Klei Aê Diê Blŭ: II Klei Yăl Dliê 21:8-10
Êlan kliăng: “Snăn čar Êđôm bi kdơ̆ng hŏng klei phung Yuđa kiă kriê truh ti hruê anei. Hlăk anăn mơh ƀuôn Lipna bi kdơ̆ng hŏng klei Y‑Jôram kiă kriê, kyuadah ñu lui leh Yêhôwa Aê Diê phung aê ñu” (II Klei Yăl Dliê 21:10)
Klei êmuh ksiêm mĭn: Ya ngă hlăm ênuk Mtao Y‑Jôram, phung Êđôm leh anăn ƀuôn Lipna bi kdơ̆ng hŏng klei phung Yuđa kiă kriê? Ya jing boh jhat kơ klei hdĭp phung mtao amâo huĭ mpŭ leh anăn lui wir Aê Diê? Ya ih khăng ngă tơdah tuôm hŏng klei dluh lĕ hlăm klei hdĭp?
II Klei Yăl Dliê 21:8 brei thâo: “Hlăm ênuk Y‑Jôram phung Êđôm bi kdơ̆ng hŏng klei phung Yuđa kiă kriê, leh anăn mjing sa čô mtao kơ diñu pô.” Êđôm jing sa boh čar tĭng kơ ngŏ dhŭng čar Yuđa. Ênuk Mtao Y‑Đawit, phung Êđôm đup gưt kơ phung Yuđa (II Y‑Samuel 8:13-14) ƀiădah êdei tinăn diñu lŏ čiăng ngă klei bi kdơ̆ng tơdah Mtao Y‑Salômôn ngă klei soh kkuh mpŭ kơ rup yang (I Bruă Mtao 11:14-22). Mtao Y‑Asa leh anăn Y‑Jôsaphat, jing aê leh anăn ama Mtao Y‑Jôram, lŏ kiă kriê čar Êđôm, leh anăn mdưm sa čô khua krĭng kiă kriê (I Bruă Mtao 22:48). Ƀiădah hlăm ênuk Mtao Y‑Jôram, phung Êđôm lŏ ngă klei bi kdơ̆ng leh anăn mjing sa čô mtao kơ diñu pô. Mtao Y‑Jôram djă ba phung kahan nao bi blah hŏng phung Êđôm ƀiădah kahan phung Êđôm wang diñu, snăn êjai mlam Mtao Y‑Jôram kgŭ bi blah hŏng phung Êđôm dôk wang ñu. Jih jang klei phung Yuđa gĭr čiăng lŏ kiă kriê wĭt phung Êđôm amâo dưi ôh leh anăn phung Êđôm “bi kdơ̆ng hŏng klei phung Yuđa kiă kriê truh ti hruê anei” (êlan 10). Klei hƀuê ênuk brei ƀuh Aê Diê khăng brei phung Êđôm ngă klei bi kdơ̆ng hŏng phung mtao amâo mâo huĭ mpŭ leh anăn lui wir Aê Diê.
Hlăk anăn mơh, ƀuôn Lipna tĭng yŭ ăt ngă klei bi kdơ̆ng mơh, phung Yuđa tŭ klei bi kdơ̆ng mơ̆ng dua nah tĭng msĕ si dôk ti krah klei kpĭ kpiêt, phung kahan êdu awăt, bruă kđi čar luč klei bi hmăi, kyua Mtao Y‑Jôram “lui leh Yêhôwa Aê Diê” (êlan 10) jing akŏ klei ktang leh anăn klei jăk jĭn kơ ñu. Klei anei mdê kluôm dhuôm hŏng klei jing ênuk ama ñu Mtao Y‑Jôsaphat jing sa čô huĭ mpŭ kơ Aê Diê. Hlăk anăn jih jang ƀuôn ala mtao čar jĕ giăm “huĭ” tơdah Aê Diê bi blah leh hŏng phung roh phung Israel, leh anăn kyuanăn, “ƀuôn ala mtao Y‑Jôsaphat dôk êđăp ênang, kyuadah Aê Diê ñu brei kơ ñu klei mdei jŭm dar” (II Klei Yăl Dliê 20:29-30).
Pô roh hŏng phung đăo kơ Krist jing yang jhat dar jŭm drei čiăng duah mông găl ngă kơ drei (I Y‑Pêtrôs 5:8). Ya ngă Yang jhat amâo hiêk ƀơ̆ng ôh drei mtam ƀiădah dôk guôn mông găl kyuadah drei jing dŏ Khua Yang leh anăn Ñu răng kriê drei. Yang jhat srăng hiêk ƀơ̆ng drei tơdah wăt ti êngao anei drei amâo “lui” Aê Diê ôh, ƀiădah drei lui êlan Aê Diê, êbat hlăm êlan lăn ala, ngă klei jhat. Hlăk anăn Aê Diê srăng brei klei mkra truh leh anăn yang jhat srăng bi kdơ̆ng hŏng drei jŭm dar. Kyuanăn tơdah tuôm hŏng klei dleh hlăm klei hdĭp, hrô kơ klei drei msir mkra mă drei pô, snăn klei tal êlâo hĭn brei drei ksiêm dlăng kơ drei pô gưt asăp sĭt kơ Aê Diê mơ̆, lui wir Aê Diê leh anăn êlan Ñu hŏng sa mta klei ngă mơ̆, čiăng kơ drei kmhal leh anăn akâo kơ Khua Yang pap brei.
Drei msir mkra mă drei pô hĕ amâodah hriê kơ Khua Yang mtam tơdah tuôm hŏng klei dleh dlan?
Wah lač: Ơ Khua Yang, akâo Ih pap brei kơ kâo tơdah kâo dôk lui Ih leh anăn êlan Ih hŏng bruă ngă amâo bi mơak kơ Ih ôh. Đru kâo kmhal jih klei soh kâo leh anăn lŏ wĭt kơ Ih tơdah mâo klei Ih ƀuah.
Dlăng Klei Aê Diê Blŭ hlăm tlâo thŭn: Y‑Yôhan 19:28-20:18
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
