II Kauleethaus 9:1-7
Nqe cim:
“Nej yuav tsum nco ntsoov hais tias tus uas cog tsawg nws yeej yuav tau sau tsawg. Tus uas cog ntau nws yeej yuav tau sau ntau. Yog li ntawd nyias yuav tsum muab raws li nyias twb xwb xav tseg lawm, tsis yog yuav khuvxim lossis yus yuav yuam yus lub siab muab.” (II Kauleethaus 9:6-7).
Lus nug rau sawvdaws xav:
– Cov ntseeg hauv Kauleethaus lub siab pab cov ntseeg nram Yeluxalees zoo li cas?
– Timthawj Paulus hais txog tus cai fij khoom li cas?
– Peb fij khoom li cas kom haum Vajtswv lub siab nyiam?
Timthawj Paulus xa tsab ntawv tim ob no mus rau cov ntseeg hauv lub nroog Kauleethaus thiab thoob plaws lub xeev Akhayas, tsis yog nqua hu pab nyiaj, vim qhov uas pab nyiaj rau cov ntseeg yog tes haujlwm uas lawv twb paub thiab pib ua ntej ntawd lawm tiamsis tseem ua tsis tau tiav (nqe 2). Vim lawv lub siab kub lug xav pab thiaj ua rau cov ntseeg hauv lub xeev Makedaunias zoo siab hlob pab. Yog li, hauv tsab ntawv no Timthawj Paulus tsuas txhawb zog thiab qhuas txog lawv lub siab pab nyiaj xwb. Dhau ntawd, Paulus qhia paub hais tias yuav muaj neeg tuaj nqa cov nyiaj pab ntawd, lawv cia li npaj kom txhij raws li uas twb hais tseg ua ntej lawm, kom thaum lawv mus txog lawv pom hais tias yog lawv zoo siab muab tsis yog yuam kom muab (nqe 5).
Cia kom txhawb cov ntseeg hauv nroog Kauleethaus lub zog, Timthawj Paulus qhia txog tus cai fij khoom lossis pab nyiaj, “Nej yuav tsum nco ntsoov hais tias tus uas cog tsawg nws yeej yuav tau sau tsawg. Tus uas cog ntau nws yeej yuav tau sau ntau.”(nqe 6). Qhov no yog tus cai uas Vajntxwv Xalumoos qhia hauv Pajlug 11:24-25: “Muaj qee leej siv lawv tej nyiaj txiag lawm laub lug los lawv tseem muaj txiag npluanuj, tiamsis muaj ibtxhia qia dub kawg los lawv pluag kawg li. Ua neeg siab dawb siab zoo, koj lub neej thiaj yuav vammeej. Pab lwm tus, luag thiaj yuav pab koj.” Qhov uas Timthawj Paulus hais txog tsis yog fij khoom kom tau txais ntau dua, tiamsis yuav tsum yog pib hauv lub siab tiag tiag tuaj, tsis yog raug yuam muab lossis muab vim ib yam dabtsi, thiab kuj tsis khuvxim, “rau qhov Vajtswv hlub tus uas zoo siab hlo muab” (nqe 7b). Yog li, tus cai tseb thiab sau uas Timthawj Paulus hais tsis yog qhov uas tseb ntau ces yuav tau sau ntau, tiamsis nyob ntawm qhov uas peb tseb, txhais tau hais tias lub siab muab thiab tus cwjpwm muab.
Nimno, tej zaum qhov peb fij khoom ntau dua, muab ntau tshaj lwm tus tiamsis yog tsis fij tas lub siab, tsuas muab kom tau ntsejmuag lossis raug yuam muab, lossis fij vim ib qhov vimchiv twg ces Vajtswv yuav tsis zoo siab rau peb txojkev fij khoom. Raws li Timthawj Paulus qhia, fij khoom haum tus Tswv siab, peb yuav tsum muab fij raws li Vaj Ntsujplig qhia, thiab thaum fij, peb tsis txhob cia ib yam dabtsi yuam peb muab, rau qhov peb twb thov Vajtswv thiab txaus siab hlo fij lawm.
Thov Vajtswv,
Nyuam yaus tus Vajtswv! Koj pub rau nyuam yaus muaj sijhawm fij khoom pab Koj tes haujlwm. Thov Koj pab kom qhov uas nyuam yaus fij ntawd haum Vajtswv Koj lub siab, tsis yog fij raws li nyuam yaus xav. Amees.
Peb puas muaj lub siab fij khoom tiag tiag thiab txaus siab hlo?
Nyeem Vajluskub hauv peb lub xyoo: Amaus 4
Kênh Youtube BHKTHN:
