Mathais 9:37-38
Nqe cim:
“Ces Yexus hais rau nws cov thwjtim hais tias, ‘Cov nplej uas zoo hlais lawm muaj ntau, tiamsis cov neeg uas hlais muaj tsawg’.” (Mathais 9:37).
Lus nug rau sawvdaws xav:
- Tswv Yexus hais licas rau Nws cov thwjtim?
- Vim licas Nws hais li ntawd?
- Txojhau kev uas Tswv Yexus taw qhia rau cov thwjtim yog dabtsi?
- Niaj hnub nimno peb pom Pawg Ntseeg tabtom zoo li cas?
- Peb siv txojhau kev uas Tswv Yexus taw qhia li cas?
Ib tsoom cov uas mloog txhua tus,
Nyob rau hauv tej nqe kawg ntawm tshooj 9, Tswv Yexus xav qhia Nws lub nra rau cov thwjtim tau paub, Nws kuj xav kom lawv “hlub” lossis “khuvleej” cov neeg uas raug kev txomnyem kawg nkaus sab ntsujplig, yuavtsum siv zog mus rau ntau qhov tshajtawm Txojmoo Zoo ntxiv. Tswv Yexus tau siv daim duab pivtxwv hais txog lub caij sau nplej uas sawvdaws ibtxwm paub coj los hais pivtxwv rau cov thwjtim kom lawv totaub txog Nws lub nra hnyav. Caij sau nplej nyob tebchaws Yudas pib rau thaum yuav luag xaus hli Peb, cov tswv teb yuav tsum qee zias sijhawm hlais nplej kom tas ua ntej uas muaj tej cua kub tuaj ntsawj ua rau nras liaj raug qhuav. Tswv Yexus hais txog ib qho teebmeem uas muaj tseeb, ntawd yog lub caij sau nplej los txog lawm tiamsis tabtom tsis muaj neeg pab hlais nplej, ua rau hlais tsis yeej. Txojhau kev uas Tswv Yexus taw qhia yog thov tus tswv teb txib dua ib co neeg mus pab hlais cov nplej thiaj yuav hlais tas ua ntej lub sijhawm uas muaj cov cua kub ntsawj tuaj txog.
Dhau ntawm daim duab pivtxwv no, Tswv Yexus xav kom cov thwjtim paub hais tias lawv tabtom yog cov hlais nplej sab ntsujplig, lawv twb tau tus Tswv xaiv, cob qhia thiab txib mus rau hauv Nws lub nras liaj lawm. Tus Tswv kuj xav kom lawv zeem paub ib qhov teebmeem ntawd yog muaj ntau qhov cheemtsum tiamsis muaj tsawg tus ua haujlwm kom xwv lawv paub taij thov Vajtswv uas yog tus Tswv teb txib dua ib co neeg mus pab hlais Nws cov nplej.
Pawg Ntseeg niaj hnub nimno kuj ntsib teebmeem zoo ib yam li ntawd, cov neeg uas ris lub nra mas tsawg heev, zoo ib yam li “Cov nplej uas zoo hlais lawm muaj ntau, tiamsis cov neeg uas hlais muaj tsawg.”, twb yog vim li ntawd thiaj muaj tsawg leej kam hais ib yam li Yaxayas hais tias; “Kuv nyob ntawm no! Thov txib kuv mus!” (Yaxayas 6:8). Vim tsis paub hais tias muaj kev cheemtsum loj heev peb thiaj tsis kub siab taij thov tus Tswv txib lwm tus los nrog peb ua Vajtswv haujlwm, thiab vim tsis zeem paub txog tej yam zoo thaum muaj neeg los nrog peb ua Vajtswv haujlwm, peb thiaj pheej xam khib, ntxub, thiab tsis txais yuav lwm tus los nrog peb ua haujlwm ua ke.
Yuav tsum paub ua Vajtswv tsaug vim peb twb tau tus Tswv xaiv thiab pub cai rau peb ua haujlwm rau Nws, yuav tsum qhia tshwm kev sib hlub, nqis tes pab lwm tus uas nrog peb ua haujlwm ua ke. Yuav tsum nco ntsoov hais tias, tus Tswv xav kom Nws cov thwjtim yuav tsum ris lub nra ib yam li Nws. Tus Tswv xav kom Nws cov thwjtim kuj taij thov Vaj Leej Txiv txib lwm tus los pab lawv ua haujlwm. Tus Tswv kuj xav kom cov thwjtim txais yuav, koom tes, ua haujlwm nrog lwm tus uas tau tus Tswv txib tuaj, kom xwv sau tau ib cim qoob loo ntau pub rau Vajtswv lub Tebchaws.
Thov Vajtswv,
Tus Tswv, thov Koj rhuav tshem nyuam yaus lub siab uas tsis quav ntsej tej haujlwm hauv Pawg Ntseeg povtseg mus, thov pab nyuam yaus txhob ua neeg qia dub nyuam yaus thiaj koom tes tau nrog lwm tus ua tiav tej haujlwm uas Koj txib, kom xwv Koj lub Pawg Ntseeg tau txhim kho thiab vammeej. Amees.
Ib tsoom cov uas mloog hmov thiab tshua,
Peb puas saib pom “Cov nplej uas zoo hlais lawm muaj ntau, tiamsis cov neeg uas hlais muaj tsawg” lawm? Peb puas tabtom taij thov tus Tswv txib dua ib co neeg tuaj pab hlais thiab peb puas npaj siab ua haujlwm nrog cov neeg uas tau tus Tswv txib tuaj lawm tau?
Nyeem Vajluskub hauv peb lub xyoo: Yauj 29
Phab Xa Suab Lus nrog rau Phab Cob Qhia Tus Ntseeg koom tes txhim muaj.
Txhua yam kev pab tswvyim txhim kho, thov nej sau ntawv xa rau lub chaw: kawmvajluskubtxhuahnub@gmail.com
Tshooj Youtube BHKTHN: https://www.youtube.com/c/bhkthn
