Bơtho Khôi Juăt 32:34-39
“Lăng bĕ, Inh âu boih Kră Yang ‘Bok Kei-Dei. ‘Nguaih kơ Inh ưh kơ đei yang nai dơ̆ng. Inh gơh ăn lôch păng ăn arih dơ̆ng, Inh teh rơka păng Inh ming pơklaih. Ưh kơ đei bu gơh tơgar iŏk klaih đơ̆ng tơpang ti Inh.” (Bơtho Khôi Juăt 32:39)
Nơ̆r jet tơchĕng pơwao:
– Lu rup yang bơngai tơmoi đei tơgŭm kiơ kơ kon pơlei Isơrael kơplah lu sư tơ’bơ̆p tơdrong pơmat?
– Bu jơ̆ Tơ’ngla đei tơdrong mơsêh dŏng pơklaih kon pơlei Isơrael?
– Lăm lu tơdrong ayơ bơ̆n ưh kơ lui ngeh thoi lu kon pơlei Kră Yang adrol sơ̆?
Lăm kơplah lu bơngai tơmoi pơma kơnê̆ kơ lu bơngai Isơrael. Kră Yang ‘Bok Kei-Dei đei nơ̆r apinh jet kon pơlei Sư thoi âu, lu rup Yang mă lu sư kơkuh păng pơyơ̆r tơmam soi dang ei oei tơyơ? Nơ̆r jet ‘nâu nhen thoi tơmam tŏng đak tơngiĕt tơgŭm kơ kon pơlei Kră Yang krăng kơchăng păng jĭ pơmat tat khan lu rup yang mă lu sư kiơ̆ păng chang hơmĕng đơ̆ng sơ̆ truh dang ei, yua kơ kiơ ngăn hreh ưh kơ đei nơ̆r pơma ‘bơ̆t tơdrong krao khan, kuăr ti lăng đĕch ‘bơ̆t tơdrong pơmat lu sư! Lăp kơplah tơ’bưh hăm tơdrong pơmat păng chơt hiôk, tơdrong lôch păng tơdrong arih đĕch kon pơlei Isơrael gơh băt hơđăl tơpă, lăp minh Kră Yang ‘Bok Kei-Dei đĕch jơ̆ Kră Yang ‘Bok Kei-Dei, ‘nguaih kơ ‘Bok Kei-Dei ưh kơ đei yang nai ôh. ‘Bơ̆t kon pơlei đei tơdrong pơmat tơpang ti mơsêh Kră Yang ‘Bok Kei-Dei minh ‘măng dơ̆ng dŏng pơklaih lu sư, Kră Yang jing tơm tơdrong dŏng pơklaih lu sư păng lu sư chang hơmĕng, ưh kơsĭ thoi ei đĕch. ‘Bok Kei-Dei kư̆m pơkă chih răk đĭ dôm tơdrong lu bơngai ayăt đei pơm kơ kon pơlei Sư, păng Sư gô pơm ‘mong kơ kon pơlei, sek tơlang tơpăt kơ lu sư. Wă pơma dơ̆ng, dôm tơdrong mă ‘Bok Kei-Dei pơm kơ lu kon pơlei Kră Yang hloh kơ dôm tơdrong lu sư tơchĕng. Liơ mă lu kon pơlei Kră Yang oei ngĭl ngŭl na khan ‘Bok Kei-Dei ‘mêm mơnat păng dŏng tơgŭm ding truh tôch hăm kon pơlei mă ưh kơ chu.
Bơ̆n ‘bônh kơ mơn ‘bôh, hil mĭl kơplah ‘bôh kon pơlei Isơrael đei Kră Yang ăn tơdrong pŭn hiôk lơ dêh mălei achăng lê̆ Kră Yang năm kiơ̆ tơdrong kơkuh păng gơnang kơ lu yang nai. Rŏ lăng lu bơ̆n kư̆m lăp đon păng tơchĕng khan mă khan bơ̆n ưh kơ pran mălei kư̆m ưh kơ ding mah achăng lê̆ Kră Yang, achăng hnam akŭm, achăng khul lăm tơdrong jang tơdrong pơlong kơ lu bơngai lui dang ei ưh kơsĭ achăng Kră Yang đơ̆ng dôm tơdrong pơgơ̆p tơ’bưh lăm tơdrong lui, mălei noh bơ̆n ‘bônh kơ achăng Kră Yang lăm tơdrong tơchĕng păng tơdrong bơ̆n pơm. Athei ‘blŏk ming dôm tơdrong lu bơ̆n adrin hăm jơhngơ̆m pran kơdih tơplih kơ tơdrong pran đơ̆ng Kră Yang, gơnang kơ tơdrong tơ’bưh tơduă kon bơngai tơplih kơ gơnang kơ Kră Yang, gơnang kơ tơdrong pran đơ̆ng jên tơmam tơplih kơ gơnang kơ tơdrong mơsêh păng jơhngơ̆m pran đơ̆ng nơ̆r krao khan kơ Kră Yang. Lu bơ̆n ngăl năm tơ Kră Yang đơ̆ng rŏng kơ bơ̆n đĭ yua tôm tơdrong nai bơih! Bơ̆n apinh jet lăng arih thoi noh hăm phara kiơ kơ kon pơlei Kră Yang ưh kơ lui ngeh kơ Kră Yang lăm chăl adrol sơ̆ ưh. Athei ‘blŏk, minh ‘Bok Kei-Dei đĕch tôm tơdrong bơ̆n chang hơmĕng lăm tơdrong bơ̆n yak năm kiơ̆ Kră Yang.
Kơkuh kơ Ih Kră Yang, Ih bơih Tơ’ngla dŏng pơklaih, păng tơm tơdrong inh chang hơmĕng. Lơ wơ̆t inh kư̆m ưh kơ lui ngeh thoi lu kon pơlei Kră Yang chăl adrol sơ̆. Apinh Ih mơnat kơ inh păng tơgŭm inh gơnang chang hơmĕng tơdrong Ih dŏng pơklaih kơplah tơ’bơ̆p tơ’bưh hăm dôm tơdrong anat lăm tơdrong arih. Yua anăn Kră Yang Yêsu Krist, Amen!
Kơplah tơ’bơ̆p lu tơdrong anat lăm tơdrong arih, bơ̆n ngăl pơm tơdrong kiơ adrol hloh?
Đŏk Sơ̆p Hla bơar ‘Bok Kei-Dei lăm pêng sơnăm: I Lu Pơtao 20
Kênh Youtube BHKTHN:
