Phau Ntawv Nkauj 7:1-17
Nqe cim:
“Koj yog Vajtswv tus uas ncaj ncees, koj txiav txim rau peb tej kev xav thiab tej uas peb lub siab ntshaw. Thov muab cov neeg siab phem tej kev ua phem tshem mus, thiab muab nqi zog rau cov neeg uas ua zoo” (Phau Ntawv Nkauj 7:9)
Lus nug xav:
– Vajntxwv Daviv tabtom nyob rau lub tsamthawj twg?
– Los ntawm yam dabtsi Vajntxwv Daviv ntseeg hais tias nws yeej yuav kaj siab?
– Peb yuav ua neej zoo li cas thaum paub Vajtswv yog tus uas txiav txim ncaj ncees?
Phau Ntawv Nkauj 7 yog Vajntxwv Daviv sau thaum nws raug yeebncuab ua limhiam, tsimtxom, caum tua povtseg (nqe 1-5). Tus duab uas hais txog yeebncuab muaj zog zoo li tus tsov ntxhuav nyaum xav muab Daviv lub cev dua kom ntuag ua ntau daim, txawv tus duab uas Daviv tus kheej nyob ib leeg, tsis muaj leejtwg pab cawm. Txawm yog li ntawd los, Vajntxwv Daviv tsis txhawj ntshai li, Daviv muab nws tej teebmeem no fij rau tus uas txiav txim ncaj ncees. Daviv ntseeg ruaj hais tias nws cov yeebncuab yuav raug Vajtswv txiav txim ncaj ncees raws li qhov lawv ua, Vajtswv yuav cawm Daviv thiab Daviv yuav tau txais kev kaj siab thaum tso siab rau tus Tswv (nqe 1). Vajtswv yog tus ncaj ncees yuav txiav txim ncaj rau txhua tus (nqe 7-11). Nws yog tus khib nej, ntxub kev phem thiab rau txim rau cov neeg uas ua phem ua qias yog hais tias lawv pheej muaj lub siab tawv tsis kam lees txim (nqe 12-16).
Thaum raug ua limhiam, Vajntxwv Daviv ua timkhawv hais tias, los ntawm cov yeebncuab tej lus nkaug, Daviv tsis tau ua txhaum; nws txhais tes tsis tau ua phem ua qias, tsis ua phem pauj phem rau cov neeg ua zoo rau nws, thiab kuj tsis tau ua phem pauj phem rau cov neeg uas ua limhiam rau nws (nqe 3-4). Daviv kuj thov Vajtswv tus uas saib neeg lub siab, tshawb xyuas nws lub siab, thiab pom hais tias nws twb siv tas zog kom muaj lub neej ncaj ncees thiab dawbhuv (nqe 8-9). Daviv ntseeg ruaj hais tias Vajtswv yuav tuaj nws tog thiab tsa nws cai. Tus Tswv yog tus uas tiv thaiv Daviv, thiab yog tus uas cawm cov neeg ncaj ncees dim (nqe 10). Vajtswv yuav rau txim rau cov neeg nkaug thiab tsimtxom nws (nqe 11-13). Cov lus xaus Phau Ntawv Nkauj 7 yog cov lus qhuas Vajtswv tus uas ncaj ncees, coglus yuav ntseeg thiab pehawm Vajtswv tus uas muaj hwjchim loj kawg nkaus.
Thaum peb paub Vajtswv tus uas peb tabtom pehawm yog tus uas txiav txim ncaj ncees rau txhua tus, Nws yog tus paub neeg lub siab, yog tus saib ntsoov txhua lolus hais, tes haujlwm ua thiab paub tagnrho lub keebtiv uas nyob zais nkoos tomqab txhua tes haujlwm, yuav pab peb paub hwm Vajtswv heev ntxiv, cia siab rau Nws, ua neeg zoo raws li Vajtswv siab nyiam. Peb kuj yuavtsum niaj hnub nco ntsoov thov Vajtswv tshuaj saib peb lub siab, paub lees txim kiag thaum uas Vajtswv taw peb qhov txhaum tawm. Thaum peb muaj kev sib raug zoo nrog Vajtswv lawm, peb tsis txhawj ntshai thaum tus Tswv hais txog peb qhov txhaum. Thaum peb muaj kev sib raug zoo yog nrog Vajtswv, peb tsis txhawj ntshai thaum yeebncuab ua limhiam thiab tsimtxom, vim peb paub tias tus uas txiav txim ncaj ncees yuav tiv thaiv thiab cawm peb raws li lub sijhawm Nws teem tseg thiab raws li Nws txojkev npaj. Thov Vajtswv pab kom peb nquag nyeem, kawm Vajtswv Txojlus kom txhua hnub peb loj hlob hauv txojkev paub Vajtswv.
Thov Vajtswv,
Vajtswv tus uas ncaj ncees, Koj yog peb Leej Txiv muaj kev hlub, niaj hnub saib xyuas thiab tiv thaiv peb. Thov Koj qhia kom nyuam yaus paub hwm Koj, ua neej raws li Koj nyiam, thiab ntseeg tias Koj yog tus uas txiav txim ncaj ncees rau cov neeg nkaug thiab ua tsis ncaj rau nyuam yaus. Thov Koj pab kom nyuam yaus muaj txaus kev ntseeg, ua siab ntev thiaj pom Koj txojkev hlub thiab kev tiv thaiv nyuam yaus ib yam li uas koj saib Koj ob lub qhovmuag. Nyuam yaus tuav Tswv Yexus Khetos lub npe thov, Amees.
Peb ua li cas thaum raug neeg ua limhiam thiab tsimtxom peb?
Nyeem Vajluskub hauv peb lub xyoo: Hanpakus 2
Kênh Youtube BHKTHN:
