Klei Aê Diê Blŭ: Klei Bi Hriêng 23:29-35
Êlan kliăng: “Đăm kpiê ruă ôh, kyuadah klei anăn bi mbŭk diih; ƀiădah brei diih bŏ hŏng Yang Mngăt Jăk” (Êphêsô 5:18)
Klei êmuh ksiêm mĭn: Si klei bi tluh mơ̆ng kpiê mâo msĕ leh anăn čih lač? Ya boh jhat mơ̆ng klei kpiê ruă? Si drei bi mĭn leh anăn knuih drei mâo ti anăp klei kpiê, ƀiêr bi tluh?
Trăn Klei Aê Diê Blŭ hruê anei mphŭn hŏng klei êmuh čiăng mñă kơ boh jhat mơ̆ng phung rañ, khăp mnăm kpiê. Anăn jing klei truh jhat, ênguôt hnĭng, bi keh nač, bi êka hlăm asei mlei leh anăn knuih hdĭp srăng rai tuč. Boh blŭ “dôk dlăng kơ kpiê” mâo bi hmô hŏng “dlăng kơ phung mniê knhông” (êlan 31, 33), kyua tơdah anak tluh kơ klei jăk siam ti êngao mơ̆ng kpiê hrah msĕ si mtŭ ƀlêč ƀlir, ñu srăng bi rai klei thâo mĭn anak, atăt anak kơ klei khăp mơ̆ng ală, leh anăn lŏ kma êlam hlăm klei ră rañ. Msĕ si mniê knhông, klei bi tluh mơ̆ng kpiê jing sa ƀưi hgăm. Brei ñĕ kbưi kơ klei huĭ hyưt, mjih tuč klei mplư mơ̆ng mphŭn kčưm hŏng klei đăm dôk jĕ giăm kpiê ôh, đăm lông mnăm ôh, đăm dlăng ôh, kyua rup ñu dlăng jăk snăk, mnâo ñu jăk snăk, ƀiădah boh jhat ñu amâo mdê ôh hŏng êa kêč kam ala ruă bi rai asei mlei, ngă êwiên kŏ dlô, atăt kơ lu klei soh jhat hlăm klei hdĭp.
Mnuih kpiê ruă amâo dưi ksiêm dlăng ôh klei mĭn, bruă ngă, kyua anăn klei hdĭp diñu lĕ hlăm klei huĭ hyưt mâo bi hmô msĕ si sa čô mnuih đih ti krah êa ksĭ, msĕ si sa čô mnuih đih ti ƀrŏng sa ƀĕ gơ̆ng; jing mnuih hdĭp ƀiădah msĕ si djiê (êlan 34). Kdrêč klei čih mjưh ruĕ hŏng klei mưč kơ mnuih kpiê ruă amâo thâo lŏ săng êmăng, luč jih klei hêñ tơdah diñu hưn ktưn klei hơăi mang wăt tơdah arăng čăm biêng ăt kăn ƀuh ruă mơh, kăn hmư̆ ya klei rei! Arăng čăm asei mlei ƀiădah amâo dưi čŏng mgang, wăt tơdah arăng mưč mač ăt kăn thâo mơh, snăn ya lŏ mâo knuih knaih, klei yuôm bhăn anak mnuih. Leh anăn klei ngă kơ phung kpiê ruă hlăm klei luč čang hmăng jing lĕ êlam hlăm klei rañ, tơdah mdih, lŏ duah kpiê mnăm!
Hruê anei, lu mnuih mâo klei mĭn soh čhuai bi lĕ tơdah lač phung amâo mâo mnăm kpiê jing amâo djŏ êkei sĭt ôh, amâodah mnăm kpiê ƀiêr kơh mâo ƀĭng găp, dưi ngă bruă bi mguôp, dưi mâo klei mĭn thâo, amâodah thâo hlai mbĭt hŏng ƀĭng găp… Leh anăn lu mnuih lĕ leh hlăm klei mplư mơ̆ng kpiê ƀiêr leh anăn klam boh jhat mơ̆ng klei kpiê ruă msĕ si bi rai asei mlei, ai tiê leh anăn bi luč knuih anak mnuih. Klei Aê Diê Blŭ lač: “Đăm kpiê ruă ôh, kyuadah klei anăn bi mbŭk diih; ƀiădah brei diih bŏ hŏng Yang Mngăt Jăk” (Êphêsô 5:18). Grăp čô phung đăo brei bi êdah klei jăk siam Aê Diê. Hrô kơ mnăm kpiê ruă, snăn brei yua mnĭt mmông anăn hriăm hră mơar, mă bruă, hriăm mbŏ knuih hdĭp leh anăn akâo kơ Yang Mngăt Jăk ktrâo atăt čiăng bi lar klei khăp leh anăn klei bi mtlaih kơ grăp čô mnuih. Đăm kpiê ruă ôh, brei hdĭp djŏ hŏng knuih jing sa čô mnuih đăo kơ Krist.
Drei ñĕ kơ kpiê, ƀiêr leh anăn knang kơ Yang Mngăt Jăk bi êdah klei hdĭp phung đăo kơ Krist kơ phung mkăn leh mơ̆ amâodah ka?
Wah lač: Ơ Aê Diê, kâo bi mni kơ Ih mtô leh kâo kơ boh jhat mơ̆ng klei kpiê ruă. Akâo kơ Yang Mngăt Jăk mñă kơ kâo đuĕ kbưi mơ̆ng klei kpiê, ƀiêr bi tluh, leh anăn bi êdah klei jăk siam Aê Diê hlăm klei blŭ, bruă ngă grăp hruê. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: II Bruă Mtao 20
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
