Klei Aê Diê Blŭ: Y-Yêrêmi 38:1-10
Êlan kliăng: “Snăn diñu mă Y-Yêrêmi leh anăn dlăm gơ̆ hlăm kbăng êa Y-Malkija anak êkei mtao, kbăng êa anăn hlăm wăl phung kahan gak. Diñu bi mtrŭn Y-Yêrêmi hŏng klei bră. Amâo mâo êa ôh hlăm kbăng anăn, mâo knŏng lŭ, leh anăn Y-Yêrêmi kdlŭt hlăm lŭ anăn.” (Y-Yêrêmi 38:6)
Klei êmuh ksiêm mĭn: Ya klei phung khua prŏng hlăm sang mtao Y-Sêdêkia ngă leh Khua pô hưn êlâo Y-Yêrêmi? Tơdah leh Khua Yang bi mtlaih, ya klei ñu lŏ ngă? Hŏng ya klei drei dưi dôk kjăp gĭr tŭ klei knap mñai hlăm bruă Khua Yang iêô mă?
Khua pô hưn êlâo Y-Yêrêmi dưi yap jing “sa čô khua pô hưn êlâo čŏk hia”kyuadah lu blư̆ ñu čŏk hia kơ phung ƀuôn sang Aê Diê (Y-Yêrêmi 9:1; 13:17; 15:10). Ñu ăt jing mnuih tuôm hŏng lu klei bi kdơ̆ng leh anăn ngă jhat grăp blư̆ hiu hưn Klei Aê Diê Blŭ, ƀiădah ñu amâo phưi lui ôh, ƀiădah ăt sĭt suôr ngă bi leh bruă Aê Diê jao kơ ñu tơl knhal tuč.
Klei mtă ñu ăt gĭr hiu hưn jing klei iêô mthưr phung ƀuôn Israel tŭ klei yơr ngan kơ phung roh čiăng dưi hdĭp, kyuadah Aê Diê lač leh, ƀuôn Yêrusalem sĭt nik srăng dlưh lĕ leh anăn mtao čar Ƀaƀilôn srăng plah mă ƀuôn prŏng. Mtao Y-Sêdêkia jing sa čô mtao awăt êdu, hlăk phung khua prŏng amâo čiăng hmư̆ ôh klei hưn mơ̆ng khua pô hưn êlâo anăn, diñu akâo kơ mtao brei bi mdjiê hĕ Khua pô hưn êlâo Y-Yêrêmi, leh anăn mtao ăt lui brei diñu ngă tui si diñu čiăng mơh. Ƀiădah lĕ, năng ai kyua diñu huĭdah ngă klei soh tuh êrah, snăn diñu yua klei bră bi mtrŭn khua pô hưn êlâo hlăm kbăng êa bŏ hŏng lŭ hrô kơ klei klư̆ gơ̆ lĕ hlăm ƀăng êlam. Hlăm anôk anăn gơ̆ srăng djiê ƀrư̆ ƀrư̆ kyua ư̆ êpa, kyua čhŏ amâodah klei ruă.
Jing boh tŭ huĭ hyưt êdi kơ sa čô mnuih hŏng jih ai tiê mă bruă kơ Aê Diê. Tal êlâo gơ̆ knŏng tŭ klei ruă hlăm kđeh asei mlei leh anăn ai tiê klei mĭn kyua arăng hưn mdah klei čăm leh anăn bi hnuh, ƀiădah tal anei huĭ hyưt truh kơ klei hdĭp. Ƀiădah lĕ, Khua pô hưn êlâo Y-Yêrêmi ăt kăn êdu ai lei, leh Aê Diê yua dua čô khua kriâô bi mtlaih ñu, ñu amâo uêñ ôh kơ jih jang klei dleh dlan, klei lông dlăng, ăt lŏ mă bruă kơ Aê Diê leh anăn hiu hưn klei Aê Diê mtă mơh. Wăt tơdah êjai anăn ñu ăt čŏk hia hŏng Aê Diê, tăm pah kơ hruê kkiêng kơ ñu (Y-Yêrêmi 20:7-18), ƀiădah ai tiê khăp kơ phung ƀuôn sang ăt ktang nanao hlăm ñu. Ñu amâo dưi dôk kriêp ñăt ôh, ăt hiu mtô mblang hmăng hmưi dưi bi mtlaih phung ƀuôn sang pô.
Hruê anei, tơdah hiu hưn Klei Mrâo Mrang Jăk Khua Yang leh anăn mă bruă kơ Ñu, drei ăt tlă anăp hŏng lu klei lông dlăng mdê mdê mơh. Ƀiădah wăt snăn dưn, akâo kơ Khua Yang brei drei ăt dôk kjăp ngă bi leh bruă Khua Yang jao kơ drei. Khua Yang Yêsu lač: “Kyuadah msĕ mơh Anak Mnuih hriê leh amâo djŏ čiăng kơ arăng mă bruă kơ Ñu ôh, ƀiădah Ñu čiăng mă bruă kơ arăng, leh anăn jao klei hdĭp Ñu jing ênoh bi tui kơ lu mnuih.” (Y-Markôs 10:45). Hlăm jih tlâo thŭn dôk hdĭp ti lăn ala, Khua Yang tuôm hŏng amâo ƀiă ôh klei arăng bi kdơ̆ng, ƀiădah ñu ăt jih ai tiê hlăm klei mă bruă kơ Aê Diê leh anăn kơ jih jang mnuih. Khua Yang lui brei kơ drei sa klei bi hmô čiăng kơ drei tui hlue kru Ñu hlăm klei mă bruă. Tơdah klei kñăm kčah knhal tuč kơ klei hdĭp drei amâo djŏ ôh klei mă bruă kơ Aê Diê, snăn klei hdĭp drei srăng jing hơăi mang kluôm dhuôm yơh. Brei grăp čô drei hdơr klei anei, tơdah tlă anăp hŏng klei lông dlăng hlăm knhuang êlan klei đăo, čiăng hmiêt mkăp dôk kjăp gĭr tŭ klei knap mñai hlăm bruă mă Aê Diê iêô drei.
Si ngă drei hmiêt mkăp tŭ klei knap mñai čiăng dôk sĭt suôr hiu hưn Klei Mrâo Mrang Khua Yang mơ̆?
Wah lač: Ơ Khua Yang, brei kâo hdơr nanao klei kñăm kơ klei hdĭp kâo jing hdĭp mă bruă kơ Aê Diê, akâo Khua Yang đru kâo hmiêt mkăp tŭ klei knap mñai êjai mă bruă kơ Khua Yang leh anăn đăo kjăp kơ klei sĭt suôr Ih nanao. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Phung Khua Phat Kđi 16
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
