Klei Aê Diê Blŭ: Rôm 5:7-8
Êlan kliăng: “Ƀiădah Aê Diê bi êdah klei Ñu khăp kơ drei snei, êjai drei ăt jing mnuih soh Krist djiê kyua drei” (Rôm 5:8)
Klei êmuh ksiêm mĭn: Hbĭl arăng jhŏng djiê hrô brei kơ sa čô mnuih? Ti anôk mdê hlăm klei Yêsu Krist djiê hrô brei? Si drei ƀuh kơ klei khăp Aê Diê?
Djiê hrô brei kơ mnuih mkăn jing sa bruă ngă yuôm bhăn snăk. Năng ai drei tuôm dlăng leh klei čih yăl dliê kơ sa čô amĭ, sa čô ama jhŏng săn asei mlei čiăng bi mtlaih anak diñu; sa čô khua kahan săn asei mlei čiăng bi mtlaih klei hdĭp sa čô khua gĭt gai, bi mtlaih jih phung kahan mơ̆ng kngan phung roh. Jing mnuih, jih jang hơiêng hơưi sơăi kơ klei hdĭp ñu pô. Ƀiădah lĕ, mâo hlăm đa đa klei msĕ si kyua klei tŭ dưn kơ gŏ sang, kơ găp djuê, kyua čiăng bi mtlaih klei hdĭp sa čô mnuih jăk ăt mâo mơh pô jhŏng djiê hrô brei. Ƀiădah sĭt nik anăn jing klei dleh snăk mâo msĕ si Khua ƀĭng kna Y-Pôl lač leh: “Dleh snăk mâo sa čô mnuih srăng djiê kyua sa čô mnuih kpă; ƀiădah năng ai mâo sa čô mnuih jhŏng djiê kyua sa čô mnuih jăk” (Rôm 5:7).
Ƀiădah lĕ, mâo sa klei djiê hrô brei bŏ hŏng klei yuôm bhăn, anăn jing, klei Khua Yang Yêsu Krist djiê hrô brei kơ lăn ala. “êjai drei ăt jing mnuih soh Krist djiê kyua drei” (Rôm 5:8). Êjai arăng bi mni kơ phung jhŏng săn asei kơ sa mta bruă prŏng, djiê hrô brei kơ phung mâo klei năng snăn klei Khua Yang Yêsu djiê hrô brei jing mdê snăk. Kyuadah phung Ñu djiê hrô brei jing phung mnuih soh, jing phung roh hŏng Aê Diê!
“Êjai drei ăt jing mnuih soh” – klei soh anăn jing: klei mgao, klei čuôt klih, klei tluh, klei kđeh tluh, klei bi roh…leh anăn klei soh ktrŏ hĭn jing klei hngah kơ Aê Diê, snăn Aê Diê bi êdah leh klei Ñu khăp kơ drei, Ñu khăp kơ drei amâo guôn drei jing jăk klă ôh. Sĭt nik drei amâo srăng dưi jing jăk klă ôh leh anăn jing phung khăng kŏ snăk hŏng Aê Diê. Ƀiădah lĕ, êjai drei kluôm dhuôm amâo mâo klei năng ôh, leh anăn jing phung soh năng hŏng klei djiê, snăn yơh Aê Diê bi êdah leh klei Ñu khăp kơ drei hŏng klei Khua Yang Yêsu djiê hrô brei msĕ si Khua ƀĭng kna Y‑Yôhan lač leh snei: “Hlăm klei anei jing klei khăp, amâo djŏ drei khăp leh kơ Aê Diê ôh, ƀiădah Aê Diê khăp leh kơ drei, leh anăn tiŏ hriê Anak Ñu jing mnơ̆ng ngă yang bi tui klei soh drei” (I Y-Yôhan 4:10).
Jing phung mă tŭ leh klei khăp prŏng amâo mâo knhal anăn, amâo dưi ôh drei ăt jing mnuih soh nanao, ăt lŏ hdĭp msĕ si phung bi kdơ̆ng hŏng Aê Diê, ƀiădah brei drei brei Aê Diê bi mlih jih klei drei jing, čiăng grăp hruê drei khăp kơ Khua Yang hĭn, leh anăn khăp kơ pô riêng gah hĭn msĕ mơh. Djŏ mơ̆ anăn jing klei mĭn grăp čô drei hlăm Yan bi hdơr klei Khua Yang tŭ klei knap mñai leh anăn kbiă lŏ hdĭp thŭn anei?
Si ngă drei srăng lŏ wĭt ngă hŏng klei khăp Khua Yang?
Wah lač: Ơ Aê Diê, kâo lač jăk kơ Ih lu êdimi, kyuadah Ih bi êdah leh kơ kâo klei khăp prŏng Ih hŏng klei Khua Yang Yêsu tŭ klei djiê. Akâo Ih bi mlih kâo grăp hruê čiăng kâo jing năng hŏng klei khăp Ih, leh anăn čiăng kâo bi êdah klei khăp anăn kơ phung riêng gah kâo. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: II Bruă Mtao 10
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
