II-Kauleethaus 7:8-11
Nqe cim:
“Rau qhov qhov uas Vajtswv cia nej tu siab, qhov ntawd ua rau nej tso nej tej kev txhaum tseg kom nej tau txojkev cawm dim. Yog li ntawd tsis tas leejtwg yuav tu siab. Tiamsis cov neeg uas tsis ntseeg Vajtswv txawm yog lawv paub tu siab rau lawv tej kev txhaum los yog lawv tsis tso tseg, lawv yeej yuav raug kev ploj kev tuag.” (II-Kauleethaus 7:10).
Peb saib phau txhais HMOWSV:
“Vim qhov uas ntxhov siab raws li Vajtswv pom zoo yuav coj mus txog txojkev dim thiab tsis ua kom muaj kev nyuaj siab, tiamsis qhov uas ntxhov siab raws li ntiajteb yuav coj mus txog kev tuag”
Lus nug rau sawvdaws xav:
- Lub vimchiv twg ua rau cov ntseeg hauv nroog Kauleethaus tu siab?
- Txojkev tu siab ntawm cov ntseeg pab lawv muaj lub neej thiab ua rau Timthawj Paulus zoo siab li cas?
- Thov cais txojkev tu siab raws li ntiajteb thiab tu siab raws li Vajtswv pom zoo?
- Peb twb tau txais qhov no zoo li cas?
Tom qab uas xa thawj tsab ntawv mus rau cov ntseeg hauv lub nroog Kauleethaus, Timthawj Paulus muaj kev nyuaj siab vim xav hais tias nws ua rau lawv muaj kev nyuaj siab (II-Kauleethaus 2:1-4). Tiamsis tom qab uas hnov Titus hais, Timthawj Paulus zoo siab heev, txawm yog tsab ntawv ua ntej hais tawmtsam lawv tej kev txhaum ua rau lawv nyuaj siab los qhov kev tu siab ntawd ua rau lawv muaj kev lees txim, vim “qhov uas nej tu siab ntawd ua rau nej tso nej tej kev txhaum tseg” (nqe 9). Qhov no yog tu siab raws li Vajtswv lub siab nyiam, ib qhov kev tu siab vim zeem paub tej kev txhaum thiab tso kev txhaum tseg kom tau kev cawm dim. Kev tu siab raws li ntiajteb yog tu siab vim tej teebmeem, tas kev cia siab hauv lub neej thiab tej nqi zog ntawm txojkev txhaum ua rau raug kev ploj tuag (nqe 10).
Thawj tsab ntawv, Timthawj Paulus tsis ntshai hais tawm qhov kev txhaum uas ib tug ntseeg ua hauv Pawg Ntseeg lawv tsis pab daws. Thaum nyeem txog cov lus hais tej kev txhaum ntawd, lawv zeem paub thiab paub tu siab txog tej uas lawv tau ua txhaum rau Vajtswv. Thiab thaum nyeem tsab ntawv yog kev tawmtsam tus cwjpwm zais kev txhaum thiab ntuas tus ua txhaum. Nimno lawv qhia tawm rau txhua tus paub hais tias lawv yog neeg dawbhuv txhua yam (nqe 11).
Dhau zaj kawm hnub no, peb paub txojkev tu siab raws li Vajtswv lub siab nyiam muaj nqis rau ntau leej vim paub tso kev txhaum tseg los txais txojkev cawm dim, txawm yog li los, cov neeg lees yuav qhov zoo tsawg heev. Muaj qee zaug peb meem txom, ntxub tus neeg uas hais tawm tej kev txhaum peb ua. Lossis thaum pom yus cov kwvtij ua txhaum, tiamsis ntshai lawv tu siab lossis ntxub yus, yog li peb cia nyob twjywm tsis kam hais qhov tseeb pab kom paub thiab tso kev txhaum tseg. Cia li xav txog qhov muaj nuj nqis rau cov kwvtij ntseeg thiab hais qhov tseeb kom peb muaj kev zoo siab ib yam li Timthawj Paulus.
Thov Vajtswv,
Vajtswv! Ua tsaug uas Koj niaj hnub pub muaj sijhawm tso kev txhaum tseg. Thov Koj pab kom nyuam yaus mloog tej lus ntuas kom muaj kev tu siab raws li Koj siab nyiam tso kev txhaum tseg, dua li ua neej tu siab raws li ntiajteb tsis tso kev txhaum tseg. Amees.
Peb puas txaus siab hlo cia muaj kev tu siab raws li Vajtswv pom zoo kom peb tso tau tej kev txhaum tseg?
Nyeem Vajluskub hauv peb lub xyoos: Yelemis 48:26-47
Kênh Youtube BHKTHN:
