Klei Aê Diê Blŭ: Y-Mathiơ 9:37-38
Êlan kliăng: “Leh anăn Yêsu lač kơ phung ƀĭng kna Ñu, “Mâo lu mdiê čiăng wiă, ƀiădah phung wiă jing ƀiă. ” (Y-Mathiơ 9:37).
Klei êmuh ksiêm mĭn: Si Khua Yang Yêsu lač hŏng phung ƀĭng kna?Ya ngă Ñu lač snăn? Si hdră msir Khua Yang Yêsu lač kơ phung ƀĭng kna? Si drei ƀuh klei mâo hlăm Sang Aê Diê ară anei? Si ngă drei ba yua hdră msir Khua Yang ktrâo lač leh?
Hlăm dŭm êlan knhal tuč hlăm kdrêč 9, Khua Yang Yêsu čiăng bi mbha klei ktrŏ Ñu hŏng phung ƀĭng kna, Khua Yang čiăng kơ diñu “mâo klei pap” hŏng phung mâo mngăt dôk hlăm klei knap mñai, brei gĭr hiu nao ti lu anôk čiăng hưn Klei Mrâo Mrang Jăk. Khua Yang Yêsu yua leh rup yan wiă mưng ƀuh čiăng đru phung ƀĭng kna thâo săng klei ktrŏ Ñu. Yan wiă ti Yuđa mphŭn hlăm knhal jih mlan tlâo, dŭm pô lŏ hnêč wiă êlâo kơ dŭm gưl angĭn hlơr tuh hriê ngă krô kdrăn lŏ. Khua Yang Yêsu lač kơ sa klei dôk mâo jing yan wiă hlăk dôk kƀah phung wiă, boh jhat jing amâo dưi hmao wiă ôh. Hdră msir Khua Yang Yêsu lač jing brei akâo kơ pô kiă kriê yan wiă duah thiăm mnuih čiăng bi leh bruă wiă mdiê bi hmao yan.
Mơ̆ng klei anei, Khua Yang Yêsu čiăng kơ phung ƀĭng kna thâo săng pô dôk jing phung wiă hlăm mngăt, Aê Diê dôk ruah diñu, mjuăt bi hriăm leh anăn tiŏ nao hlăm kdrăn lŏ Khua Yang. Ñu ăt čiăng phung ƀĭng kna thâo săng sa klei adôk mâo jing klei čiăng mâo lu ƀiădah mnuih mă bruă ƀiă čiăng kơ diñu wah lač akâo kơ Aê Diê jing Pô kiă kriê yan wiă akâo kơ ñu lŏ tiŏ nao thiăm phung wiă hlăm kdrăn lŏ Ñu.
Sang Aê Diê hruê anei ăt dôk tlă anăp hŏng klei msĕ snăn mơh, kyua ƀiă đei mnuih mâo klei ktrŏ “Mâo lu mdiê čiăng wiă, ƀiădah phung wiă jing ƀiă”, kyua anăn ƀiă mnuih dưi lač msĕ si Khua pô hưn êlâo Y-Êsai “Tinei kâo, tiŏ nao kâo bĕ.” (Y-Êsai 6:8). Kyua amâo thâo ôh klei čiăng prŏng prĭn anăn drei ăt kăn jih ai tiê wah lač kơ Aê Diê tiŏ nao thiăm phung mă bruă kơ Ñu mbĭt hŏng pô, leh anăn kyua amâo thâo ôh klei tŭ dưn leh mâo thiăm mnuih mă bruă mbĭt kơ Aê Diê, anăn drei khăng mâo klei bi keh nač, bi êmut, amâo čiăng ôh phung mă bruă mbĭt hŏng pô.
Brei thâo hdơr knga kơ Aê Diê kyuadah Aê Diê ruah leh drei leh anăn dưi brei drei mă bruă kơ Aê Diê, brei drei bi êdah klei khăp, đru kơ phung ayŏng amai adei mkăn mă bruă mbĭt hŏng pô. Brei drei hdơr Khua Yang čiăng kơ phung ƀĭng kna Ñu ăt mâo klei ktrŏ msĕ si Ñu mơh. Khua Yang čiăng phung ƀĭng kna Ñu ăt wah lač hŏng Aê Diê Ama brei thiăm phung mă bruă mbĭt hŏng pô. Khua Yang ăt čiăng phung ƀĭng kna tŭ ư, bi mguôp hŏng phung Khua Yang tiŏ hriê čiăng mă bruă hŏng diñu ba sa yan hrui wiă kơ Ƀuôn Ala Mtao Aê Diê.
Drei dôk ƀuh “Mâo lu mdiê čiăng wiă, ƀiădah phung wiă jing ƀiă” mơ̆? Drei dôk akâo kơ Khua Yang tiŏ nao thiăm phung wiă leh anăn drei pô srăng mă bruă hŏng phung Aê Diê tiŏ nao mơ̆?
Wah lač: Ơ Khua Yang, akâo kơ Ih đru kâo lui ai tiê ngă ngơi mang hŏng klei Sang Aê Diê ară anei adôk čiăng, akâo kơ Ih đru kâo đăm bi mĭn knŏng kơ pô ôh čiăng dưi bi mguôp hŏng grăp čô mnuih bi leh bruă Aê Diê jao čiăng kơ Sang Aê Diê dưi rŭ mdơ̆ng leh anăn đĭ kyar.
Dlăng Klei Aê Diê Blŭ hlăm tlâo thŭn: Y-Yôp 29
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
