Klei Aê Diê Blŭ: Klei Mmuñ Hđăp 2:1-12
Êlan kliăng: “Kâo mdơ̆ng leh Mtao Kâo ti dlông Siôn, čư̆ doh jăk Kâo” (Klei Mmuñ Hđăp 2:6)
Klei êmuh ksiêm mĭn: Klei Mmuñ Hđăp mrô 2 brei thâo ya klei kơ mnuih leh anăn kơ Aê Diê? Si Pô Aê Diê trôč êa ƀâo mngưi srăng kiă kriê? Ya klei Aê Diê mtă brei phung mtao ngă? Ya klei bi hriăm drei mâo mơ̆ng klei hriăm anei?
Klei Mmuñ Hđăp 2:1-3 blŭ kơ phung bi trông čhai ngă klei bi rŭng hŏng klei êmuh amâo čiăng mâo klei lŏ wĭt lač ôh snei: “Si ngă mâo klei rŭng răng hdơ̆ng phung găp djuê mnuih, leh anăn phung ƀuôn sang trông čhai kơ klei amâo yuôm ôh?”, čiăng lač: Phung găp djuê tue bŏ hŏng klei mluk leh anăn jhŏng, jhŏng bi kdơ̆ng hŏng Aê Diê Pô Ti Dlông Hĭn. Phung mtao lăn ala kgŭ, leh anăn bi trông čhai, čiăng bi kdơ̆ng hŏng Yêhôwa leh anăn hŏng pô Ñu trôč leh êa ƀâo mngưi. Diñu lač phung lu diñu bi kƀĭn leh srăng bi kdơ̆ng leh anăn dưi hŏng Aê Diê. Diñu čiăng jing êngiê, kbiă đuĕ mơ̆ng klei Aê Diê kiă kriê. Diñu amâo thâo ôh kơ klei sĭt nik knŏng tơdah diñu dôk hlăm klei bi mguôp djŏ hŏng Aê Diê, leh anăn gưt kơ klei bhiăn Aê Diê kơh diñu srăng mâo klei êngiê sĭt.
Yêhôwa tlao mưč leh anăn ngêñ kơ digơ̆. Hŏng klei ngêñ Ñu ƀuah bi huĭ digơ̆. Wăt tơdah phung mtao lăn ala gĭr snăk sơưn dưn kăn dưi bi mgei Aê Diê rei, amâodah kăn mâo sa klei bi mlih lei hlăm hdră Aê Diê čuăn leh. “Kâo mdơ̆ng leh Mtao Kâo ti dlông Siôn, čư̆ doh jăk Kâo” (êlan 6). Mdê hŏng phung mtao bi kdơ̆ng hŏng Aê Diê, Pô Aê Diê Trôč Êa Ƀâo Mngưi, Mtao Aê Diê mdơ̆ng leh ti čư̆ doh jăk srăng hưn klei Yêhôwa mtă leh anăn Aê Diê pia kơ Gơ̆ jing Anak Aê Diê. Aê Diê srăng hmư̆ klei Mtao anăn akâo, brei ƀuôn ala mtao leh anăn dŏ ngăn tar ƀar lăn ala jing ngăn dưn kơ Gơ̆. Mtao anăn srăng bi blah hŏng phung mtao lăn ala leh anăn dưi hŏng digơ̆ bŏ hŏng klei guh kơang (êlan 7-9). Pô Aê Diê Trôč Êa Ƀâo Mngưi, Mtao Aê Diê mdơ̆ng leh jing Yêsu Krist yơh, Pô jing anak čô Mtao Đawit. “Nĕ anei dĭng buăl Kâo ruah leh, Pô Kâo khăp, hlăm Ñu Kâo mâo klei mơak snăk. Kâo srăng dưm Mngăt Myang Kâo ti Ñu, leh anăn Ñu srăng hưn klei Kâo phat kđi kơ phung tue” (Y-Mathiơ 12:18).
Aê Diê jing Pô Hrih Mjing, mâo jih klei dưi bi hdĭp amâodah bi mdjiê, ƀiădah Ñu bŏ hŏng klei pap, brei nanao mmông myun kơ hlei pô kmhal kơ klei soh, lŏ wĭt kkuh mpŭ kơ Ñu. Ti knhal tuč Klei Mmuñ Hđăp mrô 2 jing klei iêô jak kơ phung mtao lăn ala: Brei diñu mâo klei thâo mĭn, mă tŭ klei mtô lač mơ̆ng klei Aê Diê mtă, kiă kriê hŏng klei huĭ mpŭ kơ Aê Diê, duah klei êđăp ênang leh anăn khăp kơ Anak Ñu jing Khua Yang Yêsu Krist. Phung khua gĭt gai ala čar huĭ mpŭ kơ Aê Diê srăng atăt gai phung ƀuôn sang tui hlue êlan Khua Yang: “Jăk mơak yơh găp djuê mâo Yêhôwa jing Aê Diê diñu, jăk mơak yơh phung ƀuôn sang Ñu ruah leh jing ngăn dưn Ñu pô” (Klei Mmuñ Hđăp 33:12). Klei hriăm anei mñă kơ drei brei kđap hlăm Pô Kiă Kriê Ti Dlông Hĭn, êngao kơ Ñu amâo mâo sa anôk mâo klei êđăp ênang nanao hlŏng lar ôh. Wah lač bĕ kơ phung khua kiă kriê.
Si knuih drei jing tơdah thâo kral Aê Diê jing Pô kiă kriê ti dlông hĭn?
Wah lač: Ơ Khua Yang Pô Dlông Hĭn, Kâo lač jăk kơ Ih kyua Ih brei kâo jing anak Ih, dưi dôk hlăm klei bi mguôp sĭt suôr hŏng Ih, dưi mâo klei êngiê, klei êđăp ênang leh anăn klei jăk jĭn. Msĕ mơh, kâo akâo kơ Khua Yang đru phung khua kiă kriê ƀuôn sang hmei leh anăn phung khua kiă kriê tar ƀar lăn ala anei thâo huĭ mpŭ kơ Ih, kiă kriê hŏng klei kpă ênô čiăng dưi mă tŭ klei jăk jĭn mơ̆ng Khua Yang. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Bruă Phung Khua Ƀĭng Kna 5
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
