Klei Aê Diê Blŭ: Y-Đaniel 2:19-35
Êlan kliăng: “Leh anăn Aê Diê bi êdah klei hgăm anăn kơ Y-Daniel hlăm klei bi ƀuh êjai mlam. Leh anăn Y-Daniel mpŭ mni kơ Aê Diê hlăm adiê” (Y-Đaniel 2:19).
Klei êmuh ksiêm mĭn: Ya klei Y-Đaniel ngă leh anăn lač, hlăk Aê Diê wĭt lač kơ klei ñu wah lač? Hlăk dôk dơ̆ng ti anăp mtao, ya klei ñu lač êlâo hĭn? Ya ngă? Si ngă, čiăng kơ klei mpŭ mni kơ Aê Diê jing klei mưng juăt hlăm klei drei wah lač wăt hlăm klei drei blŭ hrăm hŏng arăng?
Hŏng ai tiê hơ̆k mơak leh anăn hdjul suêh kyuadah klei hdĭp phung mkăn wăt klei hdĭp ñu pô amâo lŏ mâo klei arưp aram huĭ hyưt ôh, hlăk Aê Diê bi êdah klei yuôm hgăm hlăm klei bi ƀuh êjai mlam kơ ñu, bruă Y-Đaniel lŏ wĭt ngă êlâo hĭn amâo djŏ ôh ruăt êran nao mtam čiăng bi êdah klei êpei anăn kơ mtao Y-Nebukatnetsar, ƀiădah ñu “mpŭ mni kơ Aê Diê” (êlan 19). Boh blŭ “leh anăn” hlăm êlan 19 brei ƀuh sa klei wĭt ngă mtam, amâo mâo klei lŏ bi kdung amâodah kĭ kơ̆ ôh. Boh blŭ “mpŭ mni” mñă wĭt tlâo bliư̆ (êlan 19, 20, 23) kñăm kơ bruă ñu wĭt ngă hŏng Aê Diê. Hrô kơ klei knŏng lač jăk kơ Aê Diê kyuadah Ñu brei leh ya klei ñu akâo, găn hŏng pă êlan Klei Aê Diê Blŭ dlông, ñu mpŭ mni kơ Aê Diê kyuadah Aê Diê jing Pô mâo klei thâo mĭn leh anăn klei myang, Pô brei klei thâo săng. Êdei anăn kơh, hlăm êlan 23 ñu mpŭ mni kơ Aê Diê kyua mta klei Aê Diê bi êdah kơ ñu. Blŭ mdê, Y-Đaniel mpŭ mni kơ Aê Diê kyua knuih Aê Diê jing amâo tuôm mlih ôh, leh anăn kơh ñu mpŭ mni kơ Aê Diê kyua bruă Aê Diê ngă kơ ñu.
Klei Y-Đaniel mpŭ mni kơ Aê Diê kčưm dơ̆ng mơ̆ng mmông ñu pioh dôk hjăn hŏng Khua Yang, leh anăn kăn djŏ mjưh tăp mơ̆ng anăn rei. Hlăk dôk dơ̆ng ti anăp sa čô mtao đăo kơ yang mkăn, ñu amâo mâo mblang mtam ôh klei êpei, ƀiădah êlâo hĭn ñu lač kơ klei “mâo Aê Diê hlăm adiê bi êdah klei hgăm” (êlan 28), leh anăn “pô bi êdah klei hgăm” (êlan 29). Ñu hưn kñăm, klei ñu dưi mblang anei amâo djŏ ôh kyua ñu mâo klei thâo mĭn hĭn kơ mnuih mkăn (êlan 30). Klei ñu mpŭ mni kơ Aê Diê tuh êyuh dơ̆ng mơ̆ng mmông ñu pioh hjăn păn wah lač truh kơ mmông ñu blŭ hrăm hŏng pô mkăn, khădah pô anăn ka tuôm thâo kơ Aê Diê dưn. Amâo djŏ ôh ñu mpŭ mni kơ Aê Diê knŏng hlăk êjai wah lač hjăn păn leh anăn mni kơ ñu pô amâodah čiăng arăng mni kơ ñu, ƀiădah ñu myơr kluôm klei guh kơang knŏng hjăn kơ Aê Diê. Ñu kƀĭn jih êlan hdră ñu mpŭ mni kơ Aê Diê jing sa: hlăk dôk hjăn păn amâodah êjai dôk dơ̆ng ti anăp arăng. Hŏng Y-Đaniel pô, mpŭ mni jing klei wĭt ngă mtam leh anăn ngă nanao đrông, jing mta bruă ñu ngă êjai dôk hjăn păn hŏng Khua Yang leh anăn êjai dôk dơ̆ng ti anăp phung ƀuh klei dưi, ƀuh boh “yuôm bhăn” mơ̆ng ñu.
Drei kreh pioh lu mmông kwưh akâo ƀiădah ƀiă snăk mmông pioh bi mni lač jăk kơ Aê Diê. Drei kreh hŏng jih ai tiê kwưh akâo ƀiădah knŏng mpŭ mni kơ Aê Diê sdah mă tŭ kơ leh. Drei khăng luă gŭ leh anăn myơr klei guh kơang kơ Aê Diê êjai dôk wah lač hjăn, ƀiădah kuan mă kơ pô dê klei mpŭ hing ang hlăk dôk ti anăp arăng. Klei hdĭp knŏng thâo kwưh akâo đuč jing klei hdĭp kƀah knap leh anăn amâo mâo klei mơak ôh, ƀiădah klei hdĭp thâo mpŭ mni kơ Aê Diê jing klei hdĭp bŏ dlai klei jăk mơak.
Hlăk Aê Diê wĭt lač klei drei wah lač, hŏng hlei pô drei nao blŭ hrăm êlâo hĭn? Si ngă, diih khăng mpŭ mni kơ Aê Diê mơ̆?
Ơ Khua Yang, kâo khăng kwưh akâo ƀiădah wơr bĭt hĕ mpŭ mni kơ Ih. Akâo Ih đru kâo mâo nanao ai tiê mpŭ mni kơ Ih êjai mmông dôk hjăn hŏng Ih amâodah êjai blŭ hrăm hŏng arăng.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: H’Rut 4
Kênh Youtube BHKTHN:
