Mathiơ 24:3-5
“Ning-mônh gô đei lơ bơngai truh na lu sư anăn măt Inh khan sư kơdih ‘Bok Krist. Đei lơ bơngai lui kơ sư pơhlŭ.” (Mathiơ 24:5)
Nơ̆r jet tơchĕng pơwao:
– Kră Yang Yêsu roi tơbăt tơdra blŭng a bơm kơ năr tôch ‘noh kiơ?
– Dang ei lu bơ̆n oei tơ’bơ̆p tơdrong ‘nâu thoi yơ?
– Pơm thoi yơ wă hoei kơ puh kơ đe pơhlŭ pơlung lăm tơdrong lui?
Kơplah oei ngôi tơ kông Ôliwơ na lu bơngai pơhrăm păng Sư jet Sư kơdrô̆ khan: “Apinh Ih roi kơ nhôn layơ đe wă pơrăm hnam akŭm ‘Bok Kei-Dei to păng đei tơdra liơ wă kơ nhôn kơnăl kơ Ih wă jur tơ teh âu păng kơnăl kơ năr tôch wă truh” (trong 3), lu sư apinh Kră Yang tơblang ‘bar tơdrong: layơ đe teh pơchah hnam akŭm, păng đei tơdra liơ wă kơ nhôn kơ năl kơ ih wă jur tơ teh âu, păng kơ năl kơ năr tôch wă truh. Lu bơngai pơhrăm păng Sư tơchĕng kơ tơdrong hnam akŭm wă pơchah yua kơ lu sư lui ngeh khan kơplah hnam akŭm pơchah lei năr tôch kŭm gô truh.
Kră Yang Yêsu tơl ăn kơ lu bơngai pơhrăm păng Sư gah dôm tơdrong tơdra kơ năr tôch (Mathiơ 24:14). Lăm ‘nơ̆r Kră Yang đei tơl, sư ưh kơ đei pơma hơđăl jơ năr mă lei pơih nơ̆r pơma athei kơ chăng: “Iĕm athei kơchăng kơdih hli kơ đe wă pơhlŭ pơlung iĕm kiơ̆ sư.” (trong 4). Kră Yang Yêsu tơbôh, tơdra blŭng-a lăm năr tuch luch noh jơ̆ “Tơdrong hơlĕnh”. ‘Nơ̆r “Athei wei” trong 4 wă khan athei krăng kơ chăng, lăng hơlen, yua kơ đei lơ tơdrong hơlĕnh lăm năr tôch. Kră Yang tơbăt ăn kơ lu bơngai pơhrăm păng sư băt đei lơ bơngai gô pơma hơlĕnh, wă pơhlŭ pơlung lu bơngai lui kơ Kră Yang. Tơdrong “lu bơngai mă hơlĕnh” nâu gô đei lơ bơngai truh na lu sư anăn măt Inh khan sư kơdih ‘Bok Krist păng bơtho lơ tơdrong hơlĕnh, ưh kơ trŏ kơ tơdrong sĭt.
Dôm tơdrong bơtho ưh kơ trŏ đơ̆ng lu bơngai bơtho hơlĕnh păng bơngai khan kơdih ‘Bok Krist. Gô pơhlŭ păng pơrăm lơ bơngai lui. Wă khan đei lơ bơngai lui kiơ̆ kơ lu sư bơtho hơlĕnh, khan kơdih sư ‘Bok Krist hloh kơ nơ̆r sĭt mă ‘Bok Kei-Dei đei tơbăt ăn. Noh bơih tơdrong mă Kră Yang bơtho kơ lu bơngai pơhrăm păng sư athei pơ‘lơ̆ng hli kơ puh kơ đe pơhlŭ.
Lu bơ̆n oei arih lăm jơ ‘nơ̆r mă kon bơngai ‘maih druh kiơ̆ păng pôk pơ ư dôm tơdrong ưh sĭt tơpă. Lu sư mơ̆ng păng pơm kiơ̆ kơ tơpôl mă ưh kăl kơ chĕng hơlen tơdrong trŏ dah glăi. Lăm tơdrong lui rai đunh rai đei lơ tơdrong lui ưh kơ trŏ, kư̆m thoi đei lơ bơngai pơtơm păng pơm kiơ̆ tơdrong lui nhen thoi sư kơ dih ‘Bok Krist bơih!
Pơm thoi yơ wă kơ lu bơ̆n gơh wei kơ jăp đon lui bơ̆n? Kră Yang Yêsu athei krao pơtơm “Athei wei” (trong 4) wă khan bơ̆n athei đĭ jơhngơ̆m pơ‘lơ̆ng lăm dôm tơdrong đei truh dang ei, lu tơdrong ưh kơ trŏ păng lu bơngai hơlĕnh. Wă kơ hoei kơ puh đơ̆ng tơdrong pơhlŭ pơlung lăm tơdrong lui, lu bơ̆n kăl “gơhret tơlei tơ̆n bơ̆n mă kơjăp; noh wă pơtih gia kơ bơ̆n đei đon tơpăt boih” (Êphêsô 6:14), wă khan athei pơnam kơ đŏk hŏk pơhrăm ‘nơ̆r ‘Bok Kei-Dei jơ̆ ‘nơ̆r Sĭt tơpă păng dơ̆ng kơ jăp lăm ‘nơ̆r Sĭt noh. Dôm tơdrong lui hlĭch ‘nao, dôm ‘nơ̆r bơtho lăp jơhngơ̆m bơ̆n, athei pơhrăm kiơ̆ kơ mĭl lu bơngai lu tơ pơlei Bêrê (Tơdrong Jang 17:11) lăng sơ̆p hla bơar ‘nơ̆r ‘Bok Kei-Dei wă kơ băt bơtho trŏ dah glăi.
Ơ Kră Yang, apinh Ih tơgŭm inh hơdrol hloh ‘măn jơ hŏk pơhrăm ‘nơ̆r Kră Yang, wă kơ đon lui inh oei kơ jăp lăm ih mă đơ̆ng đei lơ tơdrong bơtho hơlĕnh pơdăr, krao khan yua anăn Kră Yang Yêsu Krist, Amen!
Lu bơ̆n hăm tơ’bưh hăm ‘nơ̆r Kră Yang păng yua ‘nơ̆r ‘Bok Kei-Dei pơm hơnă wă kơ băt kơ tơdrong trŏ dah glăi?
Đŏk Sơ̆p hla bơar ‘Bok Kei-Dei lăm pêng sơnăm: Êsêkiên 26
Kênh Youtube BHKTHN:
