II Xwmtxheej Vajntxwv 21:8-10
Nqe cim:
“Txij thaum ntawd los cov Edoos tsis zwm rau cov Yudas li lawm. Tib lub sijhawm ntawd, cov neeg uas nyob hauv lub nroog Linas los ntxeev siab thiab, rau qhov Yehaulas tau tso tus TSWV uas yog nws cov yawgkoob tus Vajtswv tseg lawm.” (II Xwmtxheej Vajntxwv 21:10).
Lus nug rau sawvdaws xav:
– Yog ua cas vajntxwv Yehaulas tiam, Edoos thiab Linas thiaj ntxeev siab rau cov Yudas lawm?
– Nujnqis ntawm txhua tiam vajntxwv uas tsis hwm Vajtswv thiab tso Vajtswv tseg yog dabtsi?
– Koj pheej ua li cas thaum ua tsis tiav ib yam dabtsi hauv lub neej?
II Xwmtxheej Vajntxwv 21:8 qhia hais tias, tiam vajntxwv Yehaulas kav “cov Edoos tau ntxeev siab rau cov Yudas thiab lawv sawv ua ib lub tebchaws” Edoos nyob sab hnub tuaj qab teb ntawm lub tebchaws Yudas. Tiam Daviv ua vajntxwv, Edoos nyob qab tswjhwm ntawm Yudas (II Xamuyees 8:13-14) tiamsis thaum vajntxwv Xalumoos tso Vajtswv tseg lawm, cov Edoos xav rov ntxeev siab dua (I Vajntxwv 11:14-22). Vajntxwv Axas thiab Yehausafas uas yog vajntxwv Yehaulas yawg thiab txiv rov nrhiav tau kev tswj tau lub tebchaws Edoos, thiab tsa ib tus sawv cev saib cov pejxeem (I Vajntxwv 22:46-47). Tiamsis txog vajntxwv Yehaulas tiam, Edoos rov ntxeev siab thiab tsa muaj ib tus vajntxwv rau lawv. Vajntxwv Yehaulas thiaj txhij tubrog mus ntaus Edoos tiamsis tseem rov raug Edoos muab lawv vij tas. Yog li ntawd, thaum ib taghmo vajntxwv Yehaulas thiab nws cov tubrog thiaj nrhiav kev khiav kom dim cov Edoos. Yudas cov tubrog xav ua kom tau tswj Edoos, tiamsis Yudas ntaus tsis yeej Edoos “Txij thaum ntawd los cov Edoos tsis zwm rau cov Yudas li lawm” (nqe 10). Keebkwm qhia pom hais tias Vajtswv pheej siv Edoos los tawmtsam thiab ntxeev siab rau Vajtswv haiv neeg txhua tiam vajntxwv uas tsi hwm Vajtswv thiab tso Vajtswv tseg.
Tib lub sijhawm ntawd, Linas uas nyob sab hnub poob kuj sawv tawmtsam cov Yudas. Thaum ntawd cov Yudas raug ntxeev siab ob sab tuaj zoo li rab ciaj uas muab lawv tais rawv rau hauv plawv, lawv tsis muaj zog rau kev ua tsov ua rog, cov pejxeem tsis ntseeg siab rau tej nomtswv, vim vajntxwv Yehaulas “tau tso Vajtswv tseg lawm” (nqe 10). Tiam uas vajntxwv Yehaulas tswj kav tsis thooj tiam nws txiv Yehausafas tswj kav lawm, vim Yehausafas yog tus uas hwm Vajtswv. Thaum Yehausafas ua vajntxwv kav “Txhua haivneeg uas hnov hais tias tus TSWV tau pab cov Yixalayees tua yeej lawv cov yeebncuab, mas ua rau lawv ntshai kawg li. Yog li ntawd, Yehausafas thiaj kav lub tebchaws nyob thajyeeb, thiab Vajtswv pub rau nws nyob kaj siab lug” (II Xwmtxheej Vajntxwv 20:29-30).
Cov Ntseeg tus yeebncuab yog dab Ntxwjnyoog; nws mus mus los los txhua phab ntawm peb thiab nrhiav sijhawm los ua kom peb raug xwm txheej (I Petus 5:8). Yog ua cas dab Ntxwjnyoog tsis ua kom peb raug puastsuaj tamsim, tiamsis tseem yuav tos muaj sijhawm? Vim peb yog Vajtswv menyuam thiab Vajtswv tiv thaiv peb lawm. Dab Ntxwjnyoog yuav ua kom peb raug puastsuaj thaum uas peb hais tias, “peb ntseeg Vajtswv” tiamsis peb tsis ua raws li Nws Txojlus qhia thiab peb mus ua raws li lub ntiajteb los ntawm ua phem ua qias li neeg ntiajteb ua. Thaum peb cov ntseeg mus ua txhaum, Vajtswv yuav pom zoo cia dab Ntxwjnyoog los tawmtsam peb txhua phab thiab rau txim rau peb. Yog li ntawd, thaum muaj yam dabtsi uas peb ua tsis tau, peb yuavtsum ua tib zoo rov tig saib peb tus kheej saib peb puas mloog Vajtswv lus, puas yog cov tso Vajtswv tseg, puas taug Vajtswv txoj kev, kom peb paub lees txim thiab thov Vajtswv zam txim rau peb.
Thov Vajtswv
Vajtswv, thov zam lub txim rau nyuam yaus, yog nyuam yaus tabtom tso Koj tseg thiab tsis taug Koj txoj kev. Thov qhia nyuam yaus paub lees txim, tso kev txhaum tseg thiab tig rov los cuag Koj thaum uas tau Koj ntuas. Amees.
Thaum peb ua tsis tau ib yam dabtsi twg peb yuav nrhiav kev daws, lossis yuav los hais qhia rau Vajtswv kiag?
Nyeem Vajluskub hauv peb lub xyoos: Yauhas 19:28-20:18.
Kênh Youtube BHKTHN:
