Pajlug 23:29-35
Nqe cim:
“Nej tsis txhob haus cawv txiv hmab kom qaug, rau qhov tej ntawd yuav ua rau nej ua neeg tsis tsimtxiaj. Nej yuav tsum cia Vaj Ntsujplig kav nej lub siab.” (Efexus 5:18)
Lus nug rau sawvdaws xav:
– Kev dag ntxias ntawm cawv tau muab piv thiab hais zoo licas?
– Teebmeem thaum qaug cawv yog dabtsi?
– Peb muaj kev xav thiab cwjpwm zoo licas thaum raug npias cawv ntxeev ntxias?
Ntu Vajluskub hnub no pib ntawm tej lus nug ntsistxog teebmeem ntawm tus neeg nyiam haus cawv. Ntawd yog kev txomnyem, lwj siab, kub ntxhov, raug ntaus, thiab tus cwjpwm raug puastsuaj. Lo lus “tsis txhob pub cawv ntxias” raug muab piv rau kev tig mus saib tus niam ntiav (nqe 31, 33), vim thaum koj cia tej cawv liab ntshiab si dag ntxias, nws yuav kovyeej koj lub tswvyim, yuav ntxias tau koj mus rau tej uas lub qhov muag ntshaw, thiab koj yuav rov tsau tsawv hauv kev quav cawv dua. Zoo ib yam li tus niam ntiav, kev dag ntxias ntawm cawv yog ib lub voj hluas uas txaus ntshai. Cia li khiav deb tej kev plhom sij, tshem tej kev dag ntxias povtseg puag thaum nyuam qhuav pib tshwmsim dhau ntawm qhov uas: tsis txhob txav ti cawv, txhob saj, txhob saib, vim duab cawv rub siab heev, tej pa cawv los tsw qab kawg li. Tiamsis teebmeem thaum qaug cawv tsis txawv tej taug nab ua rau lub cev piam sij, lub hlwb puas tsus, thiaj ua rau tus neeg qaug cawv ua ntau yam yuamkev hauv lubneej.
Tus neeg qaug cawv tswj tsis tau nws txojkev xav thiab tes haujlwm, vim li ntawd lawv lubneej poob mus rau tej teebmeem txaus ntshai raug piv li tus neeg “pw tus ntab yees saum nplaim dej hiavtxwv” lossis “nyob saum lub nkoj tus hau ncej uas dai daim ntaub cug cua”; yog neeg ciaj tiamsis zoo li tus tuag lawm (nqe 34). Ntu Vajluskub xaus los ntawm lo lus thuam tus neeg qaug cawv tsis paub qabhau, tseem muaj plhus khav ruam hais tias txawm yog raug nplawm los tsis hnov mob, tsis nco qab tas lawm! Thaum raug nplawm twb tsis paub tiv thaiv, raug thuam twb tsis paub tu siab, ces tseem tshuav dabtsi yog neeg. Thiab qhov uas ua rau tus neeg qaug cawv tas kev cia siab yog rov log tob zuj zus hauv kev yees cawv, thaum tsim los, nws rov mus nrhiav cawv haus dua!
Niaj hnub nimno, muaj coob leej raug tej kev xav yuamkev dag ntxias hais tias tus uas tsis paub haus npias cawv tsis yog txivneej yawg, lossis haus npias cawv thiaj muaj phoojywg, thiaj muaj kev ua noj, thiaj muaj tswvyim zoo, lossis thiaj yog koom phoojywg… Thaum ua li ntawd coob leej poob rau npias cawv kev dag ntxias thiab raug tej teebmeem thaum qaug cawv ua rau lubcev, lub siab puas tsuaj, thiab ua rau tsis tsimtxiaj. Vajtswv Txojlus qhia hais tias: “Nej tsis txhob haus cawv txiv hmab kom qaug, rau qhov tej ntawd yuav ua rau nej ua neeg tsis tsimtxiaj. Nej yuav tsum cia Vaj Ntsujplig kav nej lub siab” (Efexus 5:18). Txhua tus ntseeg yuav tsum qhia tshwm kev zoo ntawm tus Tswv. Txhob haus npias cawv, tiamsis siv tej lub sijhawm ntawd los kawm xyaum, ua haujlwm, txhim kho kev ua zoo thiab taij thov Vajtswv Ntsujplig ua tus coj kom qhia tshwm tus Tswv txojkev hlub thiab kev cawmdim pub rau lwm tus. Txhob qaug cawv, cia li ua lubneej tsimnyog li ib tus ntseeg Tswv Yexus lawm.
Thov Vajtswv,
Tus Tswv, thov ua Koj tsaug vim Koj qhia nyuam yaus pom txog teebmeem ntawm kev qaug cawv. Thov Vaj Ntsujplig qhuab ntuas nyuam yaus qaij dej npias cawv tej kev haub ntxias, thiab qhia tshwm txojkev zoo ntawm tus Tswv dhau ntawm tej lus hais thiab tes haujlwm txhua hnub. Nyuam yaus tuav Yexus Khetos lub npe thov, Amees.
Peb puas qaij deb npias cawv thiab vam khom Vaj Ntsujplig ua neej qhia tshwm kev ntseeg rau lwm tus lawm tau?
Nyeem Vajluskub hauv peb lub xyoos: II Vajntxwv 20
Kênh Youtube BHKTHN:
