Klei Aê Diê Blŭ: Klei Bi Hriêng 19:1
Êlan kliăng: “Mnuih ƀun ƀin dôk dơ̆ng ƀơ̆ng huă ênuah ênô jing jăk hĭn kơ sa čô mnuih mluk blŭ luar.” (Klei Bi Hriêng 19:1)
Klei êmuh ksiêm mĭn: Si Mtao Salômôn bi hriăm anak ñu ruah kơ klei hdĭp mnơ̆ng dhơ̆ng ? Ya ngă ñu bi hriăm snăn? Si knhuah hdĭp drei ruah čiăng bi êdah knuih hdĭp phung đăo kơ Krist kơ grăp čô mnuih ?
Hdĭp kpă ênuah leh anăn mdrŏng jing klei hdĭp jăk. Ƀiădah tơdah brei ruah plah wah klei hdĭp ƀun ƀin ƀiădah ênuah ênô leh anăn hdĭp mplư mplêč čiăng kơ mdrŏng snăn ti klei hdĭp brei drei ruah? Hlăm Klei Bi Hriêng 19:1 Mtao Salômôn bi hriăm anak brei ruah klei ƀun ƀin hdĭp mda bi ênuah ênô hĭn kơ hdĭp ngă soh ƀiădah mdrŏng sah. Ênuah ênô jing klă mngač, amâo ră kơ ngăn drăp. Ruah klei ênuah ênô jing ruah hlue si Klei Aê Diê Blŭ mtô. Hdĭp ênuah ênô jing hdĭp hlăm klei đăo knang kơ klei Aê Diê mkăp, wăt tơdah tŭ lu klei amâo jăk. Ƀiădah Klei Aê Diê Blŭ bi mklă phung hdĭp kpă ênô Aê Diê srăng hơêč hmưi leh anăn răng kriê (Klei Bi Hriêng 2 :7). Hdĭp hlăm klei đăo leh anăn kriê pioh klei bi mguôp hŏng Aê Diê, hlue ngă Klei Aê Diê Blŭ, Ñu srăng răng mngang, hơêč hmưi; mklăk wĭt, kyua khăp kơ klei tŭ dưn, yua klei blŭ luar mplư phung mkăn, amâodah hdĭp ƀai, ai tiê hngah kơ Aê Diê, wăt tơdah dưi mâo klei tŭ dưn ti anăp mta ƀiădah srăng tŭ boh jhat êdei anăp sĭt arăng thâo (êlan 1b, Klei Bi Hriêng 10:9). Tăp năng anak mnuih hdĭp mplư luar, măk ƀai dưi hgao klei bhiăn anăn amâo tŭ klei bi kmhal ôh, ƀiădah ăt srăng tŭ klei bi kmhal lă lar sĭt dôk ti anăp jhưng phat kđi Aê Diê. Hlăm klei dlăng sa nah, lu mnuih ƀuh mplư phung mkăn, mâo lu klei tŭ dưn jing thâo mĭn, ƀiădah hlăm boh sĭt leh anăn kơ êdei anăp diñu jing phung mluk.
Aduôn aê drei mơ̆ng klei thâo hdĭp ăt bi hriăm leh anak čô “Êpa bi doh, tĭ rưč bi ƀâo mngưi”. Khădah snăn lu mnuih kyua kƀah klei thâo săng, kƀah klei thâo, khăp kơ mdrŏng sah anăn klam leh boh jhat kjham snăk leh hdĭp kbưi hŏng hnơ̆ng čuăn Aê Diê.
Klei hdĭp mnơ̆ng dhơ̆ng đĭ leh anăn klei hâo hưn đĭ kyar ngă kơ grăp čô mnuih ƀuh klei mdê kơ klei mdrŏng hŏng klei ƀun. Klei hdĭp hruê anei mđĭ klei mdrŏng, klei hing ang, ƀiădah dlăng hơăi mang kơ knuih hdĭp, ai tiê thâo khăp. Drei ăt lač klei ƀun ƀin srăng kƀah mnơ̆ng dhơ̆ng, ai tiê amâo mơak. Drei ăt kăn tŭ mơh kơ klei ƀun ƀin nanao. Ƀiădah phung anak Aê Diê brei hdĭp bi ênuah ênô hlue si hnơ̆ng čuăn Aê Diê leh anăn bi hriăm anak čô gĭr mđĭ klei thâo, kriăng mă bruă, duah hdră msir klei ư̆ êpa, bi hrŏ klei ƀun ƀin hŏng klei thâo pô. Đăm ôh kyua khăp kơ prăk mah, klei hing ang bi luič knuih phung đăo, dlăng hơăi mang knuih hdĭp, knhal tuč luč klei hdĭp hlŏng lar. Brei drei ruah klei hdĭp ƀun dưn mơh ƀiădah ênuah ênô hĭn kơ duah klei tŭ dưn ƀiădah bi luč knuih hdĭp leh anăn luč wăt mngăt pô.
Drei ƀuăn ruah knhuah hdĭp hlue si Klei Aê Diê Blŭ, djă pioh klei bhiăn Ñu čiăng mơak dưi hưn klei Aê Diê hơêč hmưi hĭn kơ mâo klei tŭ dưn ti lăn ala ƀiădah amâo kpă ênô mơ̆ ?
Wah lač: Ơ Khua Yang, kâo bi mni lač jăk kơ Ih kyua hlăm Ih kâo mâo klei mơak, klei êđăp ênang wăt tơdah dôk hdĭp djăp mnơ̆ng dhơ̆ng amâo dah ƀun ƀin. Akâo kơ Khua Yang đru kâo hdĭp hlue si Klei Aê Diê Blŭ mtô, bi êdah klei đăo knang leh anăn klei jăk siam Aê Diê kơ grăp čô mnuih hlăm djăp boh klei.
Dlăng Klei Aê Diê Blŭ hlăm tlâo thŭn: Y‑Yêrêmi 37:1–38:13
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
