Tĭt 3:12-15
“Iĕm athei pơhiôk jơhngơ̆m đe mơ̆n, ‘nĕ kơ pơhiôk jơhngơ̆m kơdih đĕch ôh.” (Philip 2:4)
Nơ̆r jet tơchĕng pơwao:
– Lăm kơthơ tuch luch ‘nâu, ‘bok Pôl đei bơtho kơ Tĭt păng lu bơngai lui kăl kơ pơm tơdrong kiơ?
– Đơ̆ng ‘bai bơtho noh đei tơ’bôh jơhngơ̆m ‘bok Pôl hơpơi thoi yơ?
– Lu bơ̆n pơhrăm iŏk tơdrong kiơ đơ̆ng tơdrong hơpơi ‘bok Pôl?
Lăm trong tuch luch ‘nâu, ‘bok Pôl đei bơtho kơ Tĭt: “Mưh inh wơh Artemus dah Tisĭk năm tơplih ih wă bơlơh ih ‘biơ̆, lăp sư truh tơ ih boih, na ih adrin năm tơ inh tơ Pơlei Nikôpôlis hŏ. Na mưh truh bơyan tơngiĕt kơnh na ih oei hơdai inh tơ Pơlei Nikôpôlis.” (trong 12). Lăm tơdrong jang pơgơ̆r gah bơhngol, sư hiơ̆k tơgŭm tơproh tơdrong jang kơ rim bơngai trŏ kơ lu sư jang wă tơiung tơdrong jang lăm hnam akŭm. Lăm jơ noh, minh lăm ‘bar ‘nu bơngai Atemur păng Tisik, gô năm bơwei lu bơngai lui tơ bŏl đak Kret, na ‘bok Tĭt wih brŏk tơ Pôl, bre Sêna păng Apôlê chă năm bơtho, na ‘bok Pôl kư̆m pơkă “Sêna sư hơgei tôm tơdrong juăt ‘Bok Kei-Dei pơkă sơ̆, na bre sư Apôlê wă năm bơtho đe. Hơdrol kơ bre sư wă năm tơklah đơ̆ng ih, ih athei tơdŏng mơnat ăn kơ bre sư tôm tơdrong tơmam hŏ, wă kơ bre sư huay kơ kơ’bah lăm tơmam bre sư wă năm bơtho đe.” (trong 13). Lu bơngai tơ bŏl đak Kret, Pôl bơtho lu sư: “Ih khan kơ lu bơngai lui kơchăng gah tơdrong ‘lơ̆ng ling lang păng mơnat ăn kơ lu bơngai dơnuh hin tơmam. Thoi âu boih tơdrong jang bơ̆n yua.” (trong 14 BTTHĐ).
Nơ̆r Pôl pơkă pơkăm tơ’bôh sư hiơ̆k bơngơ̆t, đĭ jơhngơ̆m bơ̆jang kơ Kră Yang, sư ưh kơ đei tơchĕng kơ akâu jăn kơdih mălei sư bơngơ̆t kơ bơngai nai, đơ̆ng gah bơhngol truh tơ gah sĕch akar bơ̆jang hơdai sư, na sư kư̆m ưh kơ đei hiơt bơtho kơ bơngai lui pơm ‘lơ̆ng, wă kơnhăm đei pơyua kơ ‘Bok Kei-Dei. Na kư̆m pơlung Tĭt păng lu bơngai lui tơ Bŏl đak Kret lăm tơdrong lui lu sư huay kơ pơsĕl ôh. “Lu bôl bơ̆n oei hơdai păng inh sư đei nơ̆r jet gia ih. Păng inh kư̆m apơi rơnguơ̆ ră kơ lu ‘nhŏng oh bơngai lui mă ‘mêm kơ nhôn tơ bŏl đak Kret. Nhôn kư̆m apinh ‘Bok Kei-Dei wei-lăng rim ‘nu kơ iĕm tôm tơdrong.” (trong 15). Lăm nơ̆r krao khan kơthơ tuch luch, ‘bok Pôl tơbăt tơdrong pơlung tih hloh kơ tơdrong hơpơi kơ ‘bok Tĭt păng lu bơngai lui tơ Bŏl đak Kret, noh lu sư oei lăm tơdrong ‘mêm mơnat tih tin đơ̆ng ‘Bok Kei-Dei.
Đơ̆ng nơ̆r ‘bok Pôl đei pơkă pơkăm, lu bơ̆n ‘bôh ‘bok Pôl hơpơi kơ Tĭt păng bơngai lui tơ Bŏl đak Kret, noh tơdrong hiơ̆k bơngơ̆t păng tơgŭm Khul Bơngai lui. Bơngai bơ̆jang kơ Kră Yang ưh kơsĭ hiôk lăm tơdrong jang hnam akŭm đĕch, mălei athei arih sa pơma dơnuh ‘lơ̆ng hăm bơngai bơ̆jang hơdai, pơtơm băl pơm ‘lơ̆ng, krao khan tơgŭm dih băl wă kơ rim ‘nu đei tơdrong dŏng pơklaih đơ̆ng Kră Yang. Hơpơi rim ‘nu kơ bơ̆n arih chu kiơ̆ nơ̆r Kră Yang bơtho hiơ̆k bơngơ̆t kơ bơngai nai, lăm noh Khul Bơngai lui kơ ‘Bok Kei-Dei (Philip 2:4).
Kơkuh kơ Ih ‘Bok Kei-Dei, bơnê kơ Ih yua Ih đei dŏng pơklaih inh đơ̆ng yoch đei ăn kơ inh bơ̆jang kơ Ih. Apinh Ih tơgŭm inh đei jơhngơ̆m hiơ̆k bơngơ̆t kơ bơngai nai, đĭ jơhngơ̆m bơ̆jang kơ Ih, păng tơduă lu nhôn, krao khan yua anăn Kră Yang Yêsu Krist, Amen.
Lu bơ̆n hăm hiơ̆k bơngơ̆t, tơgŭm, pơlung dih băl wă bơ̆jang kơ Kră Yang ưh?
Đŏk Sơ̆p Hla bơar ‘Bok Kei-Dei lăm pêng sơnăm: II Lu Pơtao 23
Kênh Youtube BHKTHN:
