Hơriso 2:1-12
“Mă-lei, Inh pơjing boih Tang dŏ Tang dŏ pơtao Inh tơ kơpal kông Siôn rơgoh.” (Hơriso 2:6)
Nơ̆r jet pơwao:
– Hơriso 2 tơbăt ăn tơdrong kiơ gah kon bơngai hăm ‘Bok Kei-Dei?
– Tơ’ngla mă đe tuh đak rơmă tơkơ̆l pơgơ̆r thoi yơ?
– Nơ̆r krao apinh ayơ ăn kơ lu pơtao?
– ‘Bai pơhrăm tơblŏk ăn kơ bơ̆n tơdrong kiơ?
Hơriso 2:1-3 pơma ăn kơ lu bơngai mă ayăt hăm tơdrong nơ̆r pơjuang: “yua kơ kiơ lu bơngai nguaih iung blah? Păng lu teh đak chă tơdrong tơblah ưh kơ đei?” wă khan: Lu teh đak nguaih kơtul păng nuih kư̆ kă, pơ̆n wă tơblah hăm ‘Bok Kei-Dei mă Kră Yang tih hloh. Lu pơtao lăm teh đak iung blah, păng chă đon dih băl wă blah Kră Yang Yêhôwa păng ‘Bok mă đe tuh đak rơmă đơ̆ng Kră Yang wơh. Lu sư tơchĕng yua kơ lu sư tơpôl lơ lap lơlang na blah ‘Bok Kei-Dei jei lu sư. Lu sư ‘maih đei tơdrong rơngei, ưh kơ wă tơdrong pơgơ̆r đơ̆ng Kră Yang. Lu sư ưh kơ băt trong tơpăt sĭt tơdrong rơngei noh jơ̆ đei tơdrong tơ’bưh trŏ blep hăm Kră Yang ‘Bok Kei-Dei păng chu kiơ̆ khôi juăt đơ̆ng Kră Yang ată khan.
Kră Yang gô hiĕk kơ lu sư păng gô hil mĭl kơ lu sư. Lăm tơdrong Kră Yang hil mĭl, Kră Yang gô chrih kơ lu sư tih tơpă. Mă khan lu pơtao lăm teh đak âu chă đon tôch ai ră mă lei ưh kơ gơh pơm kiơ kơ ‘Bok Kei-Dei, ‘Bok Kei-Dei oei pơm kiơ̆ thoi Sư wă đĕch. “Thoi noh, Inh đei tơiung pơjing Pơtao inh tơ Siôn mă kông ‘lơ̆ng rơgoh inh” (trong 6). Tơplơ̆ kơ tơdrong blah plơ̆ Kră Yang ‘Bok Kei-Dei, ‘Bok mă đe tuh đak rơmă tơkơ̆l sư, Pơtao mă Kră Yang đei pơdơ̆ng tơiung tơ kông ‘lơ̆ng rơgoh sư gô ră roi nơ̆r mă Kră Yang Yê-hô-wa bơngai ră roi noh gô jô̆ sư Kon Kră Yang. Kră Yang gô mơ̆ng ‘Bok noh krao khan, ăn kơ Kon Sư noh lu teh đak mă ayăt kơ Sư noh păng tơmam pơsư̆ jơ̆p kơ teh đak ‘noh gô ăn kơ Sư. Pơtao ‘noh gô blah lu pơtao lăm teh đak păng gô jei Sư (trong 7-9). ‘Bok mă đe tuh đak rơmă, pơtao mă đơ̆ng Kră Yang ‘Bok Kei-Dei pôk tơiung noh jơ̆ ‘Bok Dŏng Pơklaih anăn Sư Kră Yang Yêsu, đơ̆ng adrĕch adrŭng pơtao Đa-wĭt. “Bok Kei-Dei khan: ‘Âu boih đam Inh, Inh rơih iŏk Sư, Inh ‘mêm kơ Sư tơpă, Inh lăp đon kơ Sư dêh. Inh gô ăn kơ Sư Yang Bơhngol Inh, Wă bơtho tơbăt ăn kơ đĭ-đăng khŭl bơngai gah tơdrong Inh wă sek tơlang ning-mônh.” (Mathiơ 12:18).
Mă khan ‘Bok Kei-Dei bơih tơ’ngla pơjing gơh pơlôch đĭ đăng mă lei Sư ‘bĕnh kơ jơhngơ̆m ‘mêm mơnat, sư gô ăn kơ bơngai bu mă băt tơbral wih brŏk tơ Sư. Wă hơtuch lăm Hơriso 2 nơ̆r krao hơ pơi wă ăn kơ lu bơngai pơgơ̆r rim kơ teh đak: Lu sư kăl kơ athei hlôh wao, chu kiơ̆ thoi khôi juăt Kră Yang, hli yom kơ ‘Bok Kei-Dei na pơgơ̆r, chă tơdrong hiôk hơiă păng ‘mêm yom kơ Kon Sư noh jơ̆ Kră Yang Yêsu Krist. Lu bơngai pơgơ̆r teh đak sư kơ dih mă hli yom kơ Kră Yang păng chông anhăk ba lu kon pơlei pơla sư kiơ̆ trong Kră Yang: “Pŭn dêh char ayơ đei Kră Yang pơm ‘Bok Kei-Dei sư. Adrĕch adrung ayơ mă Sư rơih pơm thoi tơmam Sư!” (Hơriso 33:12).
‘Bai pơhrăm tơblŏk ăn kơ bơ̆n athei gơnang kơ Tơ’ngla Pơgơ̆r tih hloh, nguaih kơ Sư ưh kơ đei anih ayơ hơđơ̆ng kơjăp ôh. Lu bơ̆n kăl kơ krao khan kơ lu bơngai pơgơ̆r.
Kơkuh bơnê kơ Kră Yang Tih hloh! Inh bơnê kơ Ih yua kơ inh gơh jing kon Ih, gơh tơ’bưh hăm Ih, đei mơn kơ tơdrong rơngei, hơđơ̆ng păng tôm mah. Inh krao khan kơ lu bơngai pơgơ̆r lăm teh đak Inh oei păng lu teh đak nai wă kơ hli yom kơ Kră Yang, wă kơ lu sư pơgơ̆r lăm tơdrong tơpăt wă kơ Ih đei tuh ăn pŭn hiôk kơ lu sư. Yua anăn Kră Yang Yêsu Krist. Amen
Lu bơ̆n đei jơhngơ̆m đon thoi yơ kơplah bơ̆n băt kơ Kră Yang ‘Bok Kei-Dei jơ̆ Kră Yang tih hloh?
Đŏk Sơ̆p Hla Bơar nơ̆r ‘Bok Kei-Dei lăm pêng sơnăm: Tơdrong Jang 5
Kênh Youtube BHKTHN:
