Klei Aê Diê Blŭ: Y‑Mathiơ 19:21‑22
Êlan kliăng: “Mŭt bĕ ti ƀăng jang kniă; kyuadah ƀăng jang ƀai leh anăn êlan prŏng atăt ba kơ klei rai luč, leh anăn phung mŭt tinăn jing lu” (Y‑Mathiơ 7:13)
Klei êmuh ksiêm mĭn: Ya klei Khua Yang Yêsu brei êkei hlăk ai lŏ ngă thiăm? Ya ngă êkei hlăk ai anăn hngah leh anăn đuĕ nao bŏ hŏng klei ênguôt? Si knuih drei ngă hŏng klei Khua Yang čiăng blŭ hŏng drei?
Leh êkei hlăk ai lŏ wĭt lač kơ Khua Yang ñu gưt leh jih jang klei bhiăn, Khua Yang Yêsu lač, “Tơdah ih čiăng jing jăk klă, nao bĕ, čhĭ hĕ ya mnơ̆ng ih mâo leh anăn brei kơ phung ƀun ƀin, leh anăn ih srăng mâo ngăn yuôm hlăm adiê. Leh anăn hriê bĕ, tui hlue Kâo” (êlan 21). Anei amâo djŏ klei Khua Yang čiăng lông dlăng amâodah čiăng mjhua êkei hlăk anăn ôh kyuadah Ñu khăp sĭt kơ êkei hlăk ai anăn, “Yêsu dlăng kơ gơ̆ hŏng klei khăp” (Y‑Markôs 10:21). Khua Yang čiăng đru ñu thâo kral klei soh ñu, kmhal hĕ leh anăn mă tŭ klei hdĭp hlŏng lar. Klei dleh hŏng êkei hlăk ai anăn jing ñu khăp đei kơ dŏ ngăn, klei dleh hĭn kơ hlei pô khăp kơ dŏ ngăn jing “brei” kơ phung ƀun ƀin. Hŏng êkei hlăk ai mdrŏng anei, “klei hdĭp hlŏng lar” jing klei ñu čiăng lŏ mâo thiăm amâo djŏ klei jing yuôm hĭn ôh, kyuanăn tơl ñu amâo jhŏng brei ôh jih mnơ̆ng ñu mâo čiăng dưi mâo mnơ̆ng yuôm hĭn. Ñu čuăn lui “Klei Hdĭp Hlŏng Lar” amâo djŏ lui dŏ ngăn jing dŏ ñu yap jing yuôm hĭn ôh. Ñu jing sa čô mnuih knŏng khăp kơ ya mnơ̆ng ñu dưi ƀuh đuč. Kyuanăn, “tơdah hmư̆ klei blŭ anăn, ñu đuĕ bŏ hŏng klei ênguôt kyuadah ñu mâo lu dŏ ngăn” (êlan 22).
Hruê anei, tơdah dlăng Klei Khua Yang Blŭ čih hlăm hdruôm hră Klei Aê Diê Blŭ, Klei Ñu Blŭ srăng ktrâo kơ drei klei soh drei ngă leh, klei awăt drei, klei soh drei dôk mdăp…Si ngă drei lŏ wĭt ngă hŏng klei Khua Yang bi hriăm drei? Si ngă drei mâo klei ngêñ kyua Klei Aê Diê Blŭ bi êdah klei soh drei mơ̆? Hdơr bĕ, Khua Yang khăp snăk kơ drei leh anăn Ñu čiăng drei mâo klei bi mtlaih kyuanăn Ñu mkra mjuăt leh anăn bi hriăm drei, “Kyuadah Yêhôwa mkra hlei pô Ñu khăp, msĕ si sa čô ama ngă kơ anak ñu khăp” (Klei Bi Hriêng 3:12).
Ya mnơ̆ng dôk bi gun drei tơl drei amâo dưi lui jih jang mnơ̆ng leh anăn tui hlue Khua Yang ôh? Kyua klei khăp kơ dŏ ngăn yơh bi gun leh êkei hlăk ai mdrŏng tui hlue Khua Yang Yêsu leh anăn hngah kơ klei hdĭp hlŏng lar, hruê anei năng ai klei hing ang, klei arăng mpŭ, klei tŭ dưn kơ drei pô yơh dôk bi gun klei drei tui hlue Khua Yang. Brei grăp čô drei thâo ênoh yuôm klei bi mtlaih čiăng đăm drei bi mlih klei bi mtlaih hŏng sa mta mnơ̆ng hơăi mang ti lăn ala anei ôh. Êkei hlăk ai hriê kơ Khua Yang Yêsu leh anăn đuĕ nao hŏng klei ênguôt hĭn kơ êlâo. Drei msĕ mơh, năng ai drei đăo sui thŭn leh ƀiădah bi klei hdĭp myang drei đĭ hriê kơ prŏng hĭn, nao giăm Khua Yang hĭn, thâo săng klei Ñu čiăng hĭn, leh anăn myơr jih kơ Ñu hĭn mơ̆ amâodah jing msĕ si êkei hlăk ai mdrŏng ênuk mphŭn dô anăn?
Si ngă drei mâo klei lŏ wĭt ngă hŏng klei jăk hĕ amâodah amâo jăk ôh hŏng klei Khua Yang Yêsu bi hriăm?
Wah lač: Ơ Khua Yang, kâo lač jăk kơ Ih kyuadah kâo thâo kral Ih leh anăn đăo kơ Ih, đru kâo thâo mpŭ kơ klei bi mtlaih leh anăn klei hdĭp hlŏng lar Ih brei leh kơ kâo, čiăng kơ kâo amâo khăp kơ dŏ ngăn lăn ala ôh, leh anăn čuăn tui hlue Ih jih hruê kâo dôk hdĭp. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y‑Luk 17
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
