Loos 5:7-8
Nqe cim:
“Tiamsis Vajtswv qhia rau peb hais tias Vajtswv hlub peb kawg li, rau qhov thaum peb tseem ua neeg txhaum Yexus Khetos tuag txhiv peb.” (Loos 5:8)
Lus nug rau sawvdaws xav:
– Thaum twg ib tug neeg mam kam tuag hloov?
– Qhov twg yog qhov tshwjxeeb hauv Tswv Yexus txojkev tuag txhiv?
– Peb zeem paub li cas txog Vajtswv txojkev hlub?
Tuag hloov lwm tus chaw yog tes haujlwm uas muaj nqis heev. Tej zaum peb yuav nyeem tau tej zaj lus hais txog ib leejniam, ib leej txiv txaus siab hlo tuag hloov cov menyuam; ib tug thawj tubrog txaus siab tuag kom cawm tau nws tus thawjcoj, nws pab tubrog. Yog tibneeg, leejtwg los kuj hlub yus txojsia. Vim tsevneeg, haivneeg, tus neeg zoo kuj muaj cov neeg kam tuag hloov lwm tus chaw. Tiamsis tus uas ua tau li ntawd mas muaj tsawg kawg nkaus zoo li Timthawj Paulus hais, “Qhov uas ib tug twg yuav tuag theej tus neeg ncaj ncees, mas nyuaj kawg li. Tiamsis tej zaum yuav muaj qee leej txaus siab tuag theej tus neeg zoo thiab.” (Loos 5:7).
Txawm li ntawd, muaj ib tug neeg kam tuag theej tshwjxeeb, tus ntawd yog Tswv Yexus tuag theej neeg ntiajteb, “thaum peb tseem ua neeg txhaum Yexus Khetos tuag txhiv peb” (Loos 5:8). Thaum peb tseem qhuas cov neeg uas kam tuag theej yam zoo, muab txojsia mus them cov neeg tsimtxiaj, ces Tswv Yexus txojkev tuag hloov tshwjxeeb dua. Vim cov neeg uas Nws tuag hloov chaw yog cov neeg txhaum uas tawmtsam Vajtswv!
“Thaum peb tseem ua neeg txhaum” – nov yog kev txhaum khavtheeb, qia qub, ntshaw, nyiam ua txhaum, sib ntxub… thiab qhov kev txhaum loj tshaj yog tsis ntseeg Vajtswv, ces Vajtswv twb qhia tshwm Nws txojkev hlub peb. Vajtswv tsis tos kom peb ua tau neeg zoo mam li hlub. Vajtswv tsis tos kom peb hloov kev ntsia tshiab txog Nws Nws mam li hlub. Peb yeej ua tsis tau neeg zoo thiab kuj tawv ncauj tsis mloog Vajtswv lus. Tiamsis thaum peb tseem tabtom yog cov neeg uas tsis tsimnyog tau hlub, thiab yog cov neeg txhaum tsimnyog tuag los Vajtswv cia li hlub peb, tso Tswv Yexus los tuag txhiv peb zoo li Timthawj Yauhas tau hais: “Txojkev hlub lub ntsiab yog li no: Tsis yog peb hlub Vajtswv, tiamsis yog Vajtswv hlub peb thiab Nws txib Nws tus Tub los tuag theej peb lub txhoj, Vajtswv thiaj zam tau peb lub txim.” (I Yauhas 4:10).
Yog tus neeg uas tau txais txojkev hlub loj kawg nkaus lawm, peb tsis txhob ua tus uas pheej ua kev txhaum, niaj hnub tawmtsam Vajtswv ntxiv. Peb yuav tsum cia Vajtswv txojkev hlub hloov peb lub meejmom, kom txhua hnub hlub tus Tswv zuj zus, thiab hlub cov neeg nyob ibncig peb heev dua. Qhov no puas yog peb lub siab ua rau lub caij ua koob tsheej nco txog Tswv Yexus raug txomnyem xyoo no lossis tsis yog?
Thov Vajtswv,
Vajtswv tus uas muaj kev hlub, nyuam yaus ua Koj tsaug vim Koj txojkev hlub loj kawg nkaus qhia rau nyuam yaus paub los ntawm Tswv Yexus txojkev tuag txhiv. Thov Koj pab kom nyuam yaus hloov tshiab txhua hnub kom tsimnyog Koj txojkev hlub, thiab qhia tawm txojkev hlub ntawd rau cov neeg nyob ibncig. Nyuam yaus tuav Tswv Yexus lub npe thov, Amees.
Peb yuav pauj tus Tswv txojkev hlub zoo li cas?
Nyeem Vajluskub hauv peb lub xyoo: II Vajntxwv 10
Kênh Youtube BHKTHN:
