Mika 6:1-8
“Pơhrăm iŏk bĕ tơdrong ‘lơ̆ng, chă lu tơdrong tơpăt” (Êsai 1:17a)
Nơ̆r jet tơchĕng pơwao:
– ‘Bok Kei-Dei tơ’blŏk kơ kon pơlei Isơrael tơdrong kiơ păng lu sư tơl thoi yơ?
– ‘Bok Mika bơngai khan lê̆ adrol tơbăt Kră Yang wă tơdrong kiơ đơ̆ng lu sư?
– Kon Kră Yang kăl kơ druh kiơ̆ tơdrong ‘lơ̆ng tơpăt thoi yơ?
Kră Yang ‘Bok Kei-Dei tơ’blŏk kơ kon pơlei Sư gah tơdrong tơpăt Kră Yang păng tơ’bôh kơ lu sư pơm hloi tơdrong tơpăt noh thoi yơ. Adrol hloh, Kră Yang tơ’blŏk ming dơ̆ng dôm tơdrong Sư đei pơm kơ kon pơlei Sư: Dŏng kon pơlei Isơrael đơ̆ng dêh Êyiptơ, chông anhăk lu sư hlôi đơ̆ng tơdrong hli krê păng bơwei tơgŭm lu sư (trong 3-5). Arih ‘lơ̆ng tơpăt ling lang pơtơm hăm tơdrong chih răk tơdrong băt bơnê kơ Kră Yang. Đơ̆ng rŏng kơ mơ̆ng nơ̆r Kră Yang bơtho tơ’blŏk ăn kơ kon pơlei tơl tơwih hăm minh nơ̆r jet: “Inh gô chĕp tơmam kiơ ‘bơ̆t anăp Kră Yang…” (trong 6a). Lu sư tơchĕng lu sư gô chĕp tơmam ‘lơ̆ng rŏ pơyơ̆r kơ Kră Yang wă huai iŏk tơdrong yoch (trong 6b-7). Mălei Kră Yang ưh kơ đei chơ chă pơthim dơ̆ng tơdrong giĕng. Sư chă lu jơhngơ̆m băt chu yom păng chăl arih gơh tơplih arih kiơ̆ thoi Kră Yang wă. Mika bơngai khan lê̆ adrol đei tơlĕch nơ̆r tơl hơđăl dêh đơ̆ng ‘Bok Kei-Dei lăm trong 8 khan: “Ơ kon bơngai: Tơdrong mă Kră Yang wă kơ ih pơm ‘lơ̆ng tơpăt, wă kơ đei tơdrong ‘mêm mơnat păng yak năm hăm jơhngơ̆m iơ̆m dim, pơyom kơ ‘Bok Kei-Dei ưh?” Blŭng a Kră Yang wă đơ̆ng kon pơlei Sư noh bơih tơdrong ‘lơ̆ng tơpăt.
Arih ‘lơ̆ng tơpăt wă khan rơih iŏk tơdrong trŏ mă khan lăm tơdrong hmă đĕch, ưh kơ đei bu ‘bôh. ‘Noh bơih tơpăt lăm tơdrong tơpăt sĭt lăm dôm tơdrong tơ’bưh băl. Tơpă ưh kơ sĭ lăp ‘bơm lu tơdrong jang pơgơ̆r dah mă sek tơlang đĕch ôh, na kư̆m ‘bơm bơ̆n kơdih hai. ‘Noh bơih trong mă bơ̆n arih sa hăm bơngai mă rơdu tơrăn hloh kơ bơ̆n, trong mă bơ̆n yua tơdrong pran bơ̆n kơdih, păng trong mă jơhngơ̆m bơ̆n tơ’bôh kơplah ưh kơ đei bu ‘bôh băt. Pơm tơdrong tơpăt kư̆m wă khan hơmet tơdrong arih bơ̆n kiơ̆ thoi Kră Yang ‘Bok Kei-Dei hơgăt ưh kơ sĭ kiơ̆ kơdih bơ̆n. Sơ̆p hla bơar ‘Bok Kei-Dei ling lang bơtho kơ bơ̆n thoi âu Kră Yang ‘Bok Kei-Dei lăng lăm jơhngơ̆m (I Samuel 16:7). Kră Yang hiơ̆k lăng tơ tơdrong jang bơ̆n bơ̆jang. Arih ‘lơ̆ng tơpăt kăl kơ đei tơdrong iŏk đon ala, wă hơmet tơdrong glăi, tơbral păng tơplih kơplah nơ̆r Kră Yang roi tơbăt tơdrong yoch bơ̆n.
Druh kiơ̆ tơdrong hơgăt noh rim ‘nu kon Kră Yang kăl kơ pơm păng noh kư̆m tơdrong Kră Yang wă kơ rim ‘nu bơngai kăl kơ đei păng tơ’bôh tơdrong Kră Yang, Tơ’ngla tơpăt tôm tơdrong păng ‘lơ̆ng dêh. Arih lăm dêh char na tơdrong ưh kơ tơpăt lơ dêh păng tơpă ngăl ưh kơ hiơ̆k, Kră Yang oei krao athei lu kon Sư arih ‘lơ̆ng tơpăt. Kơplah bơ̆n rơih iŏk tơdrong trŏ hơđăl, ưh kơ kăl kơ đe băt păng iŏk đon ala, bơ̆n ưang kơ ‘Bok Kei-Dei, Tơ’ngla đei bơtho lu bơ̆n tơdrong kiơ jơ̆ ‘lơ̆ng.
Ơ Kră Yang, apinh Ih tơgŭm inh ling lang druh kiơ̆ tơdrong ‘lơ̆ng tơpăt lăm tơdrong arih inh rim năr, ăn kơ inh đĭ jơhngơ̆m chu yom thoi Kră Yang lăp đon wă kơ tơdrong arih inh ling lang ưang anăn Ih. Krao khan yua anăn Kră Yang Yêsu Krist, Amen.
Dôm tơdrong kiơ lăm tơdrong arih bơ̆n rim năr gơh tơplih thoi Kră Yang lăp đon?
Đŏk Sơ̆p hla bơar ‘Bok Kei-Dei lăm pêng sơnăm: Markôs 13
Kênh Youtube BHKTHN:
