Klei Aê Diê Blŭ: II Kôrantô 7:8-11
Êlan kliăng: “Kyuadah klei ênguôt tui si Aê Diê čiăng mjing klei kmhal kơ klei soh atăt kơ klei bi mtlaih, leh anăn amâo mâo pô tuôm hƀlŏk ôh kơ klei anăn. Ƀiădah klei ênguôt tui si lăn ala bi truh klei djiê” (II Kôrantô 7:10)
Klei êmuh ksiêm mĭn: Ya mta phŭn ngă kơ phung đăo Kôrantô ênguôt hnĭng? Ya boh tŭ klei ênguôt phung đăo Kôrantô ngă kơ Khua ƀĭng kna Y‑Pôl hơ̆k mơak? Si klei mdê klei ênguôt hnĭng hlue si lăn ala leh anăn klei ênguôt hnĭng hlue si Aê Diê? Si drei thâo kơ klei anei?
Leh mơĭt hră tal sa kơ phung đăo ti Sang Aê Diê Kôrantô, Khua ƀĭng kna Y‑Pôl mâo mơh klei hƀlŏk kyua bi mĭn ñu ngă kơ digơ̆ ênguôt (II Kôrantô 2:1-4). Ƀiădah leh hmư̆ klei mơak Y‑Tit hưn, Khua ƀĭng kna Y‑Pôl hơ̆k mơak snăk kyua wăt tơdah hră lač klei soh ngă kơ phung đăo ti Kôrantô ênguôt ƀiădah klei ênguôt hnĭng anăn ba kơ digơ̆ klei kmhal, kyua “…ênguôt tơl diih kmhal kơ klei soh” (êlan 9). Anei jing klei ênguôt hlue si klei Aê Diê čiăng, djăp klei ênguôt kyua thâo klei soh pô tơl truh kơ klei kmhal čiăng dưi mâo klei bi mtlaih. Bi ênguôt tui si lăn ala jing ênguôt kyua klei rŭng răng hlăm klei hdĭp leh anăn kyua boh jhat mơ̆ng klei soh jing luč klei čang hmăng leh anăn klei djiê (êlan 10).
Hlăm hră tal sa, Khua ƀĭng kna Y‑Pôl amâo huĭ ôh lač klă kơ klei soh kjham snăk mơ̆ng sa čô đăo tinei ƀiădah Sang Aê Diê amâo msir mgaih ôh. Leh dlăng klei čih lač kơ klei soh anăn, diñu thâo leh anăn ƀuh ênguôt kơ klei soh diñu hŏng Aê Diê. Leh anăn klei diñu ngă leh dlăng hră jing bi mklă bi kdơ̆ng hŏng knuih amâo hlue gưt mơ̆ng pô ngă soh leh anăn jih ai tiê ƀuah mkra pô mâo klei soh. Ară anei diñu bi mklă kơ grăp čô mnuih thâo diñu doh jăk hlăm djăp mta klei (êlan 11).
Mơ̆ng klei hriăm hruê anei, drei thâo klei ênguôt tui si Aê Diê čiăng ba lu klei tŭ dưn kyua thâo kmhal klei soh atăt kơ klei bi mtlaih hlăm mngăt, wăt tơdah snăn, msĕ si ƀiă snăk mnuih tŭ kơ klei jăk anei. Lu blư̆ drei khăng bi êdah amâo ư ôh, boh nik bi êmut sĭt mâo pô lač kơ klei soh pô. Amâodah sĭt ƀuh ayŏng amai adei pô ngă soh, ƀiădah kyua huĭ digơ̆ ênguôt amâodah huĭ kơ klei rŭng răng anăn drei khăng dôk ñăt kriêp amâo jhŏng lač ôh klei sĭt nik čiăng đru kơ ayŏng adei pô thâo leh anăn kmhal. Brei drei bi mĭn kơ klei tŭ ayŏng amai adei leh anăn phung hlăm sa klei đăo leh anăn lač klei sĭt nik čiăng drei mâo nanao klei mơak msĕ si Khua ƀĭng kna Y‑Pôl.
Drei mprăp mơ̆ klei ênguôt tui si Aê Diê čiăng čiăng kmhal klei soh pô?
Wah lač: Ơ Aê Diê! Kâo bi mni kơ Ih brei nanao kơ kâo klei găl kmhal klei soh. Akâo kơ Ih đru kâo hmư̆ klei ƀuah mkra čiăng ênguôt hlue si klei Aê Diê čiăng, hĭn kơ lŏ dơ̆ng hdĭp hlăm klei ênguôt tui si lăn ala ƀiădah amâo lui ôh klei soh mơ̆ng klei hdĭp kâo.
Dlăng Klei Aê Diê Blŭ hlăm tlâo thŭn: Y‑Yêrêmi 48:26-47
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
