Yelemis 38:1-10
Nqe cim:
“Yog li ntawd, cov nomtswv thiaj tuaj coj kuv mus thiab muab hlua dauv kuv rau hauv vajntxwv tus tub Makhiyas lub qhovtshij uas nyob hauv lub tshavpuam ntawm vajntxwv lub loog. Lub qhovtshij ntawd tsis muaj dej, tsuas muaj av nkos xwb, kuv thiaj nyob tsau tsawv cov av nkos ntawd.” (Yelemis 38:6)
Lug nug rau sawvdaws xav:
– Tej nomtswv ua haujlwm rau vajntxwv Xedekiyas tau ua dabtsi rau tus cevlus Yelemis?
– Tomqab uas tau tus Tswv cawm, nws rov ua dabtsi?
– Los ntawm yam dabtsi pab peb ua siab ntev tiv kev txomnyem hauv tes haujlwm tus Tswv hu peb los ua?
Tus cevlus Yelemis tau tis npe hu ua “tus cevlus quaj ntsuag” vim nws tau quaj ntsuag rau tus Tswv haivneeg ntau zaug heev (Yelemis 9:1; 13:17; 15:10). Nws kuj yog ib tug uas raug ntau yam kev tawmtsam thiab tsimtxom thaum qhia Vajtswv Txojlus, tiamsis nws tsis tso tseg thiab mob siab ua tus Tswv tes haujlwm mus txog qhov kawg.
Tej lus uas nws ua siab ntev qhia yog nqua hu cov Yixalayees mus thawj lawv cov yeebncuab kom tsis raug tuag vim tus Tswv samhwm hais tias lub nroog Yeluxalees yuav raug swb thiab tus vajntxwv uas kav Npanpiloos yuav txeeb tau lub nroog. Vajntxwv Xedekiyas yog ib tug vajntxwv tsis muaj peevxwm, thaum cov nomtswv tsis xav hnov tej lus cev tseg ntawd, lawv thov vajntxwv pub cai muab tus cevlus Yelemis tua povtseg, thiab vajntxwv tau cia lawv ua raws li lawv lub siabnyiam. Tiamsis, tej zaug lawv tsis xav ris lub txim tua neeg, lawv thiaj tsis thawb ntiag tiamsis muab hlua dauv tus cevlus lawm hauv lub qhov tshij uas tsis muaj dej, tsuas muaj av nkos. Nyob qhov ntawd, nws yuav tuag vim tshaib nqhis, vim tsw phem lossis vim mob nkeeg.
Ntawd yog ib qhov xaus txaus ntshai rau ib tug uas tas siab ntsws ua tus Tswv haujlwm. Zaug ntej nws raug mob sab nqaij tawv thiab hauv siab ntsws thaum raug nplawm thiab xauv tabmeeg sawvdaws, tshuav zaug no nws raug teebmeem ntsigtxog txojsia. Txawm li ntawd los, tus cevlus Yelemis yeej tsis poob siab, tomqab uas tus Tswv siv tus nraug sam cawm nws tawm hauv qhov tshij los, nws yeej tseem tiv kev khwv, kev sim siab ua tus Tswv haujlwm thiab tshajtawm tus Tswv tej lus ntxiv. Txawm yog muaj qee zaug nws kuj yws tus Tswv, foom tsis zoo rau nws lub hnub yug (Yelemis 20:7-18), los txojkev hlub nws haivneeg tseem muaj zog sis hauv nws. Nws kaw ncauj tsis tau, nws tseem pheej qhuab qhia los ntawm kev cia siab tias yuav cawm tau nws haivneeg dim.
Niaj hnub nimno, thaum qhuab qhia tus Tswv tej lus thiab ua Nws haujlwm, ntau tsawg peb yeej ntsib tej kev sim siab sib txawv. Tiamsis txawm yuav zoo licas, los thov tus Tswv pub rau peb ua siab ntev ua tiav lub luag haujlwm tus Tswv muab cob. Tswv Yexus samhwm hais tias: “Txawm yog Neeg Leej Tub los, nws tsis tau kom leejtwg tu nws, tiamsis nws los tu sawvdaws thiab muab nws txojsia los txhiv ntau leej” (Malakaus 10:45). Nyob hauv peb lub xyoo ua neej hauv ntiajteb, Tswv Yexus tau ntsib ntau yam kev tawmtsam tiamsis Nws yeej kawg siab kawg ntsws ua haujlwm rau Vajtswv thiab lwm tus. Tswv Yexus tau ua ib tug qauv zoo rau peb kawm xyaum nyob hauv kev ua haujlwm. Yog hais tias lub homphiaj kawg ntawm peb tsis yog ua haujlwm rau tus Tswv ces peb lubneej yuav tsis muaj qabhau dabtsi hlo li. Peb txhua tus yuav tsum nco ntsoov qhov no thaum ntsib tej kev sim siab hauv kev ntseeg peb thiaj yuav txaus siab hlo tiv kev txomnyem ua tes haujlwm uas tus Tswv hu peb los ua.
Thov Vajtswv,
Tus Tswv, thov pub nyuam yaus nco ntsoov lub homphiaj ntawm nyuam yaus lubneej yog ua Koj tes haujlwm, thov pab nyuam yaus txaus siab tiv kev txomnyem thaum ua Koj tes haujlwm thiab cia siab ntsoov rau Koj txojkev pab. Nyuam yaus tuav Yexus Khetos lub npe thov, Amees.
Ib tsoom cov mloog uas hmov thiab tshua,
Peb puas txaus siab tiv kev txomnyem kom ncaj ncees tshajtawm tus Tswv tej lus?
Nyeem Vajluskub hauv peb lub xyoos: Cov Thawjtswj 16
Kênh Youtube BHKTHN:
