Pajlug 19:1
Lus nug rau sawvdaws xav:
- Vajntxwv Xalumoos qhia menyuam lub neej rau kev noj haus li cas?
- Vim li cas nws qhia li ntawd?
- Peb xaiv txojkev ua neej li cas kom qhia tawm peb yog tus ntseeg rau txhua tus?
Ua lub neej ncaj ncees thiab npluanuj yog lub neej zoo. Tiamsis yog yuav xaiv kev ua neeg pluag dawbhuv thiab kev ua neeg dag kom npluanuj, ces tus ntseeg Yexus yuav xaiv ua qhovtwg? Pajlug 19:1, Vajntxwv Xalumoos qhia rau nws cov menyuam kom yuav tsum xaiv ua neeg pluag ncaj ncees zoo dua ua neeg dag kom npluanuj. Ncaj ncees txhais tau hais tias yog dawbhuv, tsis ntshaw luag tug. Xaiv ua neeg ncaj ncees yog xaiv lub neej ua raws li Vajtswv Txojlus qhia. Ua neeg ncaj ncees kuj txhais tau hais tias yog ua neej muaj kev cia siab rau tus Tswv txojkev foom pub, txawm yog yuav poob ntau yam. Vajtswv Txojlus hais khov kho hais tias tus neeg ncaj ncees yuav tau tus Tswv pab thiab tiv thaiv (Pajlug 2:7). Ua neej muaj kev ntseeg thiab sib raug zoo nrog tus Tswv, ua raws li Nws Txojlus qhia, tus Tswv yuav tiv thaiv, foom koob hmoov, tiamsis yog ntshaw, dag lwm tus lossis ua neeg phem, lub siab tsis lees yuav tus Tswv ces txawm yuav muaj npluamias tamsim no los tom qab yuav tau tej nqi zog tsis zoo (nqe 1b; Pajlug 10:9). Tej zaum tus neeg dag, ua tsis ncaj zam dhau txoj kevcai tswj tsis raug txim, tiamsis ib hnub yuav raug txim thaum mus sawv ntawm tus Tswv lub rooj txiav txim. Raws li tibneeg ntsia, cov neeg uas dag lwm tus ua kom nws npluanuj yog neeg muaj tswvyim, tiamsis qhov tseeb thiab ntev mus lawv yog cov neeg ruam tshaj plaws.
Tej laus kev ua neej ibtxwm muaj lus qhia tej menyuam hais tias: “Tshaib Dawbhuv, Pluag Ua Zoo”. Muaj ntau leej tsis totaub, tsis kawm kev ua neeg zoo, ntshaw npluanuj thiaj ua lub neej puas koob puas npe thaum tsis ua raws li tus Tswv qhia.
Kev ua neej, khoom txhua yam thiab tej kev txawj ntse vammeej ua rau tibneeg yim paub meej qhov sib txawv ntawm kev npluanuj thiab pluag. Tiam neej no sawvdaws saib kev npluanuj, meejmom hlob, tiamsis saib kev ua zoo, kev hlub tsis muaj nqis. Peb tsis yog tsis lees yuav lub neej pluag kev noj haus, pluag siab. Peb kuj tsis yog txaus siab rau lub neej pluag mus li. Tiamsis Vajtswv cov menyuam yuav tsum ua neeg ncaj ncees raws nraim li Vajtswv lub siab nyiam thiab qhia tej menyuam rau siab kawm kev txawj ntse, nquag ua haujlwm, ua kom lub neej muaj los ntawm yus lub peevxwm dag zog. Tsis txhob yog vim ntshaw nyiaj, meejmom, koob npe ua puas lub npe ntseeg Yexus, saib kev ua zoo tsis muaj nqis, thaum kawg tsis tau txojsia ntev dhawv mus ibtxhis. Peb yuav tsum xaiv ua neeg pluag ncaj ncees zoo dua ua npluanuj los ntawm kev tsis ncaj.
Thov Vajtswv,
Tus Tswv, nyuam yaus ua Koj tsaug, vim nyob hauv Koj nyuam yaus muaj kev zoo siab, kaj siab txawm yog muaj thiab pluag. Thov Koj qhia nyuam yaus paub ua neej raws li Koj Txojlus qhia txhua lub tsamthawj. Amees.
Peb puas coglus xaiv ua neej raws li tus Tswv qhia, coj raws li Nws txoj kevcai kom tau txais koob hmoov los yog peb xaiv ua kom npluanuj tsis dawbhuv?
Nyeem Vajluskub hauv peb lub xyoos: Yelemis 37:1-38:13
Kênh Youtube BHKTHN:
