Klei Aê Diê Blŭ: Y-Yôhan 19:38-42
Êlan kliăng:
“Arăng dơr Ñu leh, Ñu lŏ hdĭp leh ti hruê tal tlâo, tui si Klei Aê Diê Blŭ čih leh,” (I Kôrantô 15:4).
Klei êmuh ksiêm mĭn: Ya bruă Y-Yôsep leh anăn Y-Nikôđem ngă kơ Khua Yang Yêsu? Hŏng si knhuah diñu ngă bruă anăn? Ya ngă klei dơr Khua Yang Yêsu jing yuôm leh anăn čih pioh hlăm hdruôm hră Klei Aê Diê Blŭ?
Trăn Klei Aê Diê Blŭ hruê anei hưn kơ drei brei thâo kral sa ƀô̆ mta mrâo ƀiădah ăt brei drei lŏ bi tuôm hŏng sa čô mah jiăng hđăp mơh. Y-Yôsep ƀuh hưn lač hlăm hdruôm hră Klei Aê Diê Blŭ knŏng sa bliư̆ đuč, anăn jing tal anei yơh. Bi kơ Y-Nikôđem drei bi tuôm leh hŏng ñu hlăm Y-Yôhan 3. Jih diñu dua mâo sa mta klei msĕ jing “huĭ kơ phung Yuđa”, snăn yơh sa čô knŏng tui hluê Khua Yang hŏng klei hgăm (êlan 38), bi sa čô knŏng jhŏng nao bi tuôm hŏng Khua Yang êjai mlam (êlan 39 leh anăn Y-Yôhan 3:2). Năng ai ti anăp ală lu mnuih, diñu amâo mâo năng ôh jing ƀĭng kna Khua Yang. Khă snăn dưn diñu yơh jing pô nao dôk dơ̆ng ti anăp Aê Pilat “akâo kơ Aê Pilat klei dưi mă asei mlei Yêsu”, leh anăn mkra klei dơr kơ Khua Yang “tui si klei bhiăn phung Yuđa dơr mnuih djiê” (êlan 38-40). Diñu čuăn ruah jing mah jiăng Khua Yang êjai năn phung ƀĭng kna sĭt suôr lui Khua Yang.
Bruă diñu mkra klei dơr Khua Yang bŏ hŏng klei mpŭ khuăt ênuah, si klei mtô bi hriăm kơ drei?
Tal sa, bi hriăm drei klei uêñ mĭn mkra klei dơr kơ pô djiê jing sa hdră bruă bi êdah klei drei mpŭ kơ digơ̆. Tuôm tui hluê leh Khua Yang hŏng klei hgăm, ƀiădah mông anei, diñu dua thâo săng brei pô yơh nao ngă bruă mkra klei dơr Khua Yang, tơ amâo ngă năng ai arăng srăng hwiê hĕ asei mlei Khua Yang hlăm msat sô pioh kơ phung mnă arăng bi mdjiê amâo mâo ôh găp djuê ngă klei dơr. Y-Nikôđem myơr leh êa drao phĭ ƀâo mngưi bi lŭk hŏng êa drao alôê pioh yua kơ klei păn hruôm asei mlei Khua Yang, bi Y-Yôsep myơr msat mrâo ñu pioh dơr asei mlei Khua Yang (êlan 39,41). Leh anăn hŏng bruă digơ̆ mkra klei dơr Khua Yang hŏng klei khuăt ênuah, arăng mñă bi hdơr nanao hlăm grăp Knăm Hruê Năm Doh Jăk. Jing sa čô pô đăo, brei drei thâo uêñ mkra khuăt ênuah, amâo mâo hưn ktưn bi liê êgao hnơ̆ng, ăt kăn rei dlăng hơăi mang amâo uêñ kơ bruă mkra klei dơr kơ găp djuê pô drei khăp hơiêng, čiăng bi guh kơang kơ Khua Yang hŏng hdră bruă mkra klei dơr kơ pô drei khăp hơiêng luč djiê.
Tal dua leh anăn kdlưn hĭn, bruă mkra klei dơr Khua Yang Yêsu ăt dôk mâo klei mblang yuôm bhăn snăk. Phung đăo khăng kñăm lu hĭn kơ hruê kkiêng kơ Khua Yang, klei Khua Yang tŭ klei knap mñai leh anăn kbiă lŏ hdĭp ƀiădah dlăng amâo đei yuôm ôh kơ klei dơr Khua Yang. Khă snăn dưn, jih jang pô čih hdruôm hră Klei Mrâo Mrang Jăk amâo mâo ôh sa čô kƀah hĕ čih bruă yuôm anei, leh anăn klei Khua Yang tŭ klei arăng dơr ăt mâo anôk mơh hlăm Klei Răk Klei Phung Bi Đru Đăo. Si ngă msĕ snăn? Kyuadah bruă anăn lŏ thiăm kơ klei hưn bi sĭt kơ klei Khua Yang Yêsu djiê leh sĭt nik, amâo djŏ ôh knŏng djiê hwăt msĕ si lu mta klei mblang lač mơ̆ng phung ênuk anei. Bruă ngă dua čô khua mduôn mơ̆ng sang khua phat kđi, êlâo êdei ka tuôm hưn klă ôh digơ̆ pô jing ƀĭng kna Khua Yang Yêsu, digơ̆ ngă bruă mkra klei dơr Khua Yang, lŏ đru bi kjăp hĭn kơ klei dơr Khua Yang leh anăn năng đăo knang hĭn.
Khua ƀĭng kna Y-Pôl êdei tinăn ăt yua rup Khua Yang tŭ klei dơr čiăng mñă bi hdơr kơ phung đăo: “Hŏng klei baptem arăng dơr diih leh mbĭt hŏng Krist, leh anăn msĕ mơh diih kbiă lŏ hdĭp leh mbĭt hŏng Ñu…” (Kôlôs 2:12a).
Si ngă drei dơr sĭt leh mơ̆ mnuih hđăp drei hlăm msat mbĭt hŏng Khua Yang amâodah ka?
Ơ Khua Yang Yêsu Krist, kâo đăo kơ Ih tŭ leh klei djiê leh anăn dơr, truh hruê tal tlâo, Ih kbiă lŏ hdĭp mơ̆ng phung djiê. Akâo kơ Khua Yang đru kâo đăo kjăp tui hlue Ih tơl truh ti knhal tuč.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
