drei hriăm mơ̆ng khua pô hưn êlâo Y‑Êli hlăm klei ñu bi hmô kơ klei wah lač?
Klei khua pô hưn êlâo Y‑Êli hdĭp hlăm klei đăo leh anăn wah lač, mâo klei lông dlăng nanao leh anăn ƀrư̆ hruê ktang hĭn. Klei Aê Diê Blŭ čih lu klei ñu wah lač Aê Diê wĭt lač hŏng klei yuôm bhăn. Wăt tơdah ñu “Y‑Êli jing mnuih msĕ si drei” ƀiădah ñu wah lač čiăng kơ adiê amâo hjan ôh êjai tlâo thŭn năm mlan (I Bruă Mtao 17:1; Y‑Yakơ 5:17) jing kčưm dơ̆ng năng hdơr hlăm bruă ñu. Êdei anăn, Aê Diê atăt ñu truh kơ klei lông dlăng prŏng hĭn, wah lač akâo kơ anak êkei mniê djiê ung ti ƀuôn Sarepta dưi lŏ hdĭp (I Bruă Mtao 17:20‑22). Aê Diê hmư̆ leh anăn wĭt lač čiăng lŏ yua ñu hlăm bruă prŏng hĭn mơh. Anăn jing hlăk khua pô hưn êlâo Y‑Êli tlă anăp hŏng klei dưi jhŏng ktang mtao Y‑Ahap leh anăn pă êtuh êma pluh čô khua pô hưn êlâo yang Baal mbĭt hŏng pă êtuh čô khua pô hưn êlâo yang Asêra. Ti anăp mtao leh anăn jih jang phung ƀuôn sang, ñu myơr klei wah lač leh anăn boh tŭ dưn jing klei dưi hĭn kơ Anăn Aê Diê, phung ƀuôn sang lŏ wĭt kkuh mpŭ kơ Ñu.
Hlăm klei wah lač akâo kơ Aê Diê čuh mnơ̆ng myơr čuh, drei ƀuh mâo dŭm mta klei bi knăl msĕ snei, tal êlâo hĭn, khua pô hưn êlâo Y‑Êli iêô Anăn Yêhôwa, jing Aê Diê Pô mâo mơ̆ng ênuk hlŏng lar, jing Anăn Aê Diê tuôm bi êdah leh kơ Y‑Môis čiăng lŏ mñă bi hdơr kơ klei bi mguôp Aê Diê hŏng phung aê đưm Y‑Abraham, Y‑Isăk, leh anăn Y‑Yakôp. Aê Diê Pô Dôk Hlŏng lar ăt djă pioh nanao klei Ñu ƀuăn hŏng diñu. Aê Diê ăt jing “Aê Diê hlăm phung Israel” wăt tơdah diñu wơr bĭt Aê Diê, lui wir Aê Diê nao kkuh mpŭ kơ rup yang dưn. Tal dua, khua pô hưn êlâo Y‑Êli lač hŏng Aê Diê, “kâo jing dĭng buăl Ih”, ñu čiăng kơ jih jang mnuih thâo săng wăt tơdah ñu jing khua pô hưn êlâo tuôm ngă lu klei yuôm bhăn, ƀiădah ñu ăt knŏng jing sa čô dĭng buăl hơăi mang kơ Aê Diê, ñu gưt ngă klei Khua Yang čiăng nanao, leh anăn ñu čiăng kơ jih jang mnuih thâo săng Aê Diê dôk gĭt gai leh anăn kiă kriê phung ƀuôn sang Ñu. Tal tlâo, klei wah lač kñăm čiăng kơ “phung ƀuôn sang anei dưi thâo Ih yơh, Ơ Yêhôwa, jing Aê Diê, leh anăn Ih dơ̆ng lŏ bi wĭt ai tiê diñu” čiăng kơ diñu dưi mâo klei bi mtlaih, čiăng kơ Aê Diê hơêč hmưi. Khua pô hưn êlâo amâo hưn ktưn kơ bruă ñu jing khua pô hưn êlâo ôh, ƀiădah ñu thâo săng nanao kơ ñu pô knŏng jing sa čô dĭng buăl ngă bruă tui si klei Aê Diê čiăng, kyua Anăn Aê Diê, leh anăn klei kñăm čiăng phŭn kơ klei wah lač čiăng kơ jih jang mnuih thâo kơ Aê Diê, amâo djŏ thâo kơ ñu pô ôh, boh tŭ dưn Aê Diê wĭt lač kơ klei ñu wah lač.
Hriăm mơ̆ng khua pô hưn êlâo Y‑Êli klei bi hmô wah lač, brei drei wah lač hŏng ai tiê klei mĭn luă gŭ, đăo knang kơ Khua Yang leh anăn hdơr snei, Khua Yang hmư̆ leh anăn wĭt lač klei drei wah lač kyua Anăn Ñu, kyua klei Ñu čiăng, kyua Ƀuôn Ala Mtao Ñu leh anăn kyua klei jăk Aê Diê khăp pap kơ drei. Thâo săng klei anei srăng đru drei wah lač djŏ tui si klei Aê Diê čiăng leh anăn Aê Diê srăng wĭt lač.
Si ngă drei wah lač kyua Anăn Khua Yang čiăng kơ jih jang mnuih thâo kral leh anăn huĭ mpŭ kơ Aê Diê hĭn mơ̆?
Wah lač: Ơ Ama hmei dôk hlăm Adiê ơi. Brei kâo amâo wah lač tui si klei kâo čiăng ôh, ƀiădah wah lač nanao hŏng ai tiê klei mĭn brei Anăn Ama mâo klei mpŭ, Ƀuôn Ala Mtao Ama srăng truh, Klei Ama čiăng srăng jing ti lăn ala msĕ si hlăm Adiê. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Mmuñ Hđăp 35‑36
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
