Mathais 19:21-22
Nqe cim
“Nej yuav tsum mus lub qhovrooj nqaim, rau qhov lub qhovrooj loj thiab txojkev dav coj mus rau ntujtawg thiab muaj coob leej taug txojkev ntawd.” (Mathais 7:13)
Lus nug rau sawvdaws xav.
– Tswv Yexus hais kom tus hluas ua yam dabtsi ntxiv? Vim li cas?
– Qhov vimchiv twg ua rau tus hluas tsis yeem thiab tawm mus nyuaj siab ntsuav?
– Peb tabtom muaj tus cwjpwm licas rau tej yam uas tus Tswv hais rau peb?
Tomqab uas tus hluas hais khov kho rau tus Tswv hais tias nws twb coj tau tagnrho Mauxes txoj kevcai lawm, Tswv Yexus hais rau nws tias: “Yog koj xav ua tus uas zoo kawg nkaus, koj cia li mus muab koj tej qhov txhia chaw muag huv tibsi, thiab muab cov nyiaj ntawd faib rau cov neeg pluag, koj thiaj yuav yog tus uas npluanuj nyob saum ntuj ceebtsheej; tom qab ntawd, koj cia li tuaj nrog kuv mus” (nqe 21). Qhov no tsis yog Tswv Yexus ib lo lus sim lossis hais kom tus hluas teb tsis tau, vim Nws yeej hlub tus tub hluas no tiag. Vajluskub sau tias: “Yexus hlub tus ntawd, Yexus tsa qhovmuag saib nws…” (Malakaus 10:21). Tus Tswv xav kom tus hluas no zeem paub nws qhov txhaum, tig los lees txim thiab txais yuav txojsia ntev dhawv ibtxhis. Qhov teebmeem ntawm tus hluas no yog tso tsis taus tej khoom nyiaj txiag povtseg, qhov uas nyuaj dua ntais ntawm cov neeg ntshaw khoom ntiajteb yog “muab pub”. Raws li tus hluas npluanuj no xav “txojsia ntev dhawv mus ibtxhis” tsuas yog yam txhawb ntxiv xwb, tsis yog yam tseemceeb tshajplaws, nws thiaj tsis yeem poob tej khoom nyiaj txiag los txais yam tseemceeb tshajplaws. Nws yeem xaiv tsis yuav “Txojsia Ntev Dhawv Ibtxhis” heev dua qhov uas tso tej khoom nyiaj txiag povtseg, nws tsuas ntshaw tej uas qhovmuag pom tias muaj nqis xwb. Yog li ntawd, “thaum…hnov dheev Yexus hais li ntawd, nws ua ntsejmuag ntshaus ntsho; nws txawm rov mus tsev lawm, nws nyuaj siab kawg li rau qhov nws npluanuj heev” (nqe 22).
Niaj hnub nimno, thaum saib mus rau Vajtswv Txojlus uas yog phau Vajluskub, peb yuav tau Vajtswv Txojlus taw qhia txog yam uas tus kheej ua yuamkev, kev qaug zog, kev txhaum npog cia,… Peb ua licas thaum tau tus Tswv tej lus qhuab ntuas? Peb puas chim, npau taws thaum Vajtswv Txojlus nthuav peb tej kev txhaum tawm? Yuav tsum paub hais tias Vajtswv hlub peb heev thiab Nws xav kom peb dim txim, yog li Nws thiaj qhuab ntuas, ceebtoom peb. Vim “tus Tswv qhuab ntuas tus uas nws hlub ib yam li leej txiv qhuab ntuas tus tub uas nws cia siab rau” (Pajlug 3:12).
Yam dabtsi tabtom ua rau peb tso tsis taus txhua yam nrog tus Tswv mus? Twb yog vim nplooj siab ntshaw khoom nyiaj txiag thiaj tav tus hluas npluanuj txojkev nrog tus Tswv mus thiab tsis yeem txais yuav txojsia ntev dhawv ibtxhis. Niaj hnub nimno, qee zaug kev ntshaw koob npe, ntshaw meejmom, ntshaw tau yam ub yam no yuav yog yam tav peb kev nrog tus Tswv mus. Peb txhua tus cheemtsum paub qhov muaj nqis ntawm txojkev cawmdim, thiaj tsis muab qhov ntawd los pauv tej yam nyob ibvuag hauv lub ntiajteb no. Tus hluas tuaj cuag Tswv Yexus thiab tawm mus nyuaj siab dua thaum tuaj, peb kuj mus pehawm ntau xyoo hauv Tuamtsev tiamsis peb sab ntsujplig puas tabtom loj hlob dua qub, nyob ze tus Tswv dua qub, paub tus Tswv siabnyiam dua qub thiab fij txhua yam rau tus Tswv dua qub, lossis peb tsuas zoo li tus hluas thaud xwb?
Thov Vajtswv,
Tus Tswv, thov ua Koj tsaug vim nyuam yaus tau paub thiab txais yuav Koj, thov pab nyuam yaus saib kev cawmdim thiab txojsia ibtxhis uas Koj muab pub muaj nqis, nyuam yaus thiaj tsis ntshaw tej khoom ntiajteb thiab txiav txim siab nrog Koj mus tas simneej. Nyuam yaus tuav Yexus Khetos lub npe thov, Amees.
Peb tabtom xav zoo lossis tsis zoo rau Tswv Yexus tej lus qhia?
Nyeem Vajluskub hauv peb lub xyoos: Lukas 17
Kênh Youtube BHKTHN:
