Klei Aê Diê Blŭ: Y‑Mathiơ 8:1-4.
Êlan kliăng: “Ơ Khua Yang, tơdah ih čiăng, ih dưi bi doh kâo” (Y‑Mathiơ 8: 2b).
Klei êmuh ksiêm mĭn: Ya klei mnuih djŏ phung akâo kơ Khua Yang Yêsu? Ya bruă Khua Yang ngă kơ klei ñu akâo? Klei ñu akâo bi êdah si ngă klei ñu đaŏ? Ya klei hriăm drei mâo hlăm klei drei wah lač?
Anei jing klei myang tal êlâo Khua Yang Yêsu ngă leh klei hriăm ti čư̆ hlăm pluh mta klei myang hlăm kdrêč 8 leh anăn 9. Tui si klei bhiăn Y‑Môis, phung djŏ phung amâo dưi nao ôh hlăm êpul lu leh anăn kăn dưi nao giăm sa čô mnuih mkăn rei (Bruă Lêwi 13:45-46). Khua ƀĭng kna Y‑Mathiơ amâo lač ôh hlei pô hưn kơ mnuih djŏ phung kơ Khua Yang Yêsu, amâodah hlei bi hriăm ñu nao akâo kơ Khua Yang bi hlao. Jih jang drei thâo kơ pô anei jing pô amâo hluê ngă klei bhiăn Y‑Môis čiăng dưi nao giăm Khua Yang Yêsu leh anăn akâo kơ Khua Yang bi hlao ñu. Klei êdah kdlưn hĭn kơ mnuih djŏ phung anei jing klei kwưh akâo kơ Khua Yang: “Ơ Khua Yang, tơdah ih čiăng, ih dưi bi doh kâo” (êlan 2b).
Klei amâo gưt klei bhiăn Y‑Môis čiăng dưi bi tuôm hŏng Khua Yang Yêsu bi êdah ñu êpa mhao dưi hlao klei ruă. Ƀiădah leh bi tuôm hŏng Aê Diê pô myang dưi bi hlao klei ruă ñu, ñu amâo dưm ôh klei pô čiăng hlăm klei Khua Yang čiăng. Boh blŭ “tơdah” đŭt ƀiădah bi êdah ñu jao jih leh anăn đaŏ knang kluôm ênŭm hlăm klei Khua Yang Yêsu čiăng. Dôk ti anăp klei akâo bŏ hŏng klei đaŏ leh anăn luă gŭ anăn, Khua Yang Yêsu amâo djŏ knŏng tŭ ư bi hlao kơ ñu ôh, ƀiădah Khua Yang lŏ ngă sa bruă amâo čiăng êdi ôh leh anăn kăm, anăn jing ba kngan ruêh hlăm mnuih djŏ phung (Bruă Lêwi 5:3). Ñu ruêh hlăm klei ruă ñu bi êdah klei khăp Ñu prŏng êlam, klei ruêh lač, Khua Yang amâo čhŏ mrŏ ôh kơ ñu, ƀiădah Khua Yang čiăng ñu dưi hlao, dưi lŏ ñŭ hlăm klei hdĭp kkuh mpŭ hlăm Sang yang, gŏ sang leh anăn ƀuôn sang. Leh mnuih djŏ phŭng myơr klei ñu akâo hlăm klei jăk Khua Yang Yêsu msĕ si sa čô hđeh snăn Khua Yang brei leh kơ ñu klei jăk hĭn.
Sa hlăm dŭm klei lông dlăng leh dưm klei Khua Yang čiăng hlăm klei pô čiăng sĭt wah lač jing tŭ ư năng ai Aê Diê srăng wĭt lač ơ ơh. Khădah, pia jing klei lông dlăng ƀiădah anăn jing klei thâo mĭn hĭn, kyua wăt tơdah Aê Diê wĭt lač amâodah hơaĭ snăn klă sĭt anăn jing klei jăk hĭn Aê Diê brei kơ drei. Anak mnuih drei mâo lu klei êdu kƀah, knŏng thâo ƀuh klei ti ală mta ƀiădah Aê Diê jing Pô prŏng êlam hĭn, Ñu thâo klă ya klei jăk hĭn kơ drei leh anăn ya klei amâo jăk. Ƀiădah hlăm boh sĭt, amâo djŏ ôh grăp mnĭt mmông drei mâo nanao klei jăk mơ̆ng Aê Diê hlăm klei hdĭp pô. Drei khăng amâo mơak ôh hŏng Aê Diê sĭt ya klei akâo amâo truh msĕ si klei pô čiăng. Mơ̆ng klei hriăm hruê anei, klei akâo Khua Yang đru drei brei dôk hlăm klei jao jih leh anăn đaŏ knang hlăm klei jăk Aê Diê brei kơ drei.
Diih tuôm ăl čôñ mơ̆ kơ Khua Yang kyua Ñu amâo wĭt lač klei akâo tui si diih čiăng?
Wah lač: Ơ Khua Yang, jing Pô jăk hĭn kâo kkuh mpŭ. Akâo kơ ih đru kâo dưm klei Khua Yang čiăng hĭn kơ klei kâo čiăng, đaŏ knang leh anăn jao jih kơ klei Aê Diê brei hlăm klei hdĭp kâo.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: I Y‑Samuel 6:19-8:9
Kênh Youtube BHKTHN:
